Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ сурэт къэгъэлъэгъон Краснодар къыщызэIуахыгъ.

Краснодар краим къаугупшысыгъэ искусствэ­хэмкIэ исурэт къэгъэлъэгъуапIэ Адыгеим ипро­фессиональнэ сурэтышIхэмрэ исурэттеххэмрэ яIофшIагъэхэм афэгъэхьыгъэ зэхахьэр бэдзэ­огъум и 6-м игъэкIотыгъэу щыкIуагъ.

Адыгэ Республикэм культу­рэмкIэ и Мафэхэр Краснодар краим щызэхащагъэх. Адыгеим культурэмкIэ и Министерствэ иотдел ипащэу, республикэм культурэмкIэ изаслуженнэ Iофы­шIэу Шэуджэн бэлэ зэхахьэм хэлажьэхэрэм къафэгушIуагъ, лъэпкъыбэ зыщыпсэурэ Адыгеим итворческэ купхэм яIофшIагъэ шэпхъэ лъагэхэм зэрадиштэрэр, сурэтхэм республикэм ищыIакIэ къызэрагъэлъагъорэр хигъэунэфыкIыгъэх.

Зэхахьэм къыщыгущыIагъэх Адыгэ Республикэм иофициальнэ лIыкIоу Краснодар краим щыIэм игуадзэу А. АкIэгъур, Пшызэ икъэзэкъхэм яапэрэ атаманэу, тарихъ шIэныгъэхэмкIэ кандидатэу, Пшызэ IофшIэнымкIэ и ЛIыхъужъэу В. Громовыр.

Зэхахьэм яеплъыкIэхэр къыщизыIотыкIыгъэхэм ащыщых АР-м исурэтышIхэм я Союз итхьаматэу, Адыгеим искусствэхэмкIэ иза­служеннэ IофышIэу Е. Абакумовар, Адыгэ Республикэм куль­турэмкIэ и Министерствэ исурэт къэгъэлъэгъуапIэ ипащэу, Адыгеим инароднэ сурэтышIэу А. Бырсырыр, Адыгеим исурэттеххэм я Союз итхьаматэу, Адыгеим культурэмкIэ изаслуженнэ Iофы­шIэу, Адыгэ Республикэм иза­служеннэ журналистэу А. Кирнос, Краснодар исурэт къэгъэлъэгъуа­пIэу «Санталым» ипащэу Н. Чи­жовар, нэмыкIхэри.

Живописым, графикэм, бгъэфедэн плъэкIыщт искусствэм, скульптурэм яхьылIэгъэ IофшIэгъи 123-рэ сурэтышI 42-мэ къагъэлъа­гъо. Дышъэидэным пыща­гъэ­хэм, пхъэм пкъыгъохэр хэ­­зы­шIыкIы­хэрэм, тхыпхъэ­хэр зы­шIы­хэ­рэм, фэшъхьафхэм яIэ­пэIэсэныгъэ узы­Iэ­пещэ.

«Искусствэр ыкIи уахътэр. Адыге­им исурэ­тышI­хэр» зы­фиIо­рэ къэ­гъэ­лъэ­гъонэу Крас­нодар щы­­кIо­рэр зэ­хэ­ща­­кIохэм дэ­гъоу агъэ­псыгъ. Уры­сыем ишъо­­лъыр­хэм, IэкIыб къэра­лыгъо­хэм Iоф­тхьабзэр ащызэхэпща­гъэми, уры­гушхонэу щыт.

— Сурэттех 28-мэ яIофшIэгъэ 70-рэ Краснодар къыщытэгъэлъа­гъо, — къеIуатэ дунаим щызэлъа­шIэрэ Аркадий Кирнос. — Адыге­им итарихъ, ищыIакIэ къитэIотыкIы, зэгурыIоныгъэ тхэлъэу ти­къэ­ралыгъо гъэпсыкIэ зэрэдгъэпытэрэр цIыфхэм алъытэгъэIэсы.

Жанрэхэу портретыр, репортажыр, чIыопсыр, Адыгеим щы­псэурэ лъэпкъхэм яшэн-хабзэхэр, республикэр лъэхъаным зэ­рэ­щылъыкIуатэрэр сурэттеххэм ягупшысэхэм ащыпхыращы.

Щытхъур къыфахьы

Адыгеим исурэттеххэр Урысыем изэнэкъокъухэм чанэу ахэлажьэх, апэрэ чIыпIищыр къыдэзыхыгъэхэм ащыщых. Искусствэм иIэпэIасэхэм яIофшIагъэхэр къэралыгъо 40-м нахьыбэмэ къа­щагъэлъэгъуагъэх. Дунаим тет музей цIэрыIохэм Адыгеим ща­шIыгъэхэр ачIэлъых.

Бырсыр Абдулахь къызэрэти­Iуагъэу, адыгэ лъэпкъыр итэкъу­хьагъэу IэкIыб къэралхэм ащэ­п­сэуми, иныдэлъфыбзэ, икультурэ, ишэн-хабзэхэр щыгъупшэхэрэп. Зэлъэпкъэгъухэр искусствэм зэфещэх, лIэужхэм язэпхыныгъэхэр егъэпытэх.

Адыгэ Республикэм ихэхъо­ныгъэхэм, лъэпкъэу тишъолъыр ис­хэм языкIыныгъэ зэрэпытэрэм, гъунэгъу краим зэпхыныгъэу дытиIэм зызэриушъомбгъурэм афэгъэхьыгъэ къэгъэлъэгъоныр бэдзэогъум и 17-м нэс Краснодар щыкIощт. Искусствэр зышIогъэшIэгъонхэр зэхэщакIохэм рагъэблагъэх.