Адыгэ Республикэм и Ма­фэхэу Адыгеим къэралыгъо гъэпсыкIэ иIэ зыхъугъэм ия 100-рэ илъэс фэгъэхьыгъэхэу ФедерациемкIэ Советым къы­щызэIуахыгъэхэм ахэлажьэх ФедерациемкIэ Советым и Тхьа­матэу Валентина Матвиенкэр, Адыгеим и ЛIышъхьэу КъумпIыл Мурат, Адыгэ Рес­публикэм и Къэралыгъо Совет — Хасэм и Тхьаматэу Владимир Нарожнэр, сенаторхэр, Адыгеим иминистрэхэм я Кабинет хэтхэр, депутатхэр.

Шъугу къэтэгъэкIыжьы Фе­дерациемкIэ Советым, Къэралыгъо Думэм, хэгъэгум и Правительствэ яIэпыIэгъу хэлъэу Адыгеим псыубытыпIакIэрэ псы­рыкIуапIэрэ зэрэщашIы­гъэ­хэр. ПстэумкIи сомэ миллиарди 4,5-рэ проектым пэIухьагъ. ПсырыкIуапIэм километри 140-рэ икIыхьагъ. А псэуалъэр зэратIупщыгъэм ишIуагъэкIэ Мые­къуапэ дэсхэм ыкIи гъунэгъу Мыекъопэ районым ипсэупIэ 57-мэ адэсхэм псым ылъэныкъокIэ яIофхэм язытет нахьышIу хъущт, ащ къыхеубытэ нэбгырэ 220-рэ фэдиз.

КъыкIэлъыкIощт чэзыур зэпхыгъэр республикэм икъэлэ шъхьаIэ ипсырыкIуапIэхэр зэ­блэхъугъэнхэр ары. Ащ фэгъэ­хьыгъэу игъэкIотыгъэу Iофхэм язытет къытегущыIагъ Адыгэ Республикэм псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэу Валерий Картамышевыр. Ащ къызэриIуагъэмкIэ, непэ Мыекъуапэ игъэкIотыгъэу хэхъоныгъэ ешIы, ащ къыхэкIэу псырыкIуапIэхэми атегъэкIагъэр нахьыбэ мэхъу. НепэкIэ ахэр процент 60 — 95-м нэсэу лэ­жьа­гъэ хъугъэх. Километрэ 27,3-рэ фэдиз гъэкIэжьыгъэн ыкIи зэблэхъугъэн фае. Коммунальнэ инфраструктурэм игъэ­кIэжьынкIэ проектым псырыкIопIэ Iахь зэфэшъхьафэу 11 хагъэхьагъ. Ау джырэкIэ рыкIуапIэхэм ащыщэу километри 8 ныIэп агъэтэрэзыгъэр. Мы Iофыгъом изэшIохынкIэ республикэм ихэбзэ къулыкъухэр зыщыгугъыхэрэр ФедерациемкIэ Советым иIэпыIэгъу ары.

Республикэр зыгъэгумэкIырэ Iофыгъохэм ащыщ коммунальнэ инфраструктурэм хэхъоныгъэ егъэшIыгъэныр. Ар Адыгэкъалэ фэгъэхьыгъэу щыт. Адыгеим и ЛIышъхьэу КъумпIыл Мурат мызэу-мытIоу къыкIигъэтхъыгъ Мыекъуапэ фэдэу Адыгэкъали псынкIэу хэхъоныгъэ ышIыным мэхьанэшхо зэриIэр. Лъэныкъо пстэухэмкIи Адыгэкъалэ мы аужырэ илъэсхэм IофшIэнышхо щэкIо. КъалэмкIэ фабэр зэрыкIорэ трубэхэр зэтегъэпсы­хьэ­жьыгъэнхэм пае IэпыIэгъу ящы­кIагъэу щыт. Анахьэу километрэ 25,2-рэ зикIыхьэгъэ участкэр ары гумэкIыгъо къыз­пыкIырэр. 2021-рэ илъэсым сомэ миллион 268-рэ зыпэIу­хьащт проект-сметэ документациеу агъэхьазырыгъагъэр зы­фэгъэхьыгъагъэр сетьхэм ягъэ­кIэжьын. АщкIэ къэралыгъо уплъэкIунхэр зызэхащэхэм къа­дырагъэштэгъагъ. Ащ епхыгъэу комитетым изэхэсыгъо щы­тегущыIагъэх федеральнэ бюджетым мылъку къыхагъэ­кIыным фэгъэхьыгъэ предложениеу къахалъхьагъэм къыдырагъэштэн алъэкIыщт-амылъэкIыщтым иIоф.