Анахь дэгъухэм ащыщ
«2022-м инэпкъхэр» зыфиIорэ сурэт къэгъэлъэгъоныр Мыекъуапэ къыщызэIуахыгъ.
Адыгеим культурэмкIэ и Министерствэ, Урысыем исурэттеххэм якъутамэу республикэм щыIэр, Рязань ыкIи Пензэ ясурэттеххэм ятворческэ куп, Мыекъуапэ икъэлэ сурэттех клубэу «Лэгъонакъэ» кIэщакIо фэхъухи, къэгъэлъэгъоныр Адыгеим щызэхащагъ.
Зэхахьэм къыщыгущыIагъэх Адыгэ Республикэм культурэмкIэ и Министерствэ иотдел ипащэу Шэуджэн Бэлэ, республикэм исурэтышIхэм я Союз итхьаматэу Елена Абакумовар, АР-м исурэттеххэм я Союз ипащэу Аркадий Кирнос.
Илъэси 4 хъугъэу Мыекъуапэ исурэттех клубэу «Лэгъонакъэр» Урысыем изэнэкъокъу апэрэ чIыпIищыр къыщыдэзыхырэмэ ащыщ. Урысыем изэнэкъокъоу «Нэпкъхэр» зыфиIорэм дышъэ медальхэр къыщахьыгъэх Аркадий Кирнос, Александр Орнатскэм, Ирина Даценкэм, Ольга Колодяжнаям, Наталья Кохмановам, Борис Никитиным.
Проектэу «Нэпкъхэм» хэхьэрэ зэIукIэгъоу Пензэ щыкIуагъэм Урысыем исурэттех куп 93-рэ хэлэжьагъ. Сурэт мини 6 зэнэкъокъум къырахьылIагъ. ЗэхэщакIохэм сурэт 200 фэдиз анахь дэгъухэу къыхахыгъэх. Адыгеим щыщхэу Светлана Денисовам, Валерия Долгопловам, Еутых Саидэ, Наталья Кохмановам джэрз медальхэр къафагъэшъошагъэх.
Мыекъуапэ къыщызэIуахыгъэ къэгъэлъэгъоным къалэхэу Златоуст, Белгород, Пермь, Челябинск, Москва, Мурманск, Белоруссием, нэмыкIхэм ясурэттеххэм яIфшIагъэхэр щытлъэгъугъэх. Дахэх, узыIэпащэ. ЧIыопсым, тарихъым, лIыхъужъныгъэм, псэушъхьэхэм, цIыфхэм ящыIакIэ, нэмыкIхэм яхьылIэгъэ сурэтхэр гъэшIэгъоных. Мэкъуогъум и 26-м нэс сурэттеххэм яIофшIэгъи 120-мэ шъуяплъын шъулъэкIыщт.
ЕмтIылъ Нурбый.