Шъолъыр фестиваль-зэнэкъокъоу «Адыгэ шъау» зыфиIорэм Гедыоджэ Налбый ящэнэрэ чIыпIэр къыщыдихыгъ.

Адыгэ шъуашэр зэгъэфагъэу щыгъ, дахэу зэрехьэ. Ады­га­бзэкIэ IупкIэу мэгущыIэ. Пщынэр къештэшъ, адыгэ орэдышъор «къырегъэпшIыкIу­тIукIы». Лъэпкъ шIэжь къэбархэм, культурэм, спортым къатегущыIэзэ, зэгъэпшэнхэр уегъэшIых. Адыгэ шэн-хабзэхэр щыIэныгъэм зэрэщыщхэм къыпкъырыкIызэ, шIушIагъэ зиIэм уасэ фешIы. Гедыоджэ Налбый зэнэкъокъоу «Адыгэ шъаор» бэмэ еджапIэ-зыгъэсапIэ афэ­хъугъэу елъытэ.

— Пщынаом пщынэр ыгъэбзэрабзэу зызэхэпхыкIэ гур рэхьатырэп, — еIо Налбый. – Зэнэкъокъум зыфэзгъэхьазырзэ Еутых Къадырхъан ипщынэ сызыIэпищагъ. Пщынэо цIэрыIо сыхъущтэу слъытэрэп, ау пщынэм нахь сыфэщагъэу сызэрэпсэущтым сицыхьэ телъ. ПщынэмкIэ цIыфхэм япIон плъэкIыщтыр бэ.

— Еутых Къадырхъан Аскъэлае культурэмкIэ и Унэ ипщынаохэм япащ. Пщынэр зышIогъэшIэгъонхэр гукIэ егъэдаIох, къы­зэрещалIэх, — къытиIуагъ культурэм и Унэ ихудожественнэ пащэу Уджыхъу Светланэ. — Гедыоджэ Налбый пщынэм фигъэсэным фэшI шIыкIэшIухэр псынкIэу къыгъотыгъэх.

— Пщынаом пщынэр ыгъэбзэрабзэ зыхъукIэ, пхъэкIычаом жъыур къегъэдахэ. КъэшъуакIор къашъом зыхилъасэкIэ, пчэгум зеушъомбгъу.

Гедыоджэ Налбый фестивалым изэхэщакIохэм, пщынаоу Еутых Къадырхъан, культурэм иIофышIэхэу IэпыIэгъу къыфэхъу­гъэхэм гъэзетымкIэ «тхьашъуегъэпсэу» ариIожьы шIоигъу. Полицием къулыкъур щихьызэ лъэпкъ искусствэм пылъынэу уахътэ къыхегъэкIы.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм Еутых Къадыр­хъан, Уджыхъу Светланэ, Ге­дыоджэ Налбый IофшIэгъэ дэ­гъухэмкIэ пэгъокIыхэ ашIоигъу. Аскъэлае цIыф цIэрыIуабэ къыдэкIыгъ, къуаджэм щытхъу къыфахьыгъ, ыцIэ лъагэу аIэ­тыгъ. Аскъэлае идэхагъэ яорэдхэм ащэжъынчы, якъашъохэм къащаIуатэ. Къадырхъан ипщынэ къедэIухэрэ адыгэ шъаохэм лъэпкъым инамыс къаухъумэщт, шэн-хабзэхэр агъэпытэщтых.

НэкIубгъор зыгъэхьазырыгъэр ЕмтIылъ Нурбый. Сурэтым итхэр: Еутых Къадырхъан, Гедыоджэ Налбый.