Икъашъо ищыIакIэ дештэ
Адыгэ Республикэм и Къэралыгъо академическэ лъэпкъ ансамблэу «Налмэсым» имэфэкI фэгъэхьыгъэ пчыхьэзэхахьэ мэкъуогъум и 17-м Мыекъуапэ щыкIуагъ.
«Налмэсым» и Унэ культурэм, искусствэм яIофышIэхэр, лъэпкъ къашъор зышIогъэшIэгъонхэр щызэIукIагъэх. Урысыем, Адыгеим янароднэ артистэу, Абхъазым, Пшызэ язаслуженнэ артистэу Кукэнэ Мурат пчыхьэзэхахьэр зэрищагъ. Ипэублэ гущыIэ М. Куканэм щыхигъэунэфыкIыгъ «Налмэсым» щыIэныгъэм гъогу шIагъо къызэрэщикIугъэр.
— «Налмэсым» къашъор дахэу къышIызэ тегъэгушIо, гъэхъагъэу ышIырэмкIэ Адыгэ Республикэм ыцIэ лъагэу дунаим щеIэты. «Налмэсыр» хэгъэгум ымакъ, Адыгеим икультурэ инамыс. Сэнаущыгъэ зыхэлъ лIэуж пчъагъэхэм «Налмэсыр» яIофшIагъ, — къыIуагъ Кукэнэ Мурат.
1936-рэ илъэсым ансамблэр зызэхащэм, колхозхэм ялэжьапIэхэм къащышъоу ригъажьи, зыпкъ иуцуагъ, тихэгъэгу имызакъоу, дунаим щызэлъашIагъ. Непэ «Налмэсыр» Урысыем, IэкIыб хэгъэгухэм яконцерт къэтыпIэ анахь дэгъухэм къащэшъо, ащкIэ лъэпкъхэр зэфещэх, щытхъур Адыгеим къыфехьы.
Лъэхъэнэ зэфэшъхьафхэм къиныбэ зэпызычыгъэ адыгэ лъэпкъым фэусагъэр макIэп. Кукэнэ Мурат гупшысэ ин зыхэлъ усэу Къуекъо Налбый ытхыгъэм щыщ пычыгъом IупкIэу къеджагъ.
ТичIыгуи хафэп Сигъогуи стафэп. Сипшъашъи мафэ Сишъауи зафэ Адыгэ чIыгум гу щысэгъаф…
Концертыр
МэфэкI концертым «Налмэсыр» щыуджыгъ. Ижъырэ къашъохэм къащегъэжьагъэу джырэ уахътэ ансамблэм къышIыхэрэр зэхэпхъагъэхэу артистхэм къагъэлъэгъуагъэх. Къашъоу «Ислъамыер», лъэпкъ орэдхэу «Си Пакъ» зыфиIорэм, «Къэгъэзэжьым», нэмыкIхэм атехыгъэ къашъохэр уяплъынкIэ гъэшIэгъоных. «ШIуфэс къашъор» гъэпсыкIэу иIэмкIэ зыми хэкIуакIэрэп. «Адыгэ уджыхэр» лъэпкъ шэн-хабзэхэм къапкъырэкIых.
— Адыгэхэм ятарихъ, ящыIакIэ тикъашъохэмкIэ къэдгъэлъагъохэзэ, нэмыкI лъэпкъхэм искусствэм ыбзэкIэ тадэгущыIэ, талъэIэсы, — къыIуагъ «Налмэсым» ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ язаслуженнэ артистэу, Адыгеим инароднэ артистэу Хъоджэе Аслъан.
КъафэгушIуагъэх
Адыгэ Республикэм культурэмкIэ иминистрэу Аулъэ Юрэ ти ЛIышъхьэу КъумпIыл Мурат, Правительствэм ацIэкIэ «Налмэсым» къыфэгушIуагъ. Адыгеим и Парламент и Комитет ипащэу Наталья Широковар республикэм и Къэралыгъо Совет — Хасэм ыцIэкIэ зэхахьэм къыщыгущыIагъ, щытхъу тхылъхэр аритыжьыгъэх.
Абхъазым и Правительствэ ыцIэкIэ зэхахьэм къыщыгущыIэгъэ Зураб Марсалие Адыгеим иныбджэгъушIу. Лъэпкъхэм язэпхыныгъэ нахь пытэ хъуным «Налмэсыр» зэрэфэлажьэрэр, шIушIагъэу иIэхэр З. Марсалие хигъэунэфыкIыгъэх.
Къэбэртэе-Бэлъкъарым и Къэралыгъо академическэ къэшъокIо ансамблэу «Кабардинкэм» ихудожественнэ пащэу, Адыгэ Республикэм изаслуженнэ артистэу Iэтэбый Игорь гущыIэ фабэхэр пчыхьэзэхахьэм къыщиIуагъэх.
«Кабардинкэмрэ» «Налмэсымрэ» зэгъусэхэу Налщык, Мыекъуапэ, Москва, нэмыкIхэм концертхэр тапэкIи къащатыщтых. «Налмэсым» июбилей фэгъэхьыгъэ концертым «Кабардинкэр» щыуджыгъ, «Къашъо» зыфиIорэр, нэмыкIхэри къышIыгъэх.
Къэрэщэе-Щэрджэсым и Къэралыгъо ансамблэу «Эльбрусыр», Къэрэщэе-Щэрджэсым къашъомкIэ и Къэралыгъо театрэу «Меркурий» зыфиIорэр «Налмэсым» иконцерт хэлэжьагъэх, лъэпкъ къашъохэр къашIыгъэх.
«Меркурием» ихудожественнэ пащэу, ибалетмейстер шъхьаIэу, Къэрэщэе-Щэрджэсым, Абхъазым язаслуженнэ артистэу Мурат Хагиевым зэрэхигъэунэфыкIыгъэу, «Налмэсым» артист цIэрыIуабэ щагъэсагъ, пчыхьэзэхахьэм гущыIэгъу щызэфэхъугъэхэм гукъэкIыжь гъэшIэгъонхэр яIэх.
Абхъазым и Къэралыгъо ансамблэу «Шаратыным» ихудожественнэ пащэу Руслан Бебие, Адыгеим инароднэ артистэу, Абхъазым изаслуженнэ артистэу НэмытIэкъо Аслъан, Урысыем изаслуженнэ артистэу, Адыгеим инароднэ артистэу Къулэ Мыхьамэт, нэмыкIхэм язэдэгущыIэгъухэм тахэлэжьагъ. Къашъом псэ зэрэпытыр къыхагъэщызэ, искусствэм ихэхъоныгъэхэм яеплъыкIэхэр къыраIолIагъэх.
Искусствэм щыцIэрыIохэ Хъот Заур, Зыхьэ Заурбый, Урысыем, Адыгеим язаслуженнэ тренерэу Хъот Юныс, республикэ общественнэ движениеу «Адыгэ Хасэм» культурэмкIэ икомитет хэтыхэу ГъукIэлI Сусан, Унэрэкъо Гулэз, шIэныгъэлэжьэу Ахътэо Руслъан, нэмыкIхэу гущыIэгъу тызыфэхъугъэхэм «Налмэсыр» агъэлъапIэ. Гум къигущыIыкIырэ ансамблэм иартистхэм аготыхэу сурэтхэр нэбгырэ пшIы пчъагъэмэ атырахыгъэх.
«Налмэсым» непэ Iоф щызышIэхэрэм афэгушIуагъэх, щытхъу тхылъхэр аратыжьыгъэх.
«Налмэсым» изыгъэпсэфыгъо уахътэ къэсыгъэми, республикэм щыкIорэ зэхахьэхэм ахэлэжьэщт. Москва бэдзэогъу мазэм кIощт.
— АР-м и ЛIышъхьэу КъумпIыл Мурат, Правительствэм, Парламентым гущыIэ къодыеу щымытэу гукIэ тафэраз, «тхьашъуегъэпсэу» ятэIожьы, — къыIуагъ Хъоджэе Аслъан.
Пчыхьэзэхахьэр сыхьати 4 фэдизрэ кIуагъэ. Концертым иятIонэрэ едзыгъо къош республикэхэм яансамблэхэм къашIыгъ. «Налмэсым» иартистхэр дахэу фэпагъэхэу залым чIэсхэу пчыхьэзэхахьэм еплъыгъэх.
ЕмтIылъ Нурбый.