«Ставропольер» «Ошъадэм» иныбджэгъу
Ставрополь краимрэ Адыгэ Республикэмрэ язэпхыныгъэхэр искусствэм щэпытэх.
Адыгеим и Къэралыгъо филармоние «Урысыер. Хэгъэгур. ЗыкIыныгъэр» зыфиIорэ концертыр щыкIуагъ. Урысыем и Мафэ фэгъэхьыгъэ зэхахьэм къэралыгъо орэдыIо-къэшъокIо къэзэкъ ансамблэу «Ставропольер», Мыекъуапэ итворческэ IофшIапIэу «Ошъадэр» хэлэжьагъэх.
Пчыхьэзэхахьэм иапэрэ едзыгъо «Ставропольем» лIыхъужъныгъэм, IофшIэным, сэмэркъэум, нэмыкIхэм яхьылIэгъэ къэзэкъ орэдхэр къыIуагъэх, лъэпкъ къашъохэр къышIыгъэх. Къэзэкъ дзэкIолIым, шыум афэгъэхьыгъэ орэдхэр щыIэныгъэм къыхахыгъэх.
Художественнэ амалхэр агъэфедэхэзэ лъэпкъ къашъохэу къагъэлъэгъуагъэхэр гум рехьых. Шъуашэхэр дахэх. Шъо зэфэшъхьафхэмкIэ гъэкIэрэкIэгъэ кусэхэр къашъохэм ахэгъэщагъэхэу лъэпкъ искусствэр къыраIотыкIы.
Сэмэркъэу зыхэлъ орэдхэр шIулъэгъум, цIыф зэфыщытыкIэхэм нахь афэгъэхьыгъэх. Бзылъфыгъэм ишэн-хабзэхэр унагъом ипсэукIэ зэрэдиштэхэрэм уядэIункIэ гъэшIэгъоных.
Адыгэ орэдхэр
Лъэпкъ орэдыIо ансамблэу «Ащэмэзым» пэсэрэ адыгэ орэдхэр къыIуагъэх. Адыгэ шъуашэр артистхэм къякIоу ащыгъ, уядэIузэ лъэпкъым къыкIугъэ гъогум зыщыогъэгъуазэ. ОрэдыIоу Хъурэнэ Азэ адыгабзэкIи, урысыбзэкIи къыхидзэгъэ орэдхэр щыIэныгъэм дештэх. Артисткэр дахэу, зэкIужьэу зэрэфэпагъэри къыхэдгъэщы тшIоигъу. Шэуджэн Рустам зипэщэ лъэпкъ оркестрэм адыгэ мэкъамэхэр ыгъэIугъэх. ШыкIэпщынаоу ЛIыбзыу Шан бзэпсхэр ыгъэжъынчыхэзэ лъэпкъ орэдышъохэр къырегъаIох. Нэгъой Заур, Шэуджэн Юлианэ, нэмыкI артистхэу оркестрэм хэтхэм ядэIугъэхэр агъэгушIуагъэх.
Ижъырэ къашъоу «Ислъамыер» артистхэм къызэрашIырэ шIыкIэри лъэхъаным дештэ. Едыдж Викторие къашъор зегъэуцум зыми фэмыдэ шIыкIэхэр ыгъэфедагъэх.
ЕплъыкIэхэр
Адыгэ Республикэм культурэмкIэ и Министерствэ иотдел ипащэу Шэуджэн Бэлэ, Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ, культурэм щызэлъашIэхэрэ Хъот Заур, Къулэ Амэрбый, Нэхэе Тэмарэ, нэмыкIхэу концертым еплъыгъэхэм искусствэм лъэпкъхэр зэрэзэфищэхэрэм мэхьэнэ ин ратыгъ. Уигъунэгъоу къыбдэпсэурэм икультурэ дэгъоу зэбгъашIэмэ щыIэныгъэм къызэрэщыотэжьырэм къытегущыIагъэх.
«Ставропольем» ихудожественнэ пащэ игуадзэу Юрий Зель, «Ошъадэм» ихудожественнэ пащэу, Адыгэ Республикэм изаслуженнэ артисткэу Едыдж Викторие зэхахьэм къыщыгущыIагъэх. Шъолъырхэр тапэкIи зэрэзэлъыкIощтхэр, концертхэмкIэ зэрэзэхъожьыщтхэр къаIуагъ. Пчыхьэзэхахьэм икIэухым «Ставропольемрэ» «Ошъадэмрэ» зыкIыныгъэм фэгъэхьыгъэ орэдыр къызэдаIуагъ.