Дунэе мэхьанэ зиIэ литературнэ зэнэкъокъоу «ЦIыкIужъый» зыфиIорэр Адыгеим щэкIо. Сабыйхэм апае анахь усабэ зикъэлэмыпэ къычIэкIыгъэ адыгэ тхакIоу Жэнэ Къырымызэ ыцIэкIэ ар зэхащэ.

Театральнэ продюсерэу, гъэсэныгъэ гупчэу «Полярис Адыгея» зыфиIорэм ишъолъыр Совет хэтэу КIуращынэ Лейлэ ащ икIэщакIу. АКъУ-м зэдэлэжьэныгъэ дыриIэу, адыгэ филологиемкIэ факультетым икIэлэегъаджэхэр Iофтхьабзэм ирегъэкIокIын хэлажьэх. Мэкъуогъум щегъэжьагъэу зэнэкъокъур макIо. Илъэс 18-м къыщыублагъэу ныбжь зиIэхэу сабыйхэм апае тхэхэрэр зэкIэ хэлэжьэнхэ алъэкIыщт.

— Апэрэ мазэу кIуагъэм IофшIэгъэ 50-м ехъу къагъэхьыгъах. КъэIогъэн фае, зэнэкъокъум лъэныкъуищ къыды­хэлъытагъ: прозэр, адыгабзэкIи урысыбзэкIи усэ тхыныр; зэдзэкIыныр (адыгабзэр — урысыбзэм, урысыбзэр — адыгабзэм арыплъхьаныр) ыкIи сабыйхэм апае тхыгъэ IофшIагъэхэм апае сурэтхэр шIыгъэнхэр, – непэрэ мафэм ехъулIэу зэнэкъокъур зэрэкIорэм тыщегъэгъуазэ филологие шIэныгъэхэмкIэ кандидатэу, адыгэ филологиемкIэ кафедрэм идоцентэу ыкIи литературнэ зэнэкъокъум иосэшI куп хэтэу Хъуажъ Нуриет.

Зэнэкъокъур Урысыем илитературнэ зэнэкъокъухэм ясатырэ хэт. Ащ ихьатыркIэ хэлажьэхэрэр къэралыгъом ишъолъыр зэфэшъхьафхэм ямызакъоу IэкIыб къэралыгъохэми къарэтхыкIых. Боснием, Казахстан, Башкортостан, Москва, Адыгеим ичIыпIэ зэфэшъхьаф­хэм IофшIагъэхэр къарыкIыгъэх. Зэнэкъо­къум дунэе хъытыум нэкIубгъохэр щыриIэхэу, чанэу Iоф ашIэ, къэбарыкIэу Iофтхьабзэм фэгъэхьыгъэхэр къырагъа­хьэх. Къыхэгъэщыгъэн фае, зэнэкъо­къум ежь тамыгъэ хэушъхьафыкIыгъэ иIэ хъугъэ. Адыгэ сурэтышIэу ТIэшъу Мэзагъо IофшIагъэу «Мэзгуащ» зыфиIорэр ащ пае хэушъхьафыкIыгъэу ышIыгъ.

— Фэдэ литературнэ зэнэкъокъу ин Адыгеим зэрэщызэхащэрэр апэрэ. КIуращынэ Лейлэ ащкIэ «Тхьауегъэпсэу» етIо тшIоигъу. Ишъыпкъэу, ыгу етыгъэу, фаблэу ащ дэлажьэ. Хэлажьэхэрэм ежь ышъхьэкIэ афытеозэ, адэгущыIэзэ Iоф ешIэ. Ежьыри сабыйхэм апае гъэшIэгъо­нэу, дэгъоу матхэ. Ипшъэрылъыр — сэнаущыгъэ ин зыхэлъ тхакIохэу сабыйхэм апае усэхэрэр къэгъотыгъэнхэр, ахэр цIыфхэм ягъэшIэгъэнхэр, лъэпкъ культурэм ылъапсэхэр икъоу сабыйхэм анэгъэсыгъэнымкIэ IофшIэным хэгъэлэжьэгъэнхэр ары, — тыщегъэгъуазэ Хъуажъ Нуриет.

ПстэумкIи осэшI купым нэбгырэ 12 хэт. Ахэр зэлъашIэрэ тхакIох, сурэтышIых, искусствоведых, шIэныгъэлэжьых ыкIи тхылъмэ якъыдэгъэкIын дэлэжьэрэ цIыфых. Зэнэкъокъоу «ЦIыкIужъый» зыфиIорэм хэлажьэ зышIоигъохэм шы­шъхьэIум и 31-м нэс уахътэ яI. Гъэмафэм иаужырэ мафэ къыдыхиубытэу IофшIагъэхэр аугъоищтых. Iофтхьабзэм изэфэхьысыжьхэри нахь кIасэу, шэкIогъум и 15-м, къэнэфэщтых. Дунэе хъытыум щыряIэ нэкIубгъом зэфэхьысыжь къэбархэр къырагъэхьащтых. ЫужкIэ текIоныгъэ къыдэзыххэрэм яIофшIагъэ­хэр къыхаутыщтых, тхылъщэпIэ ермэлыкъхэм ыкIи фестиваль зэфэшъхьафхэм къащагъэлъэгъощтых. ЗэхэщакIохэм къызэраIорэмкIэ, литературнэ зэнэкъо­къум щыIэныгъэ кIыхьэ фагъэнафэ, илъэсыбэ IофшIэныр рахъухьэ. Анцокъо Ирин.