Сыд фэдэрэ къиныгъуи хэкIыпIэ къыфагъоты
![Image description](images_upload?image_name=2022/07/DSC_5758-1.jpg)
Экономикэ къиныгъохэм ямылъытыгъэу, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Адыгейский пивобезалкогольный завод «АСБИР» зыфиIорэр бэдзэршIыпIэм чIыпIэу щиубытыгъэм тетэу мэлажьэ.
— Заводэу «АСБИР» зыфиIорэм мазэм продукцие тонн 1500-рэ къыдигъэкIын амал иI, — къеIуатэ заводым ипащэ игуадзэу Шъонтыжъ Зарэ. — Ащ хэдгъэхъон амал къытэзытыгъэр шъонхэр зыщырагъахъорэ германскэ линиякIэу илъэсрэ ныкъорэкIэ узэкIэIэбэжьмэ дгъэуцугъэр ары. Мы уахътэм тонн 500 фэдиз къэдгъэхьазырырэр.
Апэ пивэр, псы IэшIур, квасыр литрэ 25-рэ, 30, 50 зэрыфэхэрэ кегхэм арытэу къэтшIыщтыгъэ. Джы пивэ лъэпкъ 20 къыдэтэгъэкIы: «Адыгейское фирменное», «Чешское», «ГОСТ», «Немецкое», «Жигулевское», «Темное», «Пшеничное», нэмыкIхэри. Мыхэр зэкIэ литрэныкъо зэрыфэрэ бэшэрэбхэм арытых. Джащ фэдэу узымыгъэуташъорэ псыIэшIухэу «Груша», «Лимонад», «Мохито», квасыр, сокхэу «Ягодный микс», «Мультифрукт» къэтэшIых.
ПивэшI заводым ипащэ игуадзэ къызэриIуагъэмкIэ, псы къызэрыкIо къабзэу кулерхэм арытэу (литрэ 19) къагъэхьазырырэри етIупщыгъэу зэбгыращы. Ар чIычIэгъым метрэ 260-рэ икууагъэу къычIащы. КъашIырэ продукциехэм язытет шэпхъэшIухэм адиштэнымкIэ мы псы къабзэу агъэфедэрэм мэхьанэшхо иIэу щыт.
— Санкциехэми яягъэ къытэкIыгъ. Сырьеу тызэрэлажьэрэм ипроцент 50-р IэкIыб къэралыгъохэу Германием, Австрием, Бельгием, Англием къарытщыщтыгъэ. Ахэр солодыр ыкIи хмелыр арых. Джы тэ тимызакъоу, ахэр къытфэзыщэщтыгъэхэри хэкIыпIэхэм алъыхъунхэ фае хъугъэ ыкIи Урысыем къыщыдагъэкIырэ «базовэ солод» зыфиIорэмкIэ ащыщхэр зэблэтхъугъ. Ау анахь тшIоIофыгъэр къэтшIырэ пивэм иIэшIугъэ, итеплъэ, изытет зэмыхъокIыныр, типродукцие зикIасэхэм ар зэхамышIэныр ары. Къыхэзгъэщымэ сшIоигъу ар къызэрэддэхъугъэр, — хигъэунэфыкIыгъ Зарэ.
Iэшъынэ Сусан.