Адыгеим щашIыгъэ шIухьафтынхэр, унагъом ищыкIэгъэ пкъыгъохэр музейхэм, нэмыкIхэм къащагъэлъагъох, тучанхэм ащащэх.

Бгъэфедэн плъэкIыщт искусствэм ехьылIэгъэ къэгъэлъэгъон­хэр Адыгэ Республикэм гъэшIэгъонэу щэкIох нахь мышIэми, зэхэщакIохэр цIыфхэм икъоу алъыIэсынхэ алъэкIырэп. Адыге­им щызэлъашIэрэ лъэпкъ музы­кантэу, фольклорым иугъоин, изэгъэшIэн пылъэу Нэгэрэкъо Казбек IэпэIасэхэм ашIыгъэ Iэпэщысэхэр еугъоих, музейхэм, республикэм щыкIорэ зэха­хьэхэм къащегъэлъагъох. Ащ дакIоу, Мыекъуапэ игупчэ щапIэхэм ащыщэу псэупIэу Гавердовскэм тучан къыщызэIуахыгъ.

Адыгэ шъуашъэр, республикэ адыгэ быракъыр, IункIыбзэпылъхьэхэр, нэмыкIхэри гъучIым хэшIыкIыгъэх. Гъунджэр зыдэлъ къэмланым адыгэ быракъым исурэт дахэу тешIыхьагъ. Унагъом, кIэлэеджакIохэм ящыкIэгъэ пкъыгъохэр, пхъэм хэшIыкIыгъэу пщэрыхьакIохэм агъэфе­дэхэрэр, фэшъхьафхэри шIу­хьафтын дэгъу хъущтых.

Загъэпсэфынэу Адыгеим къэ­кIуагъэхэм, Урысыем ишъолъыр­хэм, IэкIыб хэгъэгухэм къарыкIыгъэ хьакIэхэм республикэм ичIыопс ашIогъэшIэгъон.

— Адыгеим щалъэгъугъэм, щызэхахыгъэм яхьылIэгъэ нэ­рылъэгъу IэпыIэгъухэр, шIухьафтынхэр тэугъоих, — къытиIуагъ Нэгэрэкъо Казбек. — Къэралыгъо гъэпсыкIэ тиIэу тызыпсэу­рэр илъэси 100 зэрэхъурэм фэ­гъэхьыгъэ Iофтхьабзэхэм та­хэлажьэзэ, Адыгеим итарихъ, икультурэ, хэхъоныгъэу тшIы­хэрэр къэдгъэлъэгъощтых.

Нэпэеплъ шIухьафтыныр гу­къэкIыжь лъапI. КIэракIэу къызыдепхьакIыныр, чIыпIэ хэхыгъэ фэпшIыгъэу унэм, IофшIапIэм къыщыбгъэлъэгъоныр шэн-ха­бзэхэм адештэ. Лъэпкъ тари­хъым, культурэм япхыгъэ сурэт­хэм, IэшIагъэхэм уагъэгушхо. Нэгэрэкъо Казбек шIэныгъэм зэрэпылъыми тыщыгъуаз. Ригъэжьэгъэ Iофыр лъигъэкIотэнэу, игупсэ республикэр шIукIэ къе­тэжьынэу фэтэIо.

ЕмтIылъ Нурбый.