Мыекъопэ гандбол бзылъфыгъэ командэу «АГУ-Адыифым» 2022 — 2023-рэ илъэс зэнэкъокъум зыфегъэхьазыры.

— Суперлигэм командэ 13 щызэдешIэщт. 2021 — 2022-рэ илъэс зэнэкъокъум аужырэ чIыпIэр къыщыдэзыхыгъэ «Уфа-Алиса» зыфиIорэр суперлигэм ха­гъэкIыгъ, — къытиIуагъ «АГУ- Адыифым» итренер шъхьаIэу, Урысыем изаслуженнэ тренерэу Александр Реввэ.

— Китаим икомандэу «Феникс» зыфиIорэр, «Балтийская Заря» Санкт-Петербург суперлигэм къызэрэхэхьагъэхэм сыда къяпIолIэщтыр?

— «Фениксыр» Москва ще­шIэщт. Китаим тыкIон ищыкIагъэп. Санкт-Петербург иклуб хэгъэгум изэнэкъокъоу апэрэ купым щыкIуагъэм къыхэкIыгъ. — Суперлигэр купитIоу гощыгъэу 2021 — 2022-рэ илъэс зэнэкъокъум шъухэлэжьагъ. ИшIуагъэ къэ­кIуагъа?

— Урысыем гандболымкIэ и Федерацие командэхэм ялъэIу­хэр къыдилъытэхи, нахьыпэкIэ тызэрешIэщтыгъэм фэдэу зэнэкъо­къур зэхищэнэу унашъо ышIыгъ. Суперлигэр мыгощыгъэу командэхэр зэдешIэщтых. КупитIоу тызэрагощыгъагъэм ишIуагъэ къэкIуагъэп.

— «АГУ-Адыифым» хэта хэкIыжьыгъэр?

— Ар упчIэ шъхьаIэхэм ахэсэ­лъытэ. Алина Морозовар, Юлиана Скнарь «Кубань» Краснодар аштагъэх. КъэлэпчъэIутэу Дарья Ламзинар дэгъоу ешIэщтыгъ, ау гандболым хэкIыжьынэу рихъу­хьагъ. Унагъо ихьанэу зигъэхьазырыгъ. Маргарита Дмитриевар гандболым хэкIыжьы. — Хэта къежъугъэблэгъа­гъэр?

КъэлэпчъэIутэу Регина Якуповар, 2021 — 2022-рэ илъэс зэнэ­къокъум къэлапчъэм Iэгуаор гъогогъуи 127-рэ дэзыдзагъэу Екатерина Голуновар клубэу «Адыифым» тштагъэх. ТIури «Уфа-Алисэм» щешIэщтыгъэх. Элина Сиднинар «Динамо» Волгоград къыхэтщыгъ, ыпэкIэ щешIэ.

— Александр, зэхъокIыныгъэхэр зэдгъапшэхэ тшIоигъу. «Адыифыр» нахь пытэ хъугъа?

— СшIэрэп. Зэнэкъокъум къы­гъэлъэгъощт зэхъокIыныгъэхэм яшIуагъэу къэкIощтыр.

— «Адыифыр» иешIакIэ лъыхъун, сэнаущыгъэ зы­хэлъ ныбжьыкIэхэр «Адыиф-2-м» къыхищынхэ фаеу зылъытэрэмэ адеогъашта?

— Адезгъаштэ сшIоигъу. ГандболымкIэ спорт еджапIэ тиI, кIэлэ­цIыкIухэр, ныбжьыкIэхэр щытэгъа­сэх. Ахэр арых тигугъапIэхэр.

— Гандболым хэгъоза­гъэхэу опыт ин зиIэхэр къежъугъэблэгъэнхэу шъуе­гупшыса?

— «Адыифыр» ауж къинэрэ клубхэм ащыщ. Опыт ин зиIэ ешIакIо Мыекъуапэ къебгъэблэгъэныр къин. Тиамалхэр къыдэтэлъытэх…

— Пшъэрылъ гъэнэфагъэ шъуиIэу илъэсыкIэ ешIэгъум шъухэлэжьэщта?

— Апэ ит команди 8-мэ тахэфэным тыфэбэнэщт.

— Зэнэкъокъур сыдигъо ежъу­гъэжьэщт?

— Iоныгъом и 10-м «Луч» Москва Мыекъуапэ тыщыIукIэнэу щыт. Джырэ уахътэ стадионым, Мыекъуапэ имэзыжъыехэм, спорт псэуалъэхэм «Адыифым» защегъэхьазыры. ЕшIакIохэм кIуачIэр апсыхьэ.

— Мэшэлахь. Мыекъуапэ жьыр щыкъабз, чIыопсыр дахэ, къушъхьэпсхэм гур къаIэты.

— Адыгеир шъолъыр гъэшIэгъон, зыщыпсэурэ чIыпIэр дахэшъ, дэхэ дэд. ЗекIо къакIохэрэм, хьакIэхэм типсэукIэ ашIогъэшIэгъон. Республикэм, клубэу «Адыифым» спортсмен цIэрыIуабэ щагъэсагъ. Адыгеим и ЛIышъхьэу КъумпIыл Мурат тызыIокIэм, тимурадхэм игъэкIотыгъэу татегущыIагъ. «Адыифым» хэхъоныгъэ­хэр ышIынхэм тишъыпкъэу Iоф дэтшIэщт. Джэнчэтэ СултIан лъап­сэ зыфишIыгъэ гандбол клубым ишэн-хэбзэшIухэр къэIэтыжьыгъэнхэм тыпылъ.

— Спартакиадэр апэрэ ушэтыпIэ шъуфэхъущт.

— ШышъхьэIум и 20 — 29-м Урысыем и Спартакиадэ тыхэлэжьэщт. ЕгъэжьэпIэшIум лъэпсэшIу щытшIы тшIоигъу.

— Шъуимурадхэр къы­жъу­дэхъунхэу шъуфэтэIо.

— Тхьауегъэпсэу.