Урысые шIушIэ программэу «Олимпийские легенды – детям, молодежи, детскому спорту России» зыфиIорэм къыдыхэлъытагъэу Урысые общественнэ организациеу «Спортсменхэм я Урысые союз» илIыкIо куп Адыгеим щыIагъ.

Адыгеим и ЛIышъхьэу КъумпIыл Мурат спортсменхэм я Урысые союз илIыкIохэр тыгъуасэ республикэм и Правительствэ зычIэт унэм щыригъэблэгъагъэх.

ЗэIукIэгъум хэлэжьагъэх АР-м физическэ культурэмрэ спортымрэкIэ и Комитет итхьа­матэу Дэгужъые Мурат, спортсменхэм я Урысые союз ипрезидентэу, шъхьафит бэнэнымкIэ олимпийскэ чемпионэу Давид Мусульбес, спортсменхэм я Урысые союз иапэрэ вице-президентэу, тIогъогогъу Олимпиадэхэм ячемпион хъугъэ Татьяна Логуно­вар, баскетболымкIэ олимпийскэ чемпионкэу Ирина Сумниковар, батутымкIэ олимпийскэ чемпионэу Александр Москаленкэр.

Республикэм и ЛIышъхьэ зэхэсыгъом зэрэщыхигъэунэфыкIыгъэмкIэ, спортсменхэм я Урысые союз физическэ культурэм зегъэ­ушъомбгъугъэнымкIэ, кIэлэцIыкIухэмрэ ныбжьыкIэхэмрэ спорт лъэпкъ зэфэшъхьаф­хэм апыщэгъэнхэмкIэ шъолъырхэм IэпыIэгъушхо къареты.

«Проектэу «Олимпийские легенды —детям, молодежи и детскому спорту России» зыфиIорэм диштэу спортсмен ныбжьыкIэхэм Iофтхьэбзэ гъэшIэгъонхэр афызэхащэх. КIэлэцIыкIу спорт еджапIэхэм якIуалIэхэрэр ягъэхъагъэхэмкIэ зэрыгушхохэрэ спортсменхэм аIокIэх, ахэм щысэ атырахы, спортми щыIэныгъэ­ми нахьыбэу гъэхъагъэхэр ащашIынхэм кIэгуIэх. Ащ мэхьанэшхо иI», — къыIуагъ КъумпIыл Мурат.

ЛIыкIо купым ипащэу Давид Мусульбес республикэм и ЛIышъхьэ тхьауегъэпсэу риIуагъ фабэу къазэрэпэгъокIыгъэм фэшI. Спортым республикэм зыщегъэушъомбгъу­гъэнымкIэ Iофышхо зэрашIэрэри ащ хигъэ­унэфыкIыгъ.

ЛIыкIо купым хэтхэр тыгъуасэ республикэ стадионэу «Зэкъошныгъэм» щыIагъэх, шъхьа­фит бэнэнымкIэ спорт еджапIэм, дзюдомкIэ Олимпиадэхэм ахэлэжьэщтхэр зыщагъэхьазырырэ спорт еджапIэу Кобл Якъубэ ыцIэ зыхьырэм тренировкэхэр зэращыкIохэрэм яплъыгъэх, пчыхьэм культурэм и Унэу «Гигантым» республикэм испортсмен ныбжьыкIэхэм ахэр щаIукIа­гъэх.

АР-м и ЛIышъхьэ ипресс-къулыкъу