Адыгэм иилъэси 100 инэпэеплъых
Адыгэ Республикэм икультурэ и Мафэхэр ткъош Къэбэртэе-Бэлъкъар Республикэм щыкIуагъэх. Адыгеим икъэралыгъо гъэпсыкIэ илъэси 100 зэрэхъугъэм ахэр фэгъэхьыгъагъэх.
АР-м и Къэралыгъо филармоние исимфоническэ оркестрэ концерт Налщык къыщитыгъ. Дирижер шъхьаIэу Аркадий Хуснияровым, дирижерэу СтIашъу Къэплъан зэхагъэуцогъэ программэм тетэу оркестрэм тикъэралыгъо ыкIи IэкIыб композиторхэм ямузыкальнэ произведениехэр къыригъэIуагъэх.
Урыс лъэпкъ музыкальнэ Iэмэ-псымэхэм я Къэралыгъо ансамблэу «Русская удаль» зыфиIорэми концерт Къэбэртэе-Бэлъкъарым икъэлэ шъхьаIэ къыщитыгъ. Лъэпкъ музыкальнэ искусствэр зикIасэхэм ар ашIогъэшIэгъон хъугъэ.
Адыгэ Республикэм иIэпэIасэхэм я Ассоциацие хэтхэм яIэшIагъэхэм якъэгъэлъэгъон художественнэ искусствэм имузееу А.Ткаченкэм ыцIэ зыхьэу Налщык дэтым щыкIуагъ. Къэгъэлъэгъоным икъызэIухын цIыфыбэ къыщызэрэугъоигъагъ. Абрэдж Гощэфыжь иалырэгъу-гобеленхэр, Боджэкъо Бэлэ ишъуашэхэр, Битэ Азэрэ Джарымэкъо Зуретрэ яIэшIагъэхэр, ЛIышэ Ахьмэд иIэпэщысэхэу пхъэм хэшIыкIыгъэхэр — зэкIэмкIи Iэпэщысэу 100 ащ хагъэлэжьагъ.
Къэгъэлъэгъоным мэхьанэу ратырэмкIэ IэпэIасэхэу Абрэдж Гощэфыжьрэ Боджэкъо Бэлэрэ къыддэгощагъэх.
Абрэдж Гощэфыжь: «Тэ такъызэрэфэкIуагъэм фэдэу, ежьхэри — Къэбэртэе-Бэлъкъарым иIэпэIасэхэри — къытфэкIонхэу щытых. Тэ къэтщэгъэ пкъыгъохэр, лъэпкъ Iэпэщысэхэр ижъырэ шапхъэхэм атехыгъэу шIыгъэх. ТиIэпэIасэхэр ныбжьыкIэх нахь мышIэми, дышъэидэм фэкъулаих, къыхагъэщыжьырэ ижъырэ адыгэ тхыпхъэхэр ахэм яIэшIагъэхэм ащагъэфедэх. Ахэр лъэгъупхъэх, шIыкIашIоу шIыгъэх, сыд фэдэрэ къэгъэлъэгъон хэбгъэлэжьэщтхэми шъуашэх. Сэ къэсщэгъэ гобеленхэм лъэпкъым итарихъ ахэплъэгъонэу сшIыгъэх. Лъэпкъ тамыгъэхэр, лъэпкъ тхыпхъэхэр ахэплъэгъукIынэу щыт, адыгэм шэн-хабзэу хэлъыгъэхэм — лIыгъэ зехьаным, намысым — якъэухъумэн мэхьанэу аритыщтыгъэм янэпэеплъых».
Боджэкъо Бэл: «ТиIэпэIасэхэр, Лъэпкъ театрэр, нэмыкI творческэ купхэр къазэрэфэкIуагъэхэм ткъош къэбэртаехэми мэхьанэшхо раты. Мыщ фэдэ зэхэхьакIэм тизэпхыныгъэхэр къеIэтых. Зы лъэпкъэу тызэрэщытыр нахь зэхэтэшIэ. Мары шъуашэу къэсщагъэхэр сшIырэм изы Iахь цIыкIу, сиIофшIэгъу IэпэIасэхэм къащэгъэ IэшIагъэхэу — дышъэидэхэр, пхъэм хэшIыкIыгъэ пкъыгъо хьалэмэтхэр баиныгъэу лъэпкъым IэкIэлъхэм ащыщых. Мыхэм ямыIэу щытэп ащ фэдэхэр, ау непэ тэ тшIэшъурэр, тэ къэтыухъумагъэу лъэпкъым хэлъ сэнаущыгъэр ядгъэлъэгъу тшIоигъу».
Адыгеим иIэпэIасэхэм яIэшIагъэхэм якъэгъэлъэгъон къекIолIагъэхэм осэ ин фашIыгъ. Къэбэртэе-Бэлъкъар Республикэм культурэмкIэ иминистрэ игуадзэу Къэрэщэе Аминэт зэкъош шъолъырхэм якъэралыгъо гъэпсыкIэ илъэси 100 зыщыхъурэ илъэсым фэдэ Iофтхьабзэхэм язэхэщэн мэхьанэшхо зэриIэр хигъэунэфыкIыгъ. «Адыгеим иIэпэIасэхэм ятворчествэ зэрэбаим, зэрэдахэм, зэрэкуум щэч хэлъэп, ар мыщ фэдэу цIыфхэм ягъэшIэгъэныр, лъэпкъым щыщ шэн-хабзэхэм, искусствэ лъагэм диштэрэ IэпэIэсэныгъэм ахэщэгъэнхэр зымыуасэ щыIэп. ТэгушIо фэдэ зэпхыныгъэхэр зэрэтиIэхэмкIэ, ахэм тапэкIи ахэдгъэхъонэу тэгугъэ!» — къыддэгощагъ Къэрэщэе Аминэт.
ЛIышъэ Ахьмэд иIэшIагъэхэр хэушъхьафыкIыгъэу зы мэкIэе гъэлъэгъуапIэм дэтыгъэх. Адыгэ унэм ижъырэ теплъэу иIагъэр, псэупIэм кIэсэнхэр зыкIэт унэ чIэхьапIэ иIэу зэрэщытыгъэр иIэшIагъэ къыщыгъэлъэгъуагъ. Ащ къыготыгъ пхъэм хэшIыкIыгъэ композицие гъэшIэгъон — Кавказ къушъхьэтхыхэм апашъхьэ ит Iэнэ лъэкъуищым шхынхэр тетэу, шыкIэпщынэр ахэм ашъхьащытэу, тыгъэу акIыб къыкъокIырэм инэбзыйхэр зэхэкIэу — ащ фэдэу зэхигъэуцогъэ пкъыгъохэм IэпэIасэм мэхьэнэ лъэш аритэу къытфиIотагъ: «Мыр адыгэхэм хьакIэр зэрагъашIорэм, зэрякIасэм, ащ иунэ зэрэфызэIуахырэм, гурэ псэрэкIэ зэрэпэгъокIыхэрэм янэпэеплъ. Зэрэ Кавказэу фэдэ шэн-хабзэм къегъэнэфы! Джары сэ мэхьанэу ащ естыгъэр!»
КъБР-м и Лъэпкъ музей иIофышIэу Хашэ Иринэ ылъэгъугъэ адыгэ шъуашэхэм, дышъэидэхэм уасэу афишIыгъэмкIэ иеплъыкIэхэр къыриIотыкIыгъэх: «Къэгъэлъэгъоным пкъыгъоу хэлъым пэпчъ уасэу иIэр лъэгэ дэд. Пстэури дахэ, пстэуми нэр пIэпахы, уакIэрыкIыжьынэу уфаеп, сыд фэдизырэ уяплъыгъэми уязэщырэп. Гобеленхэр мыщ фэдэу шIыгъэхэу апэрэ зэрэслъэгъурэр. Дышъэидагъэхэр ащ фэдэу шIу дэдэу ашIыгъэхэшъ, ядэхагъэ удехьыхы. ТиIэпэIасэхэм зэфэдэу а зы шэн-хабзэхэр агъэфедэх, ау етIани зэтекIых. ШIыкIэр зэфэшъхьафы, ар къэлъагъо. Ары шъуиIэпэIасэхэм якъэгъэлъэгъон гъэшIэгъон къэзышIырэр. Ятеплъэ, IэпэIэсэныгъэ инэу къахэщырэмкIэ «мыр сиунэ илъыгъот, мыр сиIагъот» уагъаIо!»
АР-м икультурэ и Мафэхэм япрограммэ хэтэу Лъэпкъ театрэу Цэй Ибрахьимэ ыцIэ зыхьырэм Налщык спектакль къыщигъэлъэгъуагъ. Дэрбэ Тимур ытхыгъэ пьесэм техыгъэу, ЕмкIуж Андзор ыгъэуцугъэ спектаклэу «Шыу мафэ» КъБР-м и Къэралыгъо драматическэ театрэу ШэуджэнцIыкIу Алый ыцIэ зыхьырэм щыкIуагъ. Режиссерэу ЕмкIуж Андзор Адыгеим щигъэуцугъэ спектаклэр зыщыщ Къэбэртэе-Бэлъкъарым къызэращагъэм, къызэрэщагъэлъагъорэм игумэкI къыхэщыщтыгъэ: «Сыгу мэлъатэ. Адыгеир — тихэку, Къэбэртэе-Бэлъкъарыри тихэку. ТыкъызэрыкIыгъэри тиун, тыкъыздэкIуагъэри тиун. Арышъ, сэгугъэ Мыекъуапэ спектаклэм зэрэщыпэгъокIыгъэхэм фэдэу Налщыки къыщыпэгъокIынхэу. Спектаклэм, пьесэм мэхьэнэ куу хэлъ. Адыгэр тыдэ щыIэми адыгэ шъыпкъэу зэрэщытын фаер, ишэн-хабзэ зэрэфэшъыпкъэр, илIыгъэ пстэуми щысэтехыпIэ зэрафэхъурэр, идунэететыкIи, иплъакIи, изекIуакIи, ипсэлъакIи — зэкIэ зэтегъэпсыхьагъэу зэрэщытын фаер ары къэдгъэлъагъомэ тшIоигъуагъэр».
Театрэм икъэгъэлъэгъуапIэ чIыпIэ нэкI имыIэжьэу цIыф бэдэдэ къекIолIэгъагъ. Къэбэртэе драматическэ театрэм ихудожественнэ пащэу Шыбзыхъу Басир, Урысыем итеатральнэ IофышIэхэм я Союз исекретарэу ыкIи ичIыпIэ къутамэ ипащэу, УФ-м изаслуженнэ артистэу Зыхьэ Заур, АР-м и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэ иIэнатIэ зыгъэцэкIэрэ Хьакъуй Аслъан гуфэбэныгъэ хэлъэу къекIолIагъэхэм зафагъэзагъ.
Шыбзыхъу Басир: «Непэ ткъошхэр къэкIуагъэх. Тигуапэу Адыгеим къикIыгъэ театрэр сценэм къетэгъэблагъэ. Тэ зэпхыныгъэ пытэ тиI, тиартист нахьыжъхэр Москва, ГИТИС-м щызэдеджагъэх. ТызэрэшIэ, тызэхахьэ. Мыгъэ тиреспубликэхэм якъэралыгъо гъэпсыкIэ илъэси 100 зэрэхъущтыр хэдгъэунэфыкIыщт. Ащ фэгъэхьыгъ Iофтхьабзэу джы зэхэтщагъэхэри, Къэбэртэе-Бэлъкъарым щыкIохэрэри. Тизэпхыныгъэ тапэкIи дгъэпытэу, дгъэлъэшэу тылъыкIотэнэу тыщэгугъы!»
Зыхьэ Заур: «Непэрэ зэIукIэр Тхьэм мафэ тфешI! Гъогу къин къэткIугъ адыгэхэмкIэ. Сэ сэIо зэпыт — шыблэр къаоу чъыгыр ыкъутэмэ, лъапсэр къанэмэ къыдэпшыжьыщт. Джащ фэдэкъабз тилъэпкъ. Уаер къытхэуагъ, тызэридзагъ, ау тэпсэу. Зы республикэп — щы тиIэ хъугъэ. Театрищ тиI. Узэхэхьаныр, узэрэшIэныр ары непэ цIыфхэр лъэшэу зыфэныкъохэр. Пкъошхэм уахэхьан, узэрэлъэгъун, гу зэщыпфэн фай. Непэ лъэпкъыр зэрэпсэурэр, зэрэлажьэрэр, гъэхъагъэу иIэхэр пшIэнхэ фай. Тызэрэзэхэхьагъэр Тхьэм мафэ тфешI!»
Хьакъуй Аслъан: «Адыгэ Лъэпкъ театрэм шъуеплъынэу шъукъызэрэкIуагъэм пае тхьашъуегъэпсэу! Мыгъэ зэкъош республикищым якъэралыгъо гъэпсыкIэ илъэси 100 зэрэхъурэр игъэкIотыгъэу ФедерациемкIэ Советым щыхагъэунэфыкIыщт. Концертышхо щыкIощт. Ащ диштэу тэри мыщ фэдэу тызэхэхьаныр, Iофтхьабзэхэр зэхэтщэнхэр, Адыгеим икультурэ и Мафэхэр редгъэкIокIынхэр — мэфэкIышхом изы Iахьэу тыхэуцо. Тхьэм тимурадхэр къыддегъэхъух!»
Спектаклэм иублапIэ еплъынэу къэкIуагъэхэр зэкIэри зыIэпищагъэх. Сценэм щыхъурэм ашIогъэшIэгъонэу лъыплъэщтыгъэх. Тарихъ хъугъэ-шIагъэхэу 1850-рэ илъэсым тидзэкIолIхэу Европэм ифагъэхэр зыхэфагъэхэм якъэгъэлъэгъон тиартистхэм къазэрэдэхъугъэмкIэ, спектаклэр къазэрэщыхъугъэмкIэ еплъыгъэхэр зэпыугъом къыддэгощагъэх.
Къанэкъо Зарина — гъэзетэу «Горянкэм» иредактор шъхьаI: «Пстэуми апэ, сэ сыдраматургышъ, сызэреплъырэр тэ тызфэныкъо драматургием ащ фэдэ лэжьыгъэ къызэрэхэхъуагъэр ары. Ащ зэхэдз фэпшIынэу щытэп, тыдэ щатхыгъэми — Адыгеир арыми, Къэбэртаеми, Щэрджэс лъэныкъор арыми — пстэуми тызылъэпкъ. Адыгэ театрэр — тынэгу, тинап, тызпэплъэгъэ труппэр непэ къытфеблэгъагъ. Пьесэр атхэу амыгъэтIылъыжьэу, занкIэу утыгум, сценэм кызэрихьагъэр шIогъэшхо. Зэпкъырыпхынэу, узтегущыIэнэу, узэплъынэу щыт лэжьыгъэшху. Гъогум къытехьэгъэ, къытфеблэгъэгъэ Адыгэ театрэм ар шIогъэшхоу фэтэлъэгъу. ЗэкIэми тыдэзыхьыхыгъэу тызэплъырэр актерхэм якъэшIыкI. Шыу мафэ сыдэу лъэша! Сыдэу пшIошъ хъура! Зэрэфэпагъэр, зызэришIырэр, изекIуакIэ, икъэшъуакIэ, ипщыналъэ — зэкIэри къекIу, зэкIэри дахэ. ЫкIэм тызнэсыкIэ, адыгэ журналистхэмкIэ тызэхэтIысхьажьэу спектаклэм тырэгущыIэфэ сшIуабэ машIэ!»
Гугъот Зарем — гъэзетэу «Адыгэ псалъэм» ижурналист: «Спектаклэм сигуапэу сеплъы. Сыгу ыIыгъ! Сызэригъэгупшысагъэр — уадыгэныр сыдэу лъэш, сыдэу игъу, сыдэу тинасып! ТилIыгъэр ары тинасыпыр — ащ фэдэу сыригъэгупшысагъ…»
Жыго Инна — КъБР-м ирадио ижурналист: «Спектаклэр сыгу рихьыгъ. Адыгэ лъэпкъым сызэрэщыщым, ащ сыкъызэрэхэкIыгъэмкIэ сшъхьэ нахь лъагэу сигъэIэтыгъ. Титхыдэ, титарихъ нэкIубгъохэр нэгум къыкIегъэуцох. Куоу урегъэгупшысэ. ТIэкIу диалектым ылъэныкъокIэ гугъу сыригъэхьыгъ, ау дэгъоу уедэIумэ, къыбгурэIо. Республикэ зырыз тыщэпсэу нахь мышIэми, тэ тызэкIэлъыкIон фай, ныбжьыкIэхэр зэрэшIэнхэм фэшI. ТызэлъыкIо хъумэ, тызэсэщт ыкIи нахь тызэгурыIощт. Тыбзи, тизэхэтыкIи нахь кIуачIэ хъущтых».
ЯтIонэрэ едзыгъоми тарихъ пьесэм кIэухэу фэхъущтым ыгъапэхэу къекIолIагъэхэр еплъыщтыгъэх. Нэмыц очылэмрэ прокурорымрэ азыфагу дэтыгъэ адыгэ кIалэм инасып къырыкIощтым ыгъэгумэкIыщтыгъэх. Хьыкумым шъхьафит ышIыжьыгъэ Шыу мафэ Iэгу фытеуагъэх.
Адыгэ театральнэ искусствэм инахьыжъ IэпэIасэхэм спектаклэм зэфэхьысыжьхэр фашIыгъэх.
Шыбзыхъу Борис — Къэбэртэе Къэралыгъо драматическэ театрэм ихудожественнэ пащ: «Шым ыпэ рагъэшъын адыгэмэ зи яIагъэп. Сэ сиунэгъуацIэр — Шыбзыхъу. Шыпхъу — шым ыпхъу, къош — шым икъош, шынахьыжъ, шынахьыкI — шым епхыгъэу щытыгъэх, ар шъуашэу щытыгъ. Ау сыдми уашъом къехыгъэп, ащ фэдагъ. ЕгъашIэм адыгэр шыугъ. Шыу мафэ — ар насыпзехь. Тхьэм къыддегъэхъу нахьыжъхэм къытхалъхьагъэр ыпэкIэ лъыдгъэкIотэнэу, тызэшIомыкIодынэу!» Хьакъуй Аслъан — АР-м и Лъэпкъ театрэ ихудожественнэ пащэ иIэнатIэ егъэцакIэ: «Мары республикищми ялIышъхьэхэр зэхахьэхи, Москва кIуагъэх, илъэси 100 тишъолъырхэр зэрэхъухэрэр зэдыхагъэунэфыкIыщт. Зэгъусэхэу зэдашIы. Джащ фэд, тэри Дэрбэ Тимур тикIал, ЕмкIуж Андзор — къэбэртай. Арышъ, тызэхэтэу, зыч-зыпчэгъоу тызэкъотэу тиилъэсишъэ хэдгъэунэфыкIмэ дэгъуба, дахэба тIуи, джар джащ фэдэу тшIыгъэ».
Роль шъхьаIэр къэзышIыгъэ Хьаудэкъо Азэмат Шыу мафэ зэрилъэгъугъэм ыкIи ироль зэригъэцэкIагъэм афэгъэхьыгъэ гупшысэхэмкIэ къыддэгощагъ: «Мы спектаклэр Мыекъуапэ, Краснодар, Налщык къащыдгъэлъэгъуагъ. Тхьэм ыIомэ, тыди тыкIощт. Анахь гупшысэ шъхьаIэу Шыу мафэ анигъэсы шIоигъор цIыфхэм угу нахь афызэIухыгъэу узэрэщытын, къин хэфагъэм укъоуцон, къумалыгъэ земыхьан, гущыIэ птыгъэмэ, ар бгъэцэкIэжьын, хъулъфыгъэ шъыпкъагъэр зэрэпхэлъын фаер ары. Шыу мафэ игущыIэхэмкIэ сэ ар цIыфхэм анэсэгъэсы. Армырми дунаим бэ мытэрэзэу щыхъурэр, шIушIэныр, мамырзехьаныр типшъэрылъ шъхьаIэх. Шыу ма- фэ насыпзехь, шIур ем текIон фае».
Къэбэртэе-Бэлъкъарым итеатральнэ щыIакIэ лъыплъэхэрэм «Шыу мафэ» агу зэрэрихьыгъэм щэч хэлъэп. Лъэпкъ драматургиер, тарихъ пьесэхэр зикIасэхэм ятеатрэхэм Адыгэ Лъэпкъ театрэм щагъэуцугъэ спектаклэр къафащэнэу ежэщтых.
Тэу Замир.