Адыгэ къуаем ифестиваль къыригъэблэгъагъэх
Москва щыкIогъэ фестивалэу «Вкусы России» зыфиIорэм тишъолъыр зэрэхэлэжьагъэр АР-м и ЛIышъхьэу КъумпIыл Мурат къыIуагъ.
Мы Iофтхьабзэм Адыгеир хэлэжьэгъэ къодыеп, гъомылапхъэхэм яшъолъыр брендхэмкIэ апэрэ лъэпкъ зэнэкъокъум текIоныгъэ къыщыдихыгъ. 2020-рэ илъэсым едзыгъоу «На всю страну» зыфиIорэм хэлэжьагъ, анахь дэгъуищымэ ащыщ хъугъэ.
— Фестивалэу «Вкусы России» зыфиIорэм щагъэпсыгъэ чIыпIэм къекIолIагъэхэр Адыгеим къэкIонхэу къысшIошIы. Тиреспубликэ ихьакIэхэр тэгъэлъапIэх, дахэу тапэгъокIы. ШышъхьэIум ыкIэм адыгэ къуаем ифестивалэу щыIэщтым зэкIэми шъукъесэгъэблагъэ. Адыгэ къуаем иIэшIугъэ зэхэшъушIэн, ар зэрэрахырэр зэжъугъэлъэгъун шъулъэкIыщт. Ар IэшIу закъоу щымытэу, псауныгъэмкIи шIуагъэу пылъыр бэ. Тикультурэ, титарихъ, тишэн-хабзэ ар щыщ, — еIо КъумпIыл Мурат.
Шъугу къэдгъэкIыжьын, Дахъо гъэхъунэм дэжь мыгъэ фестивалыр щызэхащэщт. ПэшIорыгъэшъэу зэрагъэнафэрэмкIэ, шышъхьэIум и 26 — 27-м ар рагъэкIокIыщт.
Фестивалыр зэрифэшъуашэу зэхащэнэу, программэ гъэшIэгъон, ермэлыкъ зэфэшъхьафхэр, адыгэ къуаем иIэшIугъэ арагъэуплъэкIуным фытегъэпсыхьэгъэ Iофтхьабзэхэр къыдэлъытэгъэнхэу республикэм ипащэ пшъэрылъ къафишIыгъ. Джащ фэдэу щынэгъончъэным ыкIи автомобиль уцупIэхэм ягъэпсын яIофыгъохэри зэшIуахынхэу къафигъэпытагъ.