Мыекъопэ футбол клубэу «Зэкъошныгъэм» 2022 — 2023-рэ илъэс ешIэгъур бэдзэогъум и 24-м ригъэжьэщт. — Урысыем футболымкIэ изэ­нэкъокъоу ятIонэрэ купым щыкIощтым тыхэлэжьэщт, — къытиIуагъ «Зэкъошныгъэм» итренер шъхьаIэу ШакIо Ащэмэз. — Илъэс ешIэгъум шъупэгъокIызэ уплъэкIун зэIу­кIэ­гъухэр «Зэкъошны­гъэм» иIагъэх. — Краснодар, Хабаровскэ, нэмыкIхэм якомандэхэм таде­шIагъ. Зэфэхьысыжьхэм къахэзгъэщы сшIоигъу неущрэ мафэм телъытагъэу илъэс зэнэкъокъур «Зэкъошныгъэм» зэрэригъа­жьэрэр. — Непэ командэр къиныгъохэм ахэтэу олъыта? — ГумэкIыгъохэр тиIэх. «Зэ­къошныгъэм» ешIэкIуи 7 хэкIы­жьыгъ. — АцIэхэр къытфеIохэба. — Дыхъу Тимур, Далый Дауд, Даниил Седовыр, КIышъэ Залим, Альберт Богатыревыр, КIурачынэ Азэмат, Юсуф Артур. — Командэм кIэу шъу­штагъэхэр бэ мэхъуха? — Никита Лысенкэр тштагъэ. Адыгэ Республикэм футболымкIэ испорт еджапIэ зыщызыгъасэхэрэм ешIэкIуи 3 къахэтщы тшIоигъу. ЧIыпIэ футболыр къэIэтыгъэным тыпылъыщт. — «Зэкъошныгъэм» хэ­кIы­жьыгъэр бэ. Командэр зыпкъ итэу ешIэным фэ­хьазырэу олъыта? — НыбжьыкIэу тштагъэхэр «Зэ­къошныгъэм» хэгъозэнхэм, яIэпэIэсэныгъэ хагъэхъоным фэшI мэзэ заулэ ящыкIагъ. Арышъ, «Зэкъошныгъэм» апэрэ ешIэгъу­хэм текIоныгъэр къащимыхьы­гъэми, ешIакIохэр лъэшэу тымыгъэмысэхэ сшIоигъу. — Дахэу ешIэным, зэIу­кIэгъухэм текIоныгъэр къащыдихыным тыдэмыгуIэныр нахь тэрэзэу олъы­та? — Ары, сэлъытэ. Мыщ дэжьым ешIэгъухэр зэрэкIощтхэм ыкIи кIэухэу афэхъущтым уахэдэн фае. ЕшIакIохэм яIэпэIэсэныгъэ ха­гъэхъоным, командэм щызэгурыIонхэм пае уахътэ ящыкIагъ — ар ыпшъэкIэ къэсIуагъэм щы­хэзгъэунэфыкIыгъ. — «Зэкъошныгъэр» сыд фэдэ чIыпIа зыфэбэнэщтыр? — ЗэкIэми ауж тыкъинэщтэп – ащ сицыхьэ телъ. Апэрэ къе­кIокIыгъом ыуж тызыфэбэнэн тлъэкIыщт чIыпIэхэм татегущыIэ сшIоигъу. — Тигъэзетеджэхэм, «Зэ­къошныгъэм» къылъыплъэхэрэм сыда къяпIо пшIоигъор? — Футбол дахэ къэдгъэлъагъо, дгъэгушIохэ тшIоигъу. Стадионым къэкIонхэу, тиешIэгъухэм яплъынхэу, Iэгу къытфытеонхэу сыкъяджэ. — Ащэмэз, цIэ гъэшIэгъон уиI. Нарт эпосым щызэлъашIэ. Футболым уигугъу шIукIэ щашIынэу, «Зэкъошныгъэм» нахьыбэрэ тигъэгушIонэу Тхьэм тышъуфелъэIу. — Тхьауегъэпсэу. Къэбэртэе­-Бэлъкъарым сыкъыщыхъугъ, си­лъэныкъо гупсэ фэзгъэдэрэ Адыгэ Республикэм сигуапэу сыщэпсэу. Къэралыгъо гъэпсыкIэ иIэу Адыгеир зыщыIэр илъэси 100 зэрэхъурэм фэгъэхьыгъэ зэха­хьэ­хэм тахэлэжьэщт, тигъэхъа­гъэ­хэмкIэ республикэм ыцIэ спор­тым щытIэтыщт. — ИлъэсыкIэ зэнэкъокъур зэрежъугъажьэрэм фэшI тышъуфэгушIо. — Тхьауегъэпсэу.

Купым хэтхэр

1. «Зэкъошныгъ» Мыекъуапэ 2. «Динамо» Ставрополь 3. СКА Ростов-на-Дону 4. «Чайка» Песчанокопское 5. «Ессентуки» Ессентуки 6. «Спартак» Налщык 7. «Форте» Таганрог 8. «Биолог» Прогресс 9. «Ротор» Волгоград 10. «Алания-2» Владикавказ 11. «Кубань-Х» Павловское 12. «Мэщыкъу» Пятигорск 13. «Легион» Махачкала 14. «Черноморец» Новороссийск.

«Зэкъошныгъэм» иешIакIохэр

1. Антоненко Даниил 2. Iащэ Анзор 3. Васильев Владислав 4. Гъыщ ТIахьир 5. Датхъужъ Адам 6. Делэкъо Аскэр 7. Делэкъо Мурат 8. Къэрданэ Имран 9. Кириленко Илья 10. Ковалев Роман 11. Къонэ Амир 12. Крылов Денис 13. Лысенко Никита 14. Макоев Алим 15. Оразаев Ислъам 16. Пекъо Ислъам 17. Хьасанэкъо Амир 18. Хьачыр Тамерлан 19. ХъуакIо Руслъан 20. ХъуакIо Темыр 21. Шустов Никита 22. Шъхьэлэхъо Амир.

Пащэхэр

Абакумов Андрей — пресс-къулыкъум ипащ Пляскин Андрей — врач Аулъэ Рэщыд — клубым ипащ Бэлъкъар Азэмат — тренер Васильченко Максим — тренер ХъуакIо Къэплъан — директор шъхьаI ШакIо Ащэмэз — тренер шъхьаI.