ЛъэпсэшIум илъэмыдж орэпытэ
Апэрэ шъолъыр фестиваль-зэнэкъокъоу Шъэумэн Хьазрэт ыцIэ зыхьырэ «Адыгэ шъау» зыфиIорэр Мыекъуапэ зэрэщыкIуагъэм фэгъэхьыгъэ тхыгъэ тигъэзет къыщыхэтыутыгъагъ.
Лъэпкъ гупшысэ зыхэлъ Iофтхьабзэм яеплъыкIэхэр къыраIуалIэ зышIоигъоу гущыIэгъу тызыфэхъугъэхэр бэ зэрэхъурэм къыхэкIэу а темэм къыфэдгъэзэжьыгъ. Зэгъэпшэнхэр тшIыхэзэ джэуапхэм ащыщхэм шъуащытэгъэгъуазэ.
— Зэхахьэр адыгабзэкIэ зэрэкIуагъэр лъэшэу тигуапэ. Рагъэжьэгъэ Iофыр лъагъэкIуатэ тшIоигъу, — къытиIуагъ гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм ипащэу, шIэныгъэлэжьэу ЛIыIужъу Адам.
— Якъуаджэмэ цIыф цIэрыIоу адэсхэм къатегущыIагъэх. Тарихъыр нахь дэгъоу зэрагъэшIэным фэшI нэмыкI упчIэхэр аратынхэ фаеу зылъытэрэмэ адесэгъаштэ, — къыIуагъ зэлъашIэрэ сурэтышI-модельерэу СтIашъу Юрэ.
Зэнэкъокъур нахь гъэшIэгъонэу зэхащэн фаеу къытэзыIуагъэхэр бэ мэхъух. ЩабзэмкIэ псагъэм ещэрыонхэм фэшI филармониер зэIукIапIэ мыхъущтэу археолог цIэрыIоу Тэу Аслъан, нэмыкIхэм алъытэ.
Фестиваль-зэнэкъокъур филармонием щызэхащэныр къезымыгъэкIухэрэр, нахьыбэрэмкIэ, бзылъфыгъэхэр арых. Шыгъачъэхэр зэрэкIохэрэм, шыухэм лIыгъэ къызыхагъэфэн зэралъэкIырэм яплъы зышIоигъохэм адыгэ бзылъфыгъэу Нуриет ащыщ.
— БлэкIыгъэ илъэсым зэхащэгъэ зэнэкъокъоу «Адыгэ шъаом» сыхэлэжьагъ, апэрэ чIыпIэр къыщыдэсхыгъ, — иеплъыкIэхэм тащегъэгъуазэ Щынджые щыщэу Тхьаркъохъо Тимур. — УиIэпэIэсэныгъэ къэбгъэлъэгъощтми, тарихъым, шэн-хабзэхэм, спортым, фэшъхьафхэм яхьылIэгъэ упчIэхэм зэхъокIыныгъэхэр афашIынхэр нахьышIу. УпчIэхэм яджэуапхэм уалъыхъузэ уишIэныгъэ хэбгъэхъощт, зэхахьэм къыщыодэIухэрэм гъэшIэгъонэу зэхахы ашIоигъор макIэп.
ОсэшIхэм якуп этнограф хагъахьэмэ ишIуагъэ къэкIощтэу шIэныгъэлэжьэу Теуцожь Нуриет къытиIуагъ.
— Фестиваль-зэнэкъокъур филармонием щызэхащэныр нахьышIу, — еIо республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан. – Ащ диштэу зэнэкъокъур бгъэпсын плъэкIыщт. АдыгабзэкIэ зезыщагъэхэм тафэраз. ЗэхэщакIомэ таригъусэу Iофыр лъыдгъэкIотэщт.
— Зэнэкъокъум хэлажьэхэрэм упчIэу яттыщтыр къызэрэхэтхыгъэ шIыкIэм зыкъигъэшъыпкъэжьыгъ. Интернетым пэшIорыгъэшъэу зэкIэ упчIэхэр къыщытIопщыгъэх, етIанэ тэ тызыфаехэр къыхэтхыгъэх. Фестивалыр тищыкIагъ, дунэе зэнэкъокъу зэрэхъущтым тыдэлэжьэщт. Адыгэ Республикэм культурэмкIэ и Министерствэ иIофтхьабзэхэм ащыщ зэрэхъущтым тегъэгушIо, — къытиIуагъ Тэхъутэмыкъое районым иадминистрацие культурэмкIэ и ГъэIорышIапIэ ипащэу Ацумыжъ Рустам.
Адыгэ Республикэм культурэмкIэ иминистрэу Аулъэ Юрэ фестиваль-зэнэкъокъум хэлэжьагъэхэм афэгушIуагъ, хагъэунэфыкIырэ чIыпIэхэр къыдэзыхыгъэхэм ащыщхэм шIухьафтынхэр аритыжьыгъэх.
Нарт шъаохэм яадыгабзэ IупкIэу агъэфедэным, ягулъытэ зыкъырагъэIэтыным, сэнаущыгъэу ахэлъыр къызэIуахыным фестивалэу «Адыгэ шъаор» фытегъэпсыхьагъ. Тиадыгабзэ усэхэм, орэдхэм, зэдэгущыIэгъухэм ащызэхэтэхы, тэгъэлъапIэ. Адыгэ шъуашэм, къашъом, лъэпкъ шэн-хабзэхэм ядэхагъэ дунаим щашIэ. ИшIушIагъэкIэ Урысыем, IэкIыб къэралхэм алъыIэсыгъэ Шъэумэн Хьазрэт ыцIэ зыхьырэ шъолъыр зэнэкъокъоу «Адыгэ шъаом» тилъэпкъэгъухэр зэфещэх, нэмыкI лъэпкъхэм щысэ афэхъу. ЕгъэжьэпIэшIум илъэмыдж орэпытэ.
— Фестиваль-зэнэкъокъоу «Адыгэ шъаом» сигуапэу сеплъыгъ, — къытиIуагъ Шэуджэн районым иадминистрацие культурэмкIэ и ГъэIорышIапIэ ипащэу Къэрэбэт Айдэмыр. — ШIухьафтын шъхьаIэу Гран-прир къыдэзыхыгъэ ПашIо Айдэмыр тирайон щыщ, синэIуас. Рэхьатныгъэ хэлъэу, шIогъэшIэгъонэу зэнэкъокъум зыфигъэхьазырыгъ. Ащ фэдэ фестивальхэр тищыкIагъэх. Адыгабзэм изэгъэшIэн, игъэфедэн фэIорышIэрэ зэнэкъокъум нахь зегъэушъомбгъугъэн фае. Тэ, культурэм иIофышIэхэм, шIыкIэшIухэм талъыхъущт, зэхэщакIохэм IэпыIэгъу тафэхъущт.
— Апэрэ шъолъыр фестиваль-зэнэкъокъум бэмэ таригъэгупшысагъ, — къытиIуагъ Адыгэ Республикэм культурэмкIэ иминистрэу Аулъэ Юрэ. – Ти ЛIышъхьэу КъумпIыл Мурат ыцIэкIэ фестивалым хэлэжьагъэхэм, гъэхъагъэ щызышIыгъэхэм сафэгушIо. КъыкIэлъыкIощт зэнэкъокъум хэхъоныгъэхэр фэтшIыщтых. Ны-тыхэр, культурэм иIофышIэхэр, зэныбджэгъухэр фестивалым зэфищагъэх. Ащ имэхьани къыдэтлъытэзэ зэхахьэу «Адыгэ шъаор» нахь гъэшIэгъон тшIыщт.
Фестиваль-зэнэкъокъум инеущрэ мафэ нахьышIу зэрэхъущтым гушхоныгъэ къытхелъхьэ, кIэщакIохэм ямурад къадэхъунэу афэтэIо.