«Таврида.АРТ» зыфиIорэм зыфагъэхьазыры
Фестивалэу «Таврида.АРТ» зыфиIорэр шышъхьэIум и 15-м къыщегъэжьагъэу и 19-м зэхащэщт.
Хабзэ зэрэхъугъэу, Iофтхьабзэр Республикэу Къырым щыкIощт. КультурэмкIэ, искусствэмкIэ ыкIи креативнэ индустриемкIэ лъэныкъо зэфэшъхьафхэм афэгъэзэгъэ арт-еджэпIэ 20 ащ зэрипхыщт.
Лъэпкъ проектэу «Гъэсэныгъэм» ишъолъыр проектэу «Развитие системы поддержки молодежи «Молодежь России» зыфиIорэм къыдыхэлъытагъэу фестивалыр зэхащэ.
Мы илъэсым ар яплIэнэрэщт. Урысыем ишъолъыр зэфэшъхьафхэм къарыкIыгъэ ныбжьыкIэхэр ащ щызэрэугъоищтых, шIэныгъэу, опытэу аIэкIэлъымкIэ зэдэгощэщтых. Музыкант ныбжьыкIэхэм ягъусэхэу орэдыIо цIэрыIохэу Баста, Лолитэ ыкIи нэмыкIхэр Iофтхьабзэм хэлэжьэщтых.
ЗэрагъэнафэрэмкIэ, шышъхьэIум и 16-м Баста, и 17-м Лолитэ орэдхэр къаIощтых. Джащ фэдэу UMA2RMAN, Ваня Дмитриенкэм, Александр Панайотовым, ST, Burito, Александр Ивановым ыкIи купэу «Рондо» зыфиIорэм якъэгъэлъэгъонхэм шIоигъоныгъэ зиIэхэр яплъынхэ алъэкIыщт. Ащ дакIоу модэм ифестиваль, театрэхэм, командэу КВН-м, ежь зэхалъхьэгъэ орэдхэм якъэIон, спортым, гъэсэныгъэм япхыгъэ Iофтхьабзэхэм ахэлэжьэнхэ амал яIэщт.
Фестивалэу «Таврида.АРТ-м» еплъы зышIоигъохэр бэдзэогъум и 15-м нэс «tavrida.art» зыфиIорэм зыщатхынэу щытыгъ. ЫпкIэ хэмылъэу шоу 300 фэдизмэ, къэгъэлъэгъон зэфэшъхьафхэм, урыс культурэм зыкъегъэIэтыжьыгъэным фэгъэхьыгъэ Iофтхьабзэхэм ахэр яплъынхэ амал яIэщт.
Пшъэрылъ шъхьаIэу зэхэщакIохэм зыфагъэуцужьыгъэр форумым къырагъэблэгъэрэ ныбжьыкIэхэр нэIуасэ зэфэхъунхэр, шIэныгъэу, опытэу аIэкIэлъымкIэ зэдэгощэнхэр, цIыф цIэрыIохэм гущыIэгъу афэхъунхэр, зэхахыгъэр нэужым яIофшIэн щыпхыращыным фэгъэсэгъэнхэр ары.