Нэхэе Аслъан: «ПсэупIэп тшIырэр, щыIэныгъэр тэгъэпсы»
![Image description](images_upload?image_name=2022/07/photo_2018-03-21_16-01-03__yeoetrz.jpg)
Мы мафэхэм июбилей хигъэунэфыкIыгъ Урысыем, Адыгеим ыкIи Пшызэ шъолъыр язаслуженнэ псэолъэшIэу, «Краснодарская-1» зыфиIорэ хъызмэтшIапIэм ипащэу, Краснодар икъэлэ Думэ идепутатэу, экономикэ шIэныгъэхэмкIэ кандидатэу Нэхэе Аслъан.
Ар бэдзэогъум и 13-м 1957-рэ илъэсым Теуцожь районым ит къуаджэу Пэнэжьыкъуае къыщыхъугъ. Ятэ, Нэхэе Юсыф, Теуцожь райком комсомолым иапэрэ секретарыгъ, нэужым сельпом итхьамэтагъ, совхозым ипащэ игуадзэу Iоф ышIагъ. Янэу Нурыет къыгъэшIагъэм инахьыбэм къоджэ тхылъеджапIэм Iоф щишIагъ. Специалист къызэрыкIоу щыригъажьи, пэщэ IэнатIэм нэсыгъагъ, АР-м культурэмкIэ изаслуженнэ IофышI.
Аслъан зэшищымэ анахьыжъ. ИцIыкIугъом къыщегъэжьагъэу кIэу зыгорэ зэригъэшIэныр икIасэщтыгъ, еджэныр шIу ылъэгъущтыгъ, анахьэу хьисапыр, физикэр, химиер дэгъоу ышIэщтыгъэх, ахэмкIэ олимпиадэхэм ахэлажьэщтыгъ. А зэпстэумэ адакIоу спортыми пылъыгъ, зэнэкъокъухэм ахэлэжьэнэу игъо ифэщтыгъ.
— КIэлэегъэджэ дэгъухэр сиIагъэх, — еIо Аслъан, еджэныр шIу зэрилъэгъущтыгъэр ахэм зэряшIушIагъэм къыкIигъэтхъызэ. — ЛIыхъурэе Хъаные хьисапымкIэ тыригъаджэщтыгъ. Хэгъэгу зэошхом иветеранэу ЛIыхъурэе Аюбэ тарихъымкIэ тикIэлэегъэджагъ, тикласс ипэщагъ. КIэлэегъэджэ дэгъугъэх физикэмкIэ тезыгъаджэщтыгъэ Артем Карагезян, физкультурэр тэзгъэшIыщтыгъэ Бэрэтэрэ Хьисэ. Ахэм шIэныгъэу къытатыгъэр ары нэужым еджэныр лъыдгъэкIотэнымкIэ зишIуагъэ къытэкIыгъэр.
Аслъан псэолъэшI сэнэхьатым ицIыкIугъом къыщегъэжьагъэу кIэхъопсыщтыгъ. Илэгъу шъэожъыехэр космонавт е мэшIогъэкIуасэ хъущтхэу аIощтыгъ, ежь унакIэу ашIырэм еплъэу, чырбыщыр зэтезылъхьэрэм «волшебник» шIошIэу лъыплъэу сыхьатыри щытын ылъэкIыщтыгъ. Ащыгъум адыгэ къоджэ шъэожъые цIыкIур хэгъэгум щызэ- лъашIэрэ псэолъэшIхэм ащыщ хъуным егупшысэщтыгъэп.
Гурыт еджапIэр къызеухым сыд фэдэ факультети чIэхьан амал иIагъ, дэгъу дэдэу зэреджагъэр къэзыушыхьатырэ тхылъыр ыIыгъыгъ, ау ицIыкIугъом къыщыублагъэу зыфалIэрэ псэолъэшI сэнэхьатым блэкIыгъэп. Ащыгъум мэкъумэщ институтэу, джы университет, Краснодар дэтым псэолъэшIынымкIэ факультет апэрэу къыщызэIуахыгъагъ, джащ Аслъан итхылъхэр ритыгъэх, зыпари пэрыохъу къыфэмыхъоуи чIэхьагъ.
Еджэным шIулъэгъоу фыриIэр ащи щылъигъэкIотагъ. КIэу ишIэныгъэ къыхахьэрэр псынкIэу къыубытыщтыгъ, анахь дэгъоу еджэхэрэм ащыщыгъ. ЗэхэщэкIо чанэу зэрэщытыми къыдеджэхэрэм псынкIэу гу къылъати, апэ купым, нэужым курсым япащэу ашIыгъ. Ащ фэдиз Iоф зыпшъэ илъ кIалэм спортыр чIидзыгъэп, дзюдом, самбэм апылъыгъ, зэнэкъокъухэм апэрэ чIыпIэхэр къащихьыщтыгъ. ЕтIани, Аслъан дахэу Кавказ ис лъэпкъхэм якъашъохэр къышIыщтыгъэх.
— Общественнэ Iофыр сыдигъокIи къысфэкъиныгъэп. Чешскэ «Татрэм» (ар ижъыкIэ Чехием къыщашIыщтыгъэ автомашин) сыфэд сэ. Ар зыпари имылъэу нэкIэу щэтыфэкIэ ылъакъохэр зэблэухэзэ мэчэрэгъух, заушъэкIэ дахэу къекIокIых, — мэщхы Аслъан.
Аслъан непэ лъэгапIэу зытетым нэсыным пае гъогу псынкIэп къыкIугъэр. 1980-рэ илъэсхэм акIэм псэолъэшI организациехэм япащэхэм техникэр пыутэу ащэжьыти, цIыфхэр лэжьапкIэ ямыIэу къагъанэщтыгъэх. Аслъан зэхъокIыныгъэхэм къагъэщтагъэп. ПсэолъэшI сэнэхьатым хэшIыкI ин фызиIэ цIыфхэр гъусэ ышIыхи IофшIэныр лъигъэкIотагъ. Сыд фэдэрэ псэолъэшIын е гъэцэкIэжьын IофшIэни аштэщтыгъ, шапхъэхэм адиштэу зыфэгъэзагъэхэр ашIыным, игъом атыным Аслъан ынаIэ тыригъэтыщтыгъ. Ащ фэдэу IофшIэныр шIу зэрилъэгъурэм, щэIагъэу иIэм яшIуагъэкIэ хъызмэтшIапIэр а охътэ къинхэм къахищыгъ. Арэу щытыми, арэп ежь зэрыгушхорэр, цIыфэу къыгоуцуагъэхэр, янэ-ятэу сыдигъокIи кIэгъэкъон къыфэхъугъэхэр ары.
Нэхэе Аслъан зипэщэ АО-у «Краснодарская-1» зыфиIорэм субъектымкIи, цIыфхэмкIи мэхьэнэшхо зиIэ псэолъэ зэфэшъхьафыбэ Краснодар краимрэ Адыгеимрэ ащигъэуцугъ. ЗэкIэми ацIэ къеIогъуай, ау… ГущыIэм пае, Тэхъутэмыкъое районым щылажьэрэ хъызмэтшIапIэхэу жъы хъугъэ пленкэм икIэрыкIэу нэмыкI пкъыгъохэр зыщыхашIыкIыжьырэр, IэшIу-IушIухэр къызщашIыхэрэр зычIэтхэр зиIэшIагъэр «Краснодарская-1-р» ары.
Джащ фэдэу псэупIэ комплексышхохэу «Москва», «Арбат», «Кутузовский» зыфиIохэрэр, Краснодар краим истанциеу лъыр зыщатырэр, краим и Северскэ район къыщызэIуахыгъэ ныбжьыкIэ лагерэу «Дубрава» зыфиIорэр, Курганинскэ районым истаницэу Родниковскэм щагъэпсыгъэ реабилитационнэ Гупчэр зычIэт унэхэр, нэмыкIыбэхэр Нэхэе Аслъан зипэщэ предприятием ышIыгъэх. Социальнэ, промышленнэ е мэкъумэщ хъызмэт псэуалъэу квадратнэ метрэ мин 250-м ехъу, псэупIэ квадратнэ метрэу миллионым ехъу зэкIэмкIи Адыгеим, Краснодар краим ыкIи Тверской хэкум ащагъэуцугъ.
Аслъан игугъу къызыпшIыкIэ ар зыпарэми фэмыдэу, ыныбжь къыхэмыщэу, энергие мыухыжь зиIэ цIыф зэIухыгъэу зэкIэми къаIо. Чэщ-зымафэм зэшIуихынэу ащ ыкIуачIэ къыхьырэм фэдиз зыукIочIынэу щыIэр макIэ. Адыгеимрэ Пшызэ шъолъыррэ гъэхъагъэу ащишIыгъэр зэкIэри къэIогъуай. Тынэу, цIэ лъапIэу къылэжьыгъэр зы тхылъ дэгъу хъущт… Ащ фэдиз зы щыIэныгъэ гъогу цIыфым щишIэн елъэкIы…
«Аслъан гукIэгъушхо хэлъ, цIыфхэр шIу елъэгъу» аIо Пшызэ шъолъырымрэ Адыгеимрэ ащыпсэоу ишIуагъэ зэригъэкIыгъэхэм. Ащ фэдэу шIу зыфишIагъэу е зэриIуагъэхэм япчъагъэ макIэу пIон плъэкIыщтэп. Анахьэу нэжъ-Iужъхэмрэ сабыйхэмрэ ынаIэ зытетыр. Ветеранхэм яIофхэм афэгъэзэгъэ организациехэм лъэшэу адеIэ, кIэлэцIыкIухэм, зипсауныгъэ пыч фэхъугъэхэм апае зэхащэгъэ фондэу ишIуагъэ зэригъэкIыгъэр зэп ыкIи тIоп. Краснодар инароднэ хорхэм ащыщэу «Любаша» зыфиIорэм хэтхэр къызэрэфэразэхэр къагъэшъыпкъэжьыным, гуапэ щагъэхъуным пае адыгабзэкIэ орэд зэрагъэшIагъэу къаIо. Къызщыхъугъэ Теуцожь районым ит саугъэтхэм ягъэкIэжьыни ащ иIахьышхо хилъхьагъ.
Джа зэкIэмэ адакIоу спортым джыри пылъ.
— Футболыр, волейболыр, теннисыр сикIасэх, — мэщхы Аслъан.
— Илъэс 25-рэ хъугъэу, мэфэку мафэ къэс футбол сешIэ. Тикомандэ бэшIагъэ зызэхэхьагъэр, къулыкъу зэфэшъхьафхэм, хъызмэтшIапIэхэм япащэх нахьыбэу хэтыр, ау футболым зэкIэри зэфэдэ ешIы. Зы нэбгырэ ащыщ ушъхьагъу горэ къымыгъотэу, Iофэу яIэр зэкIэ чIадзышъ, футбол ешIэнхэу мэфэку къэс къэкIох Аслъанрэ ишъхьэгъусэу Гощнагъорэ шъаорэ пшъашъэрэ зэдапIугъ. Байзэт ятэ илъагъо теуцуагъ, ар псэолъэшI. Фатимэ медицинэм ылъэныкъокIэ зигъэзагъ, неврологэу Iоф ешIэ, Краснодар краим имедицинэ колледж ипащ, медицинэ наукэхэмкIэ кандидат. Къорэлъфэу ыкIи пхъорэлъфэу Аслъан тфы иI. Ахэм ыпсэ зэрахэтIагъэм, ашIоигъор афишIэмэ гухэхъо-шхо зэрэхигъуатэрэм емызэщэу къытегущыIэн ылъэкIыщт.
Сыда цIыфэу шIу ылъэгъурэ сэнэхьатым илъэгапIэхэм анэсыгъэм, зиунагъо насып илъым узэрэфэлъэIощтыр? Джащ тетэу сыдигъокIи насыпышIонэу, ыгукIэ чэфынэу, иIофшIэн гъэхъагъэу щишIыхэрэм ахэхъо зэпытынэу фэтэIо.
ХЪУЩТ Зар.