Адыгэ къашъомкIэ ансамблэу «Абрекхэм» щытхъуцIэу иIэхэм къахэхъуагъ.

Ансамблэм икупэу нахьыжъхэр зыхэтым «Народнэ самодеятельнэ коллектив», ансамблэу «Абрекхэм» игурыт куп «Щысэ зытырахырэ самодеятельнэ коллектив» зыфиIорэ щытхъуцIэхэр Адыгэ Респуб­ликэм культурэмкIэ иминистрэу Аулъэ Юрэ иунашъокIэ къафаусыгъэх.

2014-рэ илъэсым унэе шIыкIэм тетэу ансамблэу «Абрекхэр» Мыекъуапэ щызэха­щагъ, художественнэ пащэр ТхьакIумэщэ Налбек.

— Москва, Санкт-Петербург, Темыр Кавказым ыкIи Къыблэм яшъо­лъырхэм, Тыркуем, Израиль тащыIагъ, концертхэр къащытты­гъэх, лъэпкъ Iофыгъо­хэм, шы спортым, нэмыкIхэм япхыгъэ зэха­хьэхэм тахэлэжьагъ. Адыгэ шэн-хабзэхэм, зэкъошныгъэм ягъэпы­тэн афэгъэхьыгъэ едзыгъохэр къэтэгъэлъагъох, ныбжьыкIэхэм пIуныгъэ дэгъу ятыгъэныр ти­пшъэрылъ шъхьаIэу тэлъытэ, — къытиIуагъ ТхьакIумэщэ Налбек.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ехьылIэгъэ хэушъхьафыкIыгъэ концертыр «Абрекым» егъэхьазыры. КъэшъокIо 80 фэдиз ансамблэм хэт. ЩытхъуцIэхэр къызэрэфау­сыгъэхэм ансамблэр рэгушхо, игъэхъагъэхэм ахигъэхъон имурад.

ЕмтIылъ Нурбый.