Программэу «При­оритет-2030» зыфи­­Iо­рэм тегъэпсыхьагъэу Адыгэ къэралыгъо университетым ихэ­хъо­ныгъэкIэ ама­лэу щыIэхэм атегущыIагъэх Адыгеим и ЛIышъхьэу КъумпIыл Муратрэ гъэIорышIэнымкIэ Московскэ еджапIэу СКОЛКОВО обще­ственнэ стратегиемкIэ и Институт идирек­торэу, профессорэу Андрей Волковымрэ. Адыгэ къэралыгъо уни­верситетым ирек­торэу Мамый Даутэ зэдэгущыIэгъум хэлэжьагъ.

Республикэм и ЛIышъхьэ зэIукIэгъур къызэIуихызэ къызэрэхигъэщыгъэмкIэ, апшъэрэ гъэсэныгъэм хэхъоныгъэ егъэшIыгъэным республикэм ифедэ хэлъ ыкIи ренэу ынаIэ ащ тырегъэты. Республикэм отраслэ пстэухэмкIи шIэныгъэ куу зиIэ кадрэхэр ищыкIагъэх ыкIи Адыгеим иапшъэрэ еджапIэхэм —Мыекъопэ къэралыгъо технологическэ университетымрэ Адыгэ къэралыгъо университетымрэ — пшъэрылъхэм язэшIохынкIэ ренэу гъусэныгъэ адытиI.

«Республикэм иапшъэрэ еджа­пIэхэр кIэщакIо зыфэхъухэрэ Iофтхьабзэхэу апшъэрэ гъэсэны­гъэм хэхъоныгъэ егъэшIыгъэ­ным епхы­гъэу щытхэм тэ аде­тэгъаштэ. Стратегическэ акаде­мическэ пэщэныгъэмкIэ «Приоритет-2030» зыфиIорэ программэм Адыгэ къэралыгъо университетыр зэрэхэлажьэрэм джыри нахь зиушъомбгъунымкIэ ыкIи иамалхэм ахэхъонымкIэ лъэшэу ишIуагъэ къекIыщт, ау ащ дакIоу гъэсэныгъэм ылъэныкъокIэ къэуцурэ къэралыгъо пшъэрылъхэр пхырыщыгъэнхэмкIэ пшъэдэкIыжь инэуи ар щыт. Мамый Даутэ пэщэныгъэ дызэрихьэзэ сэнаущыгъэ зыхэлъ математикхэр къыхэгъэщыгъэнхэм ыкIи ахэм IэпыIэгъу ятыгъэным исистемэ гъэнэфагъэ гъэцэкIагъэ мэхъу. Ау мыщ дэжьым къыхэгъэщы­гъэн фае, университетым а лъэныкъомкIэ амалэу иIэхэр зэри­гъэфедэ­хэрэм имыза­къоу, кIэлэегъэджэ кадрэхэм ягъэхьазырын фыриIэ екIолIакIэри къы­гъэнэжьынэу щыт», — къыIуагъ КъумпIыл Мурат.

Программэу ыпшъэкIэ зигугъу къэтшIыгъэм зэрэхэлажьэрэм ишIуагъэкIэ Адыгэ къэралыгъо университетым амалыкIэу къы­IэкIэхьан ылъэкIыщтхэр Андрей Волковым къыгъэнэфагъэх.

«Мы программэм хэгъэгум иапшъэрэ еджэпIэ анахь дэгъу­хэр ыкIи гугъэпIэ инхэр къэзытыхэрэр хэлажьэх, шъо­лъырхэм яапшъэрэ еджа­пIэхэмкIэ псын­кIагъоп а Iофыр, сыда пIомэ, шэпхъэ лъагэу щыIэхэм къапкъырыкIыхэзэ ахэм уасэ араты. НепэкIэ тызэсэжьыгъэу щытыбэмэ икIэрыкIэу тахэплъэ­жьын фаеу мэхъу ыпэкIэ тылъыкIотэным пае. Сэ Адыгэ къэралыгъо университетым анахь лъэшэу сыгу рихьэу сынаIэ зыкIытесыдзагъэр хьисап еджапIэу иIэр зынэсыгъэ лъэгапIэр зэрэ­иныр ары. ХэгъэгумкIэ математическэ гъэсэныгъакIэр университетым истратегие шъхьа­Iэу зыхъукIэ, ар университетымкIэ амал гъэ­шIэгъонэу хъущт, шIуагъэу иIэри щыIэныгъэм щыпхырыщыгъэн фаеу пшъэрылъ къэуцущт», — къыIуагъ Андрей Волковым.

Адыгэ къэралыгъо университетым иректорэу Мамый Даутэ программэм тегъэпсыхьагъэу апшъэрэ еджапIэм зэшIуихырэ Iофыгъохэм афэгъэхьыгъэу къы­Iотагъ. 2030-рэ илъэсым нэс Адыгэ Республикэм социальнэ-экономикэ хэхъоныгъэу ышIыщтым и Стратегие щыгъэпытэжьыгъэ хъугъэ инициативэ­хэм адештэх университетым фэхъурэ зэхъокIыныгъэхэм ялъэныкъо шъхьаIэхэр. Ахэр зэкIэ зэпхыгъэхэр хэгъэгумрэ шъолъырхэмрэ инновационнэ экосистемэмкIэ яIофшIэн шIуагъэу къытырэм джыри нахь хэгъэхъогъэныр ары.

Джыри мэхьанэшхо зиIэу щытыр кIэлэегъэджэ кадрэхэр къэгъэхьазырыгъэнхэр ыкIи гъэсэныгъэм илъэныкъо пстэуми инновационнэ методическэ ушэтынхэр ащызэхэщэгъэнхэр ары.

АР-м и ЛIышъхьэ ипресс-къулыкъу