Музеим щалъэгъурэр ащыгъупшэрэп
Гъэмэфэ зыгъэпсэфыгъо уахътэр гъэшIэгъонэу зыгъакIохэрэм, псауныгъэр зыгъэпытэхэрэм ащыщых Москва, Ленинград хэкум, нэмыкIхэм къарыкIыгъэхэр.
Бэдзэогъум и 10 – 11-м Адыгэ Республикэм и Лъэпкъ музей куп зэфэшъхьафхэр къэкIуагъэх. Тишъолъыр апэрэу зылъэгъухэрэр бэ мэхъух. Музеим иIофышIэу Мамырыкъо Саидэ адыгэ шэн-хабзэхэм яхьылIэгъэ къэбарэу къыIотагъэхэм уагъэгъуазэ.
Хъулъфыгъэм иунэ Iэшэ-шъуашэхэр, музыкальнэ Iэмэ-псымэхэр, адыгэ шъуашэр, джэгукIэхэм ащагъэфедэрэ пкъыгъохэр, нэмыкIхэри щыолъэгъух. Хъулъфыгъэм икъулайныгъэ, кIуачIэр зэрипсыхьэрэм, фэшъхьафхэм яхьылIагъэхэр тарихъым щыщых.
Пшъэшъэ унэр нэмыкIэу зэрэгъэпсыгъэм Москва щыщ пшъашъэр къыкIэупчIагъ. Пшъашъэр дышъэидэным фэщагъ. Тхыпхъэу ышIыхэрэр, лIакъом итамыгъэ, лъэпкъ шъуашэр зэрэхидыкIыхэрэр, лъэпкъ шъуашэр зэрихьаным зэрэфэгъэсагъэр, пхъэцуакъэм, цокъэ къызэрыкIом ятеплъэхэр зэрзэфэшъхьафхэм, пшъашъэм ихъупхъагъэ, нэмыкIхэм Мамырыкъо Саидэ IупкIэу къатегущыIагъ.
Ожъ Фатимэ музеим къыщагъэлъэгъорэ тарихъ пкъыгъохэм къапкъырыкIырэ гупшысэхэр узыIэпищэу къыIотагъэх. Адыгэ чIыгум ибаиныгъэ, идэхагъэ, чIыопсым изытет, шIуагъэ къэзытырэ пкъыгъохэу чIым къычIахыхэрэм, фэшъхьафхэм хьакIэхэр ащигъэгъозагъэх.
Надежда Бурмистровамрэ Хьакъунэ Маринэрэ музеим къычIахьэхэрэм апэгъокIых, къэгъэлъэгъонхэм кIэкIэу къатегущыIэх, цIыфхэм нахь ашIогъэшIэгъонхэр арагъэлъэгъух. Джэрз лIэшIэгъум ехьылIэгъэ тарихъ къэбархэм археолог цIэрыIоу Тэу Аслъан къатегущыIагъ. ШакIом икъэунэ, штаукIым хэшIыкIыгъэхэ щэбзащэхэм, етIэгъэжъагъэм хэшIыкIыгъэ лагъэхэр, къошынхэр, фэшъхьафхэри тарихъым щыщ пкъыгъох, ижъырэ адыгэхэм яех.
Москва къикIыгъэхэ пшъашъэхэм адыгэ чынэр апэрэу алъэгъугъ. Тэу Аслъан чынэ зэрешIэхэрэр аригъэлъэгъуи, музеим ищагу джэгупIэшхо къыщызэIуахыгъ. Адыгэ чынэр бжъэм, нэмыкIхэм ахэпшIыкIын зэрэплъэкIыщтым, чынэм ишъэфхэм А. Тэур зэгъэфагъэу къатегущыIагъ.
Сыбыр, Ленинград хэкум…
Адыгеим ичIыгу зэзыгъэлъэгъу зышIоигъохэу Сыбыр, Москва, Ленинград хэкум, нэмыкIхэм къарыкIыгъэхэм республикэм итарихъ нахьышIоу ашIэ хъугъэхэу ядэжьхэм агъэзэжьы. Сырфыбг ипсыкъефэхыпIэхэм, адыгэ чъыгхатэхэм, анахьэу адыгэ къужъхэм къакIэупчIэхэрэр хэпшIыкIэу нахьыбэ хъугъэх.
— ЗекIо Iофым Адыгеим зыщеушъомбгъу. Загъэпсэфызэ, япсауныгъэ агъэпытэзэ яшIэныгъи хагъахъо, — къытиIуагъ Адыгэ Республикэм и Лъэпкъ музей ипащэу Джыгунэ Фатимэ. — Iофтхьабзэу зэхатщэхэрэр япчъагъэкIэ нахьыбэ зэрэхъухэрэм дакIоу, гъэпсыкIэу яIэм изэхъокIыныгъэхэр фэтэшIых. Зыгъэпсэфыгъо мафэхэм музеим зэIукIабэ щэкIо.
Лъэпкъ музеим къэкIуагъэхэу Пырковхэм, Дудочкинхэм, Задоровхэм, Ковтуновхэм, Мальчиковхэм тхылъым къыдэтхагъэхэм къэгъэлъэгъонхэр лъэшэу агу зэрэрихьыгъэхэр къаIуатэ. Анахьэу къыхагъэщырэр нэм ылъэгъурэр гум къызэринэжьырэр, искусствэ лъагэм цIыфыр зэрипIурэр ары. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ зэIукIэгъухэр тапэкIи Лъэпкъ музеим игъэкIотыгъэу щыкIощтых. ЕмтIылъ Нурбый.