Илъэс IофшIэгъур ыухыгъ
Адыгэ Республикэм и Къэралыгъо филармоние икIэлэцIыкIу театрэу «Дышъэ къошын» зыфиIорэм илъэс IофшIэгъур ыухыгъ.
Филармонием икъэгъэлъэгъопIэ цIыкIу спектаклэу Лешкэрэ жъуагъомрэ афэгъэ-хьыгъэр апэрэу щыкIуагъ.
Сергей Козулиным ытхыгъэ пшысэм техыгъэ къэгъэлъэгъоныр режиссерэу Нэгъой Асыет ыгъэуцугъ.
КIэлэцIыкIухэм ныбджэгъуныгъэу зэдашIыгъэр агъэпытэзэ ямурадхэм афэкIох. Пэрыохъухэр къызэранэкIыгъэх. Ащ ишIуагъэкIэ мэзым гушIогъо макъэхэр икIэрыкIэу щыIужьыгъэх, зэныбджэгъухэр зэфэнэгушIохэу зэпэгъокIых…
Спектаклэм исурэтышIэр Павел Гурин. Рольхэр къэзышIыхэрэр: Лешка — Сергей Вегерин, мышъэр — Евгений Колычев, Лещая — Нэгъой Зурет, Хмурь — ТIэшъу Светлан.
ЩыгъынхэмкIэ сурэтышIэр Павел Гурин.
— Лешкэрэ жъуагъомрэ яхьылIэгъэ пшысэмкIэ илъэс IофшIэгъур зэфэтшIыжьыгъ, — къытиIуагъ «Дышъэ къошыным» ихудожествннэ пащэу, Адыгэ Республикэм инароднэ артистэу Сихъу Станислав. — Илъэс IофшIэгъур зэрэкIуагъэм, спектаклэу дгъэуцугъэхэм татегущыIэщт. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм яхьылIэгъэ Iофтхьабзэхэм тахэлэжьэщт.