Гупшысэр лъэхъаным епхыгъ
Къаугупшысыгъэ искусствэхэр портретхэм къащыгъэлъэгъонхэм афэгъэхьыгъэ Iофтхьабзэр Мыекъуапэ щызэхащагъ.
Адыгэ Республикэм культурэмкIэ и Министерствэ исурэт къэгъэлъэгъуапIэ живописым, графикэм, скульптурэм, бгъэфедэн плъэкIырэ искусствэм яхьылIэгъэ IофшIэгъэ 80 фэдиз щытлъэгъугъ. Къыблэм исурэтышI 37-мэ яIэпэIэсэныгъэ анахьэу къыхэдгъэщырэр цIыфым ипсэукIэ, щыIэныгъэр сурэтхэмкIэ IупкIэу къызэрэтлъагъэIэсырэр ары. А. Къуанэм МэщэбшIэ Исхьакъ тырихыгъэ сурэтым «ТхакIом игупшысэхэр» фиусыгъ. И. МэщбашIэр чIыопсым хаплъэ, гукIэ зылъыIэсырэр тхьапэм ригъэкIущтэу тэлъытэ. ЦIыф цIэрыIохэу Тхьабысым Умарэ, Шъэожъ Розэ, Къуекъо Налбый, Нэгумэ Шорэ, нэмыкIхэм ясурэтхэр лъэгъупхъэх. Апашъхьэ ущытэу ящыIэныгъэ уфызэплъэкIыжьы. Бырсыр Абдулахь иIофшIагъэу Беданыкъо Муталибэ фэгъэхьыгъэр 1985-рэ илъэсым ышIыгъ. А лъэхъаным щыIэныгъэм еплъыкIэу фыриIагъэр непэрэ уахътэм къырипхыжьы шIоигъоу А. Бырсырым зэгъэпшэнхэр ешIых. IофшIэным ицIыф ынэгу зэIухыгъэу нэплъэгъум ит.
Бырсыр Абдулахьрэ общественнэ IофышIэшхоу МэщфэшIу Нэдждэтрэ сурэтхэм яплъыхэзэ язэдэгущыIэгъу къыушыхьатыгъэр исэнэхьат фэшъыпкъэр имурадхэм нахьышIоу афэкIон зэрилъэкIырэр ары.
М. Тыгъужъым исурэтхэу «Адыиф», «Къызбэч» зыфиIохэрэр лъэпкъым ифольклор, итарихъ щыщых. Къызбэч шыу блан, дахэу фэпагъэ, уегъэгушхо. Адыиф исурэт уеплъызэ, гъыбзэ орэдэу къыфаIорэр, шым тес псэлъыхъом ыгу ихъыкIырэр гум «щэчэрэгъух». ШIулъэгъу къабзэм зэфищагъэх, ау янасып зыдалъэгъужьынэу уахътэ къякIугъэп…
М. Гъогунэкъом иIэшIагъэу «Поэмэм икъэхъукIэ» гъашIэм жъы щыхъурэп. Бзылъфыгъэм, хъулъфыгъэм ящыIакIэ епхыгъэ едзыгъохэр, щагум дэт былымхэр къегъэлъагъох. Р. Хъуажъым текIоныгъэр къыдэзыхыгъэм исурэт пхъэм хишIыкIыгъ. ЛIыхъужъныгъэм цIыфыр зэрипIурэр IофшIагъэм IэшIэхэу къыхэогъэщы.
Т. Къатым, Э. Овчаренкэм, Б. Воронкиным, А. Манакьян, А. Хьапыщтэм, В. Баркиным, В. Ждановым, А. Шекоян, Г. Бжьэумыхъум, фэшъхьафхэм ятворчествэ гум рехьы. Фондым къыхахыгъэ IофшIагъэхэр бэдзэогъум и 17-м нэс Мыекъуапэ къыщагъэлъэгъощтых.