Къуекъо Налбый ар епэсыгъ
бэдзэогъум и 20-р — Къуекъо Налбый къызыхъугъэ маф. Мы блэкIыгъэ мэкъуогъу мазэм ытхыгъэхэм сигуапэу сахэджыхьажьыгъ, сыгу къэзгъэкIыжьыгъэх.
ЗыгорэкIэ итворчествэ сыкъытегущыIэнэу тесыубытэмэ, икъу фэдизэу къэсIон, къэзгъэлъэгъон слъэкIына? — ащ фэдэ упчIэ къэуцугъ. Тесыубытагъ — Налбый иныбджэгъухэу, тхакIохэу, шIэныгъэлэжьхэу иIагъэхэм ар нахь дэгъоу афызэшIокIыщт. Ау сэ сызыгъэгумэкIырэр фэшъхьаф — ащ сикъэбар къесщэлIэщт.
Уарыгушхонэу тиIэх цIыф Iушхэр. Къуекъо Налбый фэгъэхьыгъэу ахэм гъэшIэгъонэу бэ къатхыгъэр. ТиIэх тхакIохэри непэрэ дунаим диштэхэу, къэхъурэм къыдашъохэу, хабзэу къытехьэрэм итхакIохэр. КIэкIэу къэпIон хъумэ, адыгэмэ зэраIоу, «Зику исым иорэд къырагъаIо». Ахэм ыкIи нэмыкI Iофхэм апылъ цIыфхэм къызэратхырэмкIэ, Налбый лъэгапIэу зынэсыгъэм зи екIолIэшъугъэп. Шъыпкъэ, ар поэтышхоу, драматургышхоу щытыгъ. ШIэныгъэ куу иIагъ, иусэмэ псэ къапигъакIэу, мэхьэнэ ин ахэлъэу тхэщтыгъэ. Тиадыгэ лъэпкъ, тичIыгу афэлэжьагъ, ахэм ядэхагъэ къыгъэлъэгъон ылъэкIыгъ. ЦIыф Iаеу, мыхъунхэр зыгу илъым а пстэури ытхын ылъэкIыщтэп — ары Налбый дэгъоу зышIэщтыгъэхэм къызкIыхагъэщырэр цIыфыгъэу, гукIэгъоу хэлъыгъэр.
Налбый сиблагъэу е тызэхахьэу щытыгъэп. Гъэсэныгъэм фэгъэзэгъэ ныбджэгъоу сиIэмэ апэ итэу слъытэщтыгъэ, ежь ар ышIэщтыгъэп нахь мышIэми.
Загъорэ IофшIапIэм ыдэжь сычIахьэу къыхэкIыщтыгъ, тхылъыкIэхэр къызыдигъэкIыхэкIэ сырыгушхоу, ыIапэ къыкIидзэти къыситыщтыгъэх. СикIалэхэми Налбый зыщылажьэрэ чIыпIэр язгъэшIагъэу щытыгъ ыкIи загъорэ ар алъэгъугъэуи къысаIожьыщтыгъ.
Сэ сшъхьэкIэ Налбый къытхыгъэмэ сяджэу зысэублэм ыуж дунаим еплъыкIэу фысиIэр зэблэхъугъэ хъугъэ.
УищыIэныгъэрэ уипсэукIэрэ гъунэ ямыIэу къыпшIошIызэ, Налбый иусэмэ узяджэкIэ зы гъунапкъэ горэм удегъэуцо. ПшIэщтыми, пIощтыми гъунэ алъыпфэу, узыфэсакъыжьын фаеу уешIы, мыхъунэу пхэлъыр къыпхефы.
ЩыкIагъэ зимыIэ зи цIыф щыIэп, ау ар зыдэпшIэжьэу, къэмыгъэлъэгъон плъэкIэу, дэгъоу пхэлъымкIэ цIыфмэ уазэрэхэхьан фаер къыбгурегъаIо. Iофэу пшIэрэм тхъагъо хэбгъуатэу, уигъэразэу, цIыфхэм уиягъэ ямыгъэкIырэмэ, тэрэзэу ущыIэкIэ плъытэ хъущт — ари шапхъэхэм ащыщ.
Псэ зыпытэу зэкIэ щыIэмэ лъытэныгъэ афыуегъэшIы, уафегъэсакъы. Ары пакIошъ, чъыгым пкIашъэу пытым фырикъоу псэ зэрэпытыр уегъашIэ, къыбдегъэгущыIэ, нэшIукIэ урегъэплъы. ЧIыгур зыIыгъхэу, кIочIэшхохэу жьыбгъэр, псыр, машIор, тыгъэр, мазэр — ахэм фэшъхьафынэкIэ уарегъэплъы, гупшысэмэ уахещэ. Iо хэмылъэу Налбый ытхыгъэмэ джыри лIэшIэгъубэмэ къащыфагъэзэщт, ишIуагъэ якIыщт. Налбый бзэу Iулъыгъэр зэрэлъэшыр, гухэкI нахь мышIэми, умыадыгэмэ икъу фэдизэу зэхэпшIэщтэп, арышъ, тэры ар, илъэпкъ, ичIыгу зыфэусагъэр. Хэти илъэпкъ къыхэкIыгъэ цIыфхэу тарихъым хэхьан зылъэкIыгъэхэр егъэлъапIэх, зыми иер къыуитыщтэп, зыми оуери пIихыщтэп. Оуер бгъэлъапIэу, пIэтэу ябгъашIэмэ, нэмыкIхэми уасэ къыфашIын.
Урысмэ — Пушкиныр, Лермонтовыр.., дагъыстанмэ — Расул Гамзатовыр, тэ, адыгэхэмкIэ — Къуекъо Налбый. Тилъэпкъ щымыщхэм саугъэтхэр афэдгъэуцуным тыфэIаз. Ау тэ тилъэпкъ фэлэжьагъэу, зыгъэдэхагъэм нэмыкI цIыф лъэпкъ горэм саугъэт фишIыщтэп. Арышъ, тиIэм уасэ фэтэжъугъэшI, ифэшъуашэ тетэу тыдэжъугъэзекIу.
2007-рэ илъэсым, орэдыIо купэу «Жъыум» сыхэтэу къалэу Элиста щырекIокIыгъэ дунэе фестивалым сыхэлэжьагъ. Ар гъэшIэгъоныгъэ, ау ащ нахь згъэшIэгъуагъэр — Къалмыкъым тызэрихьэу къырегъажьэшъ, Элиста нэсыжьэу саугъэтэу итым ибагъ. Ахэр цIыфхэу Къалмыкъыр зыгъэдэхагъэмэ къатегущыIэх, ары пакIошъ, псэушъхьэ зэфэшъхьафхэр агъэлъапIэхэу саугъэтхэр афагъэуцугъэх. Ахэм лъэпкъыр къагъэдахэ, къагъэбаи.
О узыщыщ лъэпкъым дахэкIэ игугъу пшIымэ, ащ пае зи къыбдэхьащхыщтэп, зыми уигъэмысэщтэп. Сыда пIомэ, ар уян, уят, уичIыгу…
IэнэтIэшхо умыIыгъми, мылъкушхо пIэкIэмылъми, улажьэмэ ушхэжьызэ, Тхьэм къыпфитIупщыгъэр бгъэшIэщт.
IэнэтIэшхо зиIэу, мылъкушхо зыIэкIэлъми иуахътэ гъэнэфагъэ, зи зыдихьыжьыщтэп, зэкIэ къыщинэщт. Илъэс 60, 80, 100 бгъэшIэнэу щытми — ари къэсыщт. ЦIыфхэм къахэнэжьыщтыр шъыпкъэныгъэу, псэпэшIагъэу уиIэр, цIыфыгъэу, лIыгъэу пхэлъыгъэр ары.
Непэ Налбый къызэрэтхэмытыжьыр гухэкIышху, ау IофшIагъэу иIэхэмкIэ ар цIыфхэм агу илъыщт. Налбый, Iо хэмылъэу, илъэсишъэм зэ къыхэфэрэ цIыф — ар бэмэ къатхыгъ, арышъ, тефэу сэлъытэ саугъэт фэгъэуцугъэныр ыкIи ащ ыцIэкIэ Мыекъуапэ изы урам еджэгъэныр. Сэ сишIошIыкIэ Налбый исаугъэт улъымыхъунэу, чыжьэу Iумыхыгъэу, цIыфхэр нахь зыщызекIохэрэ чIыпIэ горэм е Мыекъуапэ икъэлэ парк дэгъэуцуагъэмэ дэгъугъэ.
Яунагъохэр аIыгъынхэм пылъ цIыф лэжьакIохэу, тхылъмэ яджэнхэу уахътэ хэзымыгъуатэхэрэм Къуекъо Налбый нахь дэгъоу ашIэщт саугъэт фагъэуцумэ. ТикIалэхэри, ахэм къакIэхъухьагъэхэри екIолIэнхэ, тхьауегъэпсэу раIон алъэкIыщт.
Мы Iофым изэшIохын зы нэбгырэм къышIошIырэм епхыгъэнэу щытэп. Мыр лъэпкъ Iоф, арышъ, хабзэу щыIэми тефэрэр зэшIуихын фае. Мыр тэ тымышIыми, тауж къикIырэ лIэужхэм ашIыщт, арышъ, «нэужырэ акъыл нахьи ыпэрэ акъыл» зэраIоу, зигъор тэжъугъашIэ.
Сэ Адыгэкъалэ сыдэс, арышъ, Iофыр ежьэмэ, сэри, синыбджэгъухэри шIыхьафхэр зыщашIыщт уахътэм такъыхэхьан, тиамалыр тшIэн. Ащ фэшъхьафэу сэ сшъхьэкIэ сиамалыр (сэ хабзэм къулыкъу фэсшIагъэу пенсием сыщыI) Налбый исаугъэт ашIынэу зыщырагъажьэрэм ыкIи зыщаухырэм нэсыфэкIэ сшIэщт. Бэми-макIэми ащ уахътэу къыдафэрэм пенсиеу къысатыщтыр сигуапэу пэIузгъэхьан слъэкIыщт.
Налбый зыфэлэжьэгъэ тилъэпкъ пштэмэ, сэщ нахь лIыгъэ хэлъэуи къыхэкIыщтыр макIэп. Хабзэри къогъу къохьажьынэп. Тызэкъотмэ, а Iофыр тпшъэ ифэн. Тэ тилъэпкъыкIэ анахь макIэу Налбый фэтшIэжьын тлъэкIыщтыр нэпэеплъэу саугъэт фэдгъэуцуныр ары. Къуекъо Налбый ар епэсыгъ.
Абыдэ Хьис. АР-м культурэмкIэ изаслуженнэ IофышI.