Мыекъуапэ щыIагъ
Московскэ поэтэу ыкIи музыкантэу Вячеслав Качиным итворчествэкIэ АР-м и Лъэпкъ тхылъеджапIэ зэIукIэгъу щыкIуагъ. Ащ поэзиер, музыкэр зикIасэхэр хэлэжьагъэх. Поэтыр апэрэу Адыгеим къэкIуагъ, тикъэлэ шъхьаIэ лъэшэу гум хапкIэу, нэсэу ылъытагъ.
УсакIор къыблэ зекIо-гъогум илъэс хъугъэу тет, Краснодар краим ащ фэдиз уахътэр — илъэсыр щигъэкIуагъ ыкIи творческэ проектэу «Человек, которому надо…» зыфиIорэм къыдыхэлъытагъэу, Мыекъуапэ ихьэкIагъ. Ащ къызэриIуагъэмкIэ мыщ фэдэ творческэ зэIукIэгъухэм, иусэн-тхэн къызэкIагъаблэ, ылъэгъуи, зэхихи, зэхишIи усэкIэ къыреIотыкIы. ИкIас зыплъыхьан-къэкIухьаныр, цIыф зэфэшъхьафхэм ахэтыныр, а зэкIэ тхьапэм ригъэкIужьыныр. Джа нэшэнэшIур урысые поэтэу В. Г. Качиным итворчествэ къыхэщы.
Творческэ зэIукIэгъоу Лъэпкъ тхылъеджапIэм щыкIуагъэр къызэIуихыгъ ыкIи зэрищагъ краеведениемрэ литературэмрэкIэ отделым ибиблиограф шъхьаIэу Александр Данильченкэм. Ащ кIэкIэу усакIом ищыIэныгъэ ыкIи итворчествэ Iофтхьабзэм къекIолIагъэхэр щигъэгъозагъэх.
Вячеслав Германович Качиныр 1964-рэ илъэсым къалэу Москва къыщыхъугъ. ГИТИС-м щеджагъ, театрэу Ермоловам ыцIэ зыхьырэм зы заулэрэ Iоф щишIагъ, ау ежь ыгу зэлъызыIыгъ усэн-тхэнымкIэ етIанэ шIоигъоу зигъэзагъ.
Вячеслав Качиныр пстэуми апэу — усакIо, итворческэ IэпэIэсагъэ зиштагъ, Урысыем итхакIохэм я Союз хэт, усэ сборникищмэ яавтор «Два рубля до луны», «Человек, которому надо…», «Все приближение мое…».
Иусэхэр гум нэсых, щыIэныгъэшхор зыфэдэр ахэм къыпфаIуатэ, урыс литературэшхом ишапхъэхэр зэрэхэмыкIуакIэхэрэр къаушыхьаты.
Творческэ зэIукIэгъум игуапэу авторыр иусэ зэфэшъхьафхэм къыщяджагъ, цIыфхэм яупчIэхэм джэуапхэр къаритыжьыгъ.
Iофтхьабзэм къырагъэблэгъэгъагъэх тхэкIо организациеу «Ошъутенэм» хэтхэр, къалэм иинтеллигенцие, тхылъеджэхэр ыкIи ежь тхылъеджапIэм иIофышIэхэр, СМИ-хэр.
Творческэ зэIукIэгъум хэлэжьагъэ пэпчъ ыгъэдэIуагъ ыкIи ыгъэгупшысагъ, гущыIэр сыд фэдэрэ бзэкIэ къэIуагъэми, кIуачIэ зиIэба. Ары. ЦIыф пэпчъ зы шIуагъэ горэ хэлъэу къэхъу, В. Качиныр усакIо ыкIи музыкант, орэд 200 фэдизым яавтор, ахэр къаIох. УсакIом, музыкантым игухахъо зиштэнэу, иусэ макъэ зиIэтынэу фэлъэIуагъэх. Мамырыкъо Нуриет. Сурэтым итыр: усакIоу В. Качиныр.