МэфэкIым исурэтхэр
Адыгэ Республикэм культурэмкIэ и Министерствэ исурэт къэгъэлъэгъуапIэ бэдзэогъум и 21-м зэхахьэ щыкIощт.
Къэугупшысыгъэ ыкIи бгъэфедэн плъэкIыщт искусствэмкIэ Адыгэ Республикэм щыкIогъэ зэнэкъокъум икIэуххэр зэфахьысыжьыгъэх. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ехьылIэгъэ зэнэкъокъум сурэтышIхэр чанэу хэлэжьагъэх.
Живописым, графикэм, бгъэфедэн плъэкIыщт искусствэм афэгъэхьыгъэу зэхащэгъэ зэнэкъокъум сурэтышIхэм яIэпэIэсэныгъэ къыщагъэлъэгъуагъ. Урысыем исурэтышIхэм я Союз хэтэу Сулейманова Фатимэ осэшI купым пэщэныгъэ дызэрихьагъ.
Бырсыр Абдулахь, Ирина Бредихинам, Гъогунэкъо Мурат зэнэкъокъум апэрэ чIыпIэхэр къыщыдахыгъэх. ХагъэунэфыкIырэ чIыпIэхэр зыфагъэшъошагъэхэм ащыщых Хъуажъ Рэмэзан, Борис Воронкиныр, Елена Абакумовар, Къуанэ Аслъан, нэмыкIхэри.
ЩытхъуцIэхэр къыдэзыхыгъэхэм шIухьафтынхэр аратыжьыщтых. Сурэтхэм якъэгъэлъэгъон бэдзэогъум и 21-м къыщегъэжьагъэу шышъхьэIум и 14-м нэс Мыекъуапэ щыкIощт.