Адыгэ Республикэм и Мафэхэу ФедерациемкIэ Советым щыкIуагъэхэм якультурнэ Iофтхьабзэхэр гъэшIэгъоныгъэх.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ зэхахьэм ФедерациемкIэ Советым икъулыкъушIэхэр, Адыгеим илIыкIохэр, нэмыкIхэри хэлэжьагъэх. Адыгеим иансамблэхэу «Налмэсым», «Ислъамыем» якъашъохэмкIэ, орэдхэмкIэ лъэпкъ искусствэм ихэхъоныгъэ­хэр къагъэлъэгъуагъэх.

Дунаим щыцIэрыIоу, Адыгэ Республикэм и Къэралыгъо академическэ лъэпкъ ансамблэу «Налмэсым» къашъохэу «Зэфа­кIор», «Адыгэ уджхэр», «IэкIыб къэралхэм ащыпсэурэ тилъэпкъэгъухэм язэхэт къашъу» зыфиIорэр, ижъырэ къашъоу «Ислъамыер» Налмэсым дахэу къышIыгъэх.

— Пчыхьэзэхахьэр гъэшIэгъо­нэу, гум шIукIэ къинэжьынэу кIуагъэ, — къытиIуагъ «Налмэсым» ихудожественнэ пащэу, Урысыем, Абхъазым, Пшызэ шъолъырым язаслуженнэ артистэу, Адыгэ Республикэм инароднэ артистэу Хъоджэе Аслъан. — Концертым еплъыгъэхэм лъэшэу тафэраз. Ти ЛIышъхьэу КъумпIыл Мурат пчыхьэзэхахьэм икIэух артистхэм къакIэлъырыхьи, гущыIэгъу къафэхъугъ, ахэм къафэрэзагъ.

«Налмэсым» иконцертхэмкIэ цIыфхэр нахьыбэрэ ыгъэгушIонхэм фэхьазыр. Ансамблэм иIофшIэн нахь дэгъоу зэхищэным, ифэIо-фашIэхэр гъэцэкIэгъэнхэм афэшI Адыгэ Респуб­ликэм и ЛIышъхьэу КъумпIыл Мурат Правительствэм, Парламентым Iофыгъо гъэнэфагъэхэр зэшIуахыгъэх. Урысыем иансамблэ анахь цIэрыIомэ «Налмэсыр» ащыщ зэрэхъугъэм гушхоныгъэ къытхелъхьэ.

Белоруссием къыщышъощт

Мы мафэхэм «Славянский базар» зыфиIорэ зэхахьэр Белоруссием щыкIощт. «Налмэсыр» Iофтхьабзэм рагъэблэ­гъагъ, бэдзэогъум и 12-м гъогу техьагъ.

ПэшIорыгъэшъэу зэхэщакIо­хэм къызэраIуагъэмкIэ, бэдзэ­огъум и 15-м, пчыхьэм сыхьатыр 9-м рагъэжьэщт концертым «Налмэсыр» хэлэжьэщт, телеви­дениемкIэ зэхахьэм фэгъэхьыгъэ къэтыныр къагъэлъэгъощт.

ТилъапIэу «Налмысым» имурадхэр къыдэхъунхэу, лъэпкъ искусствэр джыри нахь лъагэу ыIэтынэу, Адыгэ Республикэм щытхъуцIэу иIэм хигъэхъонэу фэтэIо.

Опсэу, ти «Налмэс-налкъу­тэу» тыгъэм дэшIэтырэр! О уишIушIагъэ лъэпкъым, Адыгэ Республикэм ацIэхэр лъагэу дунаим щеIэтых.

ЕмтIылъ Нурбый.