Философие гупшысэр щыпхырещы
ИскусствэхэмкIэ Европэ академием иакадемикэу, Къэбэртэе-Бэлъкъарым инароднэ сурэтышIэу Бгъэжънэкъо Заурбэч иIофшIагъэ фэгъэхьыгъэ къэгъэлъэгъон бэдзэогъум и 1-м Мыекъуапэ къыщызэIуахыгъ.
КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ ипащэу ШъэуапцIэкъо Аминэт зэхахьэм къыщиIуагъ Бгъэжънэкъо Заурбэч щыIэныгъэм гъогу гъэшIэгъон къызэрэщикIугъэр.
Къэбэртэе-Бэлъкъарым икъалэу Бэкъсан З. Бгъэжънэкъор 1945-рэ илъэсым къыщыхъугъ. Полиграфием иапшъэрэ еджапIэ Москва къыщиухыгъ. Тхылъ тедзапIэу «Iошъхьэмафэм» иредакторэу, Къэбэртэе-Бэлъкъарым ихудожественнэ фонд исурэтышI шъхьаIэу щытыгъ.
Тхылъхэм якъыдэгъэкIын пылъэу графикэм зыригъэушъомбгъуным иIахьышхо хилъхьагъ. «Нартхэр», «Музыкэр», «Адыгэ мэкъамэхэр» зыфиIохэрэ IофшIагъэхэм иIэпэIэсэныгъэ къащигъэлъэгъуагъ. «Нартхэм якIэнхэр» зыфиIорэ тхылъыр Налщык, Москва къащыдагъэкIыгъ.
Адыгэ Республикэм культурэмкIэ иминистрэу Аулъэ Юрэ, Урысыем икомпозиторхэм я Союз хэтэу, Урысыем, Адыгеим искусствэхэмкIэ язаслуженнэ IофышIэшхоу, Къэбэртэе-Бэлъкъарым щыпсэурэ ХьаIупэ Джэбраил, Адыгэ Республикэм и Къэралыгъо орэдыIо-къэшъокIо ансамблэу «Ислъамыем» ихудожественнэ пащэу, Урысыем, Адыгеим, Къэбэртэе-Бэлъкъарым, Къэрэщэе-Щэрджэсым янароднэ артистэу, композиторэу Нэхэе Аслъан, сурэтышI ыкIи архитектор цIэрыIоу Бырсыр Абдулахь, Адыгеим исурэтышIхэм я Союз итхьаматэу Елена Абакумовар, Дунэе Адыгэ Хасэм ипрезидент иупчIэжьэгъоу МэщфэшIу Нэдждэт, зэлъашIэрэ сурэтышIэу, лъэпкъ IэпэIасэу Еутых Асе, Урысыем инароднэ сурэтышIэу, Урысыем итхакIохэм я Союз хэтэу Къат Теуцожь,искусствэм иIофышIэу Ацкъан Руслъан, Адыгэ къэралыгъо университетым искусствэхэмкIэ и Институт ипащэу Тыгъужъ Фатимэ зэхахьэм зэфэхьысыжьхэр щашIыхэзэ яеплъыкIэхэр къаIуагъэх.
Лъэпкъым итарихъ, искусствэр куоу З. Бгъэжънэкъом ешIэх. «Нартхэм якIэн» зыфиIорэ тхылъым нэмыкI къыхэмыгъэщыщтми, сурэтышIэм игупшысэхэм узыIэпащэ. Нартхэм яхьылIэгъэ къэбархэр бэрэ зэхэтэхых, ау З. Бгъэжънэкъом фэдэу сурэтхэр IупкIэу зыми ымышIыгъэхэу плъытэ хъущт.
Пшъашъэм, шыум яобразхэр нахь къыхигъэщыхэзэ, тарихъым илъэоянэхэм уатырещэ. «Емынэжъ чылапхъэр къызэритыгъурэр», «Пшысэхэм атехыгъэ сурэтхэр», хъункIакIохэм яхьылIагъэхэр, нэмыкIхэри къыбгурыIонхэм фэшI бэрэ уяплъын, тарихъым гукIэ зыфэпщэин, зэгъэпшэнхэр пшIынхэ фае.
— Бгъэжънэкъо Заурбэч бэшIагъэу сэшIэ, философым фэдэу сурэтхэр ешIых, лIэшIэгъухэм лъэужэу къащигъэнагъэм уегъэгъуазэ. Графикэр жанрэ гъэшIэгъонэу зэрэщытыр иIофшIагъэхэм ахэолъагъо, Темыр Кавказым имызакъоу, Урысыем, нэмыкIхэм ащыцIэрыIу, — къыIуагъ Къат Теуцожь.
— ИкъэгущыIакIэ седэIузэ, исурэтхэм сяплъызэ щыIэныгъэр нахьышIоу сэлъэгъу, иIофшIагъэ псэ пыт, — игупшысэхэм тащигъэгъозагъ Еутых Асе.
— Сигуапэу сурэтхэм сяплъыгъ, Бгъэжънэкъо Заурбэч сыфэгушIуагъ, — къеIуатэ дунаим щызэлъашэрэ сурэтышI-модельерэу СтIашъу Юрэ. — Сурэтхэр бзэ хэхыгъэкIэ къегъэгущыIэх…
Нэпэеплъ сурэтхэр зэхахьэм ащытырахыгъэх. Композитор цIэрыIохэу Нэхэе Аслъан, ХьаIупэ Джэбраил, фэшъхьафхэм язэгъэпшэнхэр гукIэ плъэгъунхэ фаеу тэлъытэ. СурэтымкIэ къипIотыкIын плъэкIырэ гупшысэр музыкальнэ произведение пшIын плъэкIыщт. Тифольклор бай дэд. Нартхэм якъэбархэм уакъыпкъырыкIызэ, шIум, гумэкIыгъохэр къытфэзыхьыхэрэм, хъункIакIохэм язекIуакIэхэм уяплъы. Пшысэхэм зэрахэтэу, шIур ем зэрэтекIорэр сурэтышI цIэрыIом «иIаш, илъэмыдж», илъэпкъ гупшыс.
Адыгэ Республикэм культурэмкIэ имининистрэу Аулъэ Юрэ ти ЛIышъхьэу КъумпIыл Мурат ыцIэкIэ Бгъэжънэкъо Заурбэч фэгушIуагъ, иIофшIагъэхэу Мыекъуапэ къыщагъэлъагъохэрэм осэ ин афишIыгъ.
— Дахэу Адыгеим къыщытпэгъокIыгъэх. Хабзэм икъулыкъушIэхэм, ныбджэгъухэм, искусствэр зыгъэлъапIэхэрэм сафэраз. Музеим ипащэу ШъэуапцIэкъо Аминэт, ащ иIофшIэгъухэм «тхьашъуегъэпсэу» ясIожьы сшIоигъу, — тизэдэгущыIэгъу лъигъэкIотагъ Бгъэжънэкъо Заурбэч.
Бэдзэогъум и 24-м нэс сурэтхэм якъэгъэлъэгъон музеим щыкIощт. ЗэхэщакIохэм искусствэр зышIогъэшIэгъонхэр IофшIагъэхэм яплъынхэу рагъэблагъэх.