Ацумыжъ Адам текIоныгъэр къыдихыгъ
Президент платформэу «Урысыер — амалышIухэр зыIэкIэлъ къэралыгъу» зыфиIорэм игъэсэныгъэ проектэу «ТопБЛОГ-м» хэхьэрэ турэу «Твоя Осетия» зыфиIорэм блогерхэр хэлэжьагъэх.
Проектым ипресс-къулыкъу къызэритыгъэмкIэ, пстэумкIи къэралыгъом иблогер 24-рэ мыщ хэлэжьагъэх, ахэм нэбгырэ миллиони 5-м ехъу къэбархэмкIэ къызэлъаубыты. Темыр Осетием фэгъэхьыгъэ тхыгъэ 200-м ехъу блогерхэм тхьамафэм къыкIоцI социальнэ хъытыухэм къырагъэхьагъ.
Проектэу «ТопБЛОГ-м» едзыгъуитIу къызэлъиубытыгъ. Зы чIыпIэм нэбгыри 10 итэу зыщызэнэкъокъугъэхэм къыщыхахыгъэх президент платформэу «Урысыер — амалышIухэр зыIэкIэлъ къэралыгъу» зыфиIорэм иблогери 9-р ыкIи нэужым ахэр Темыр Осетием ичIыопс идэхагъэ къызыщыраIотыкIын алъэкIыщт чIыпIэхэм кIуагъэх.
Проектэу «ТопБЛОГ» зыфиIорэм иапэрэ уцугъо текIоныгъэ къыщыдахыгъ Юлия Бондаревам, Наталья Курганкинам ыкIи Виктория Введенскаям. Финалым ихьагъэх Ацумыжъ Адам, Дарья Олянчук, Ирина Баксановар ыкIи Алена Анденовар, финалныкъом нэсыгъэх Даниил Штокман ыкIи Ва-лерия Подковыровар.
Проектым къыдыхэлъытагъэу ащ хэлажьэрэ пэпчъ ыкIи командэхэм гъэцэкIэнхэр аратыгъэх. Зэнэкъокъум икIэуххэм къызэрагъэлъэгъуагъэмкIэ, Адыгеим илIыкIоу Ацумыжъ Адам текIоныгъэ къыдэзыхыгъэхэм ащыщ хъугъэ.
— ЗекIоныр лъэшэу сикIас, щыIэныгъэм илъэныкъо пстэуми ащ уафегъасэ. Мы Блог-турэу «Твоя Осетия» зыфиIорэр насыпыгъэу ыкIи амалышIоу сэркIэ зыфэсэлъэгъужьы, социальнэ хъытыухэм шIуагъэ къатэу зягъэушъомбгъугъэнымкIэ сиIэпэIэсэныгъэ хэзгъэхъуагъ, — къыIуагъ Ацумыжъ Адам.
Шъугу къэдгъэкIыжьын, Адам тревел-блогерэу зэрэщытым дакIоу, лъэпкъ ыкIи эстраднэ орэдхэр етхых, къеIох, Адыгеим изаслуженнэ артист, Урысыем итхакIохэм я Союз хэт, тарихълэжь-этнограф.
Зэнэкъокъум хэлажьэхэрэр нэбгырэ хырых зыхахьэрэ команди 4-у гощыгъагъэх. Проектым изэхэщакIохэм къаратырэ творческэ медиа-гъэцэкIэнхэр ашIыщтыгъэх. Ацумыжъ Адам зипэщэгъэ командэр (Юлия Бондаревар ыкIи Наталья Курганкинар хэтыгъэх) анахь «креативнэкIэ» алъытагъ.
«Твоя Осетия» зыфиIорэр проектым изэхэщакIохэм ащыщэу Мария Созыкинам 2020-рэ илъэсым ригъэжьэгъэ проектэу Удмуртием фэгъэхьыгъэм лъыпыдзагъэу хъугъэ.
— НыбжьыкIэ блогерхэм яшIуагъэкIэ Темыр Осетием икультурэ, ихабзэхэр, ишэн-зэхэтыкIэхэр цIыфхэм нахь зэлъашIагъ. Iофтхьабзэм иаужырэ мафэ ныбжьыкIэхэм къафэгушIуагъ ыкIи ирэзэныгъэ тхылъхэр къытитыгъэх Темыр Осетием — Аланием и ЛIышъхьэу Сергей Меняйло. Зэнэкъокъум хэлэжьагъэхэр зэкIэ медиа-форумэу «PRO-Кавказ» зыфиIорэм ригъэблэгъагъэх, — къыIуагъ зэхэщакIоу, ныбжьыкIэ организациеу «Атмосфера» зыфиIорэм итхьаматэу Мария Созыкинам.