Урысые Федерацием кушъхьэфэчъэ спортымкIэ ишъхьэзэкъо зэнэкъокъу мэкъуогъум и 23-м къалэу Саранскэ щыкIуагъ.

Мыжъо гъогум километрэ 29-рэ спортсменхэм къыща­кIугъ. Адыгэ Республикэм кушъхьэ­фэчъэ спортымкIэ иеджапIэ зыщызыгъэсэрэ Александр Евтушенкэм километрэ 29-р такъикъ 35:10-кIэ къызэринэ­кIыгъ, дышъэ медалыр хэгъэгум изэнэкъокъу къыщихьыгъ.

ЯтIонэрэ чIыпIэр Тюмень хэкум щыщэу Петр Рикуновым фагъэшъошагъ – уахътэр 36:13. Москва щыпсэурэ Виктор Манаковым ящэнэрэ чIыпIэр къы­дихыгъ.

Александр Евтушенкэр Урысыем кушъхьэфэчъэ спортымкIэ ихэшыпыкIыгъэ командэ хэт, тренерыр Анатолий Лелюк. А. Евтушенкэм къыдихыгъэ дышъэ медалыр къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фегъэхьы.

ЕмтIылъ Нурбый.

Сурэтым итхэр: Александр Евтушенкэр зэнэкъокъум хэлэжьагъэхэм агузэгу ит.