Апшъэрэ купым щешIэщт
Мыекъопэ баскетбол командэу «Динамо-МГТУ-м» 2022 – 2023-рэ илъэс ешIэгъум зыфегъэхьазыры.
— Зыгъэпсэфыгъо мафэхэм ауж командэр тыугъоижьыгъ, — къытиIуагъ «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Андрей Синельниковым.
Урысыем и Кубок къыдэхыгъэным фэгъэхьыгъэ ешIэгъухэр Iоныгъо мазэм рагъэжьэщтых.
2021 – 2022-рэ илъэс зэнэкъокъум «Динамо-МГТУ-р» суперлигэм щешIагъ, ятфэнэрэ чIыпIэр къыдихыгъ. Мыгъэ купым ыцIэ зэблахъугъ, «Апшъэрэ куп» фаусыгъ. ПэшIорыгъэшъэу зэнэкъокъум изэхэщакIохэм къызэраIуагъэмкIэ, команди 9 зэдешIэщт.
«Динамо-МГТУ-м» зэхъокIыныгъэу иIэр бэп. П. Сизовыр хэкIыжьын имурад. А. Гапошиныр, В. Чичайкиныр, И. Александровыр, нэмыкIхэу опыт зиIэхэр командэм къыхэнэжьыгъэх. НыбжьыкIэхэу Д. Гороховым. М. НатIэкъом, фэшъхьафхэм яIэпэIэсэныгъэ хагъахъо, илъэс ешIэгъум зыфагъэхьазыры.