Iэпэщысэ кIэракIэхэр
АР-м и Лъэпкъ тхылъеджапIэ техническэ ыкIи экономическэ литературэмкIэ иотдел иIофышIэхэм Урысыем щыпсэурэ лъэпкъхэм яискусствэрэ якультурнэ кIэнрэ я Илъэс къыдыхэлъытагъэу къэгъэлъэгъонэу «Рукотворные чудеса» зыфиIорэр къагъэхьазырыгъ. Ар анахь лъэпкъ IэшIэгъэжъхэм ахалъытэрэ блэным епхыгъ.
Iофтхьабзэр темэ инэу «Унэгъо искусствэм ихьалэмэтыгъ» зыфиIорэр лъызгъэкIуатэу ыкIи цIыфхэр IэшIагъэхэм ятарихъ, анахь агъэфедэхэрэм, ахэм яшIынкIэ амал шIыкIэхэр къэзыIуатэу гъэпсыгъэ.
Лъэпкъ тхылъеджапIэм иIофышIэхэм къызэраIуагъэмкIэ, узыфэе тхылъыр — хъэн-шъэн, дэн-бзэн, нэмыкIхэмкIэ гъэзагъэу, ахэм якъэбар гъэшIэгъонхэмкIэ, чIыопс пкъыгъохэр зыхашIыкIыхэрэмкIэ (пхъэр, чыр, IутIэныр, къэкIырэ уц тхьапэхэр, ахэм апкъ) джащ фэдэу, кIапсэр, шъор, щыгъыжъыер къыщыпчъыгъэх. Тхылъхэр ыкIи къыдэкIыгъохэм ащыщхэр IэшIагъэр пIэ къибгъэхьан зэрэплъэкIыщтым ехьылIагъэх. ГущыIэкIэ къыIуатэрэр тхыгъэм сурэтхэмкIэ зыщыгъэпытэжьыгъэхэри ахэтых. Хъэн-шъэн Iофыр а зэкIэм къагъэпсынкIэ, цIыфхэми ахэтых аIэкIэ ашIырэм ыгъатхъэхэу, ар сэнэхьат зыфэхъужьыпэхэри. Хъэгъэ зэфэшъхьафхэр — пшъапIэу, Iэшъхьэ Iудэу, кофтэ шъыпкъэу ашIых.
Тхылъеджэм цIыфымкIэ шъхьапэ хъурэ пкъыгъохэр шIыгъэнхэмкIэ, хъэн-шъэным зызэрэфэбгъэсэщтымкIэ мыхэр нэпэеплъ-шIухьафтын дэгъоу зэрэщытхэр, художественнагъэри лъэшэу къазэрахэщырэр къэгъэлъэгъоным изэхэщакIохэм кIагъэтхъыгъ.
Къэгъэлъэгъоныр бэдзэогъум и 15 — 30-м нэс зэIухыгъэщт. (Тикорр.).