Хъут Малыч Шъэлихьэ ыкъор
Адыгеим автономие иIэ зыхъугъэ илъэсым къыщыублагъэу непэрэ мафэхэм къанэсэу хэку партийнэ ыкIи гъэцэкIэкIо хэбзэ къулыкъухэм пащэу яIагъэхэм япчъагъэ нэбгырэ 30-м ехъу. Ахэр хэкум ианахь цIыф гъэсагъэмэ ащыщыгъэх. Хэгъэгум шъыпкъагъэу, шIулъэгъоу фыряIагъэмкIэ апшъэ укIон умылъэкIынэу, щыIэкIэ-псэукIэу цIыфмэ яIэр нахьышIу зэрашIыщтым ахэр псэемыблэжьэу фэбанэщтыгъэх. ЩэIэгъэшхорэ щэчыгъэшхорэ ахэлъэу IэнэтIэ хьылъэр зэрахьэщтыгъ, къалэжьыгъэуи хэкум идышъэ кIэнхэу ихъишъэ щыщ хъугъэх.
А пэщэ пстэуми, шIэныгъэу иIагъэмкIи, шъыпкъагъэу, цIыфыгъэ-Iэдэбыгъэу хэлъыгъэмкIи, Хъут Малыч Шъэлихьэ ыкъор къахэщы. Сэ сшъхьэкIэ, хэбзэ гъэцэкIэкIо къулыкъухэм Iоф ащысэшIэфэ, цIыф зэхэдз имыIэу, зэкIэри изэфэдэу, мыгупсэфэу, бэмыIо-башIэу ащ фэдэу зэмыблэжьэу Iоф зышIэгъэ пащэ сырихьылIагъэп. Ащ пэщэныгъэр зыщиIыгъыгъэ лъэхъаным Iофэу зэрихьагъэм ишIуагъэкIэ хэкум иэкономики, икультури, исоциальнэ фэIо-фашIэхэми инэу зыкъаIэтыгъ. Тхыгъэ кIэкIым Малыч зэрихьэгъэ Iофмэ, гъэхъагъэу ышIыгъэмэ зэкIэмэ уащылъыIэсын плъэкIыщтэп. Арэу щытми, адрэ пащэхэм къахэзыгъэщэу шэн-зекIуакIэу хэлъыгъэхэр, игупшысэ зынэсыщтыгъэр щысэ заулэкIэ къэзгъэлъагъомэ сшIоигъу. Апэу ышъхьэ иIофкIэ къезгъэжьэн.
Хъут Малыч 1932-рэ илъэсым жъоныгъуакIэм и 9-м Теуцожь районым ит къуаджэу Джэджэхьаблэ къыщыхъугъ. Пэублэ еджапIэу къуаджэм дэтыр къызеухым, район гупчэу Пэнэжьыкъуае дэт гурыт еджапIэм щеджагъ. Ахэм ауж Кубанскэ мэкъумэщ институтыр 1956-рэ илъэсым къыухыгъ. 1958-рэ илъэсым къыщыублагъэу КПСС-м исатырхэм ахэтыгъ. Малыч IофшIэныр Теуцожь районым и МТС участковэ агрономэу щыригъэжьагъ. Колхозэу «Октябрэм» иагроном шъхьэIагъ, нэужым тхьаматэм игуадзэу щылэжьагъ, етIанэ Теуцожь районым мэкъумэщ хъызмэтымкIэ инспекциеу иIэм ипэщагъ. Ахэм ауж гугъэпIэ инхэр къэзытырэ специалист ныбжьыкIэр хэку исполкомым имэкъумэщ IофшIапIэ къащэжьы. Партием и Адыгэ хэку комитет иапэрэ секретарь иIэпыIэгъоу Iоф ышIагъ, мэкъумэщ хъызмэтымкIэ хэку комитетым иотдел пэщэныгъэ дызэрихьагъ. 1968-рэ илъэсым къыщыублагъэу 1979-м нэс Адыгэ хэку исполкомым итхьамэтагъ, 1979 — 1983-рэ илъэсхэм Краснодар крайисполкомым итхьаматэ игуадзэу Iоф ышIагъ, 1983-рэ илъэсым къыщегъэжьагъэу дунаим ехыжьыфэкIэ (1989-рэ илъэсым нэс) партием и Адыгэ хэку комитет иапэрэ секретарыгъ.
Малыч масличнэ, эфиромасличнэ культурэхэмкIэ научнэ— ушэтыпIэ институтым (ВНИИ) иаспирантурэ къыухыгъ, экономикэ шIэныгъэхэмкIэ кандидат хъугъэ. Адыгэ хэкум ыкIи Краснодар краим янароднэ депутатхэм я Советхэм ядепутатэу мызэу, мытIоу хадзыгъ, СССР-м, РСФСР-м я Апшъэрэ Советхэм ядепутатыгъ, КПСС-м и ЦК ия XXIV — XXVII-рэ зэфэсхэм ахэлэжьагъ. ЛэжьэкIо Быракъ Плъыжьым иорденэу щы къыратыгъ, «Знак Почета» зыфиIорэр, медаль зэфэшъхьафхэр къыфагъэшъошагъэх.
Малыч Адыгэ хэку исполкомым итхьаматэу зыщылэжьэгъэ лъэхъаныр хэкум анахь Iофышхохэр зыщырахьыжьэгъэ илъэсхэм атефэгъагъ. Автоном хэкур загъэпсыгъэр илъэс 50 зэрэхъурэм ипэгъокIэу 1972-рэ илъэсым социальнэ-экономическэ ыкIи культурнэ хэхъоныгъэхэр егъэшIыгъэнхэм афэгъэхьыгъэ тхылъхэр зэхигъэуцуагъэх. Хэкум Iофтхьабзэу щызэрахьащтхэр зыщыгъэнэфэгъэ унашъор а илъэс дэдэм гъэтхапэм и 10-м РСФСР-м и Апшъэрэ Совет ыштэгъагъ. А унашъом диштэу мэкъумэщ хъызмэтым хэхъоныгъэхэр ышIыхэу ригъэжьагъ. Лэжьыгъэхэр псы акIагъахъозэ къагъэкIыхэу аублагъ. Былымхъунымрэ чэтхъунымрэ зыкъаIэтыгъ. Лым, щэм, хьаджыгъэм, хэтэрыкIхэм, пхъэшъхьэ-мышъхьэхэм гъомылапхъэхэр ахэзышIыкIырэ IофшIапIэхэр, IэшIу— IушIухэр, былымIусхэр къыдэзыгъэкIырэ хъызмэтшIапIэхэр хэкум щагъэпсыгъэх. Районхэм якъопэ зэфэшъхьафхэм потребкооперацием, продпромторгым щэпIэ-щэфапIэхэр, унэгъо фэIо-фашIэхэр зыщагъэцэкIэрэ IофшIапIэхэр къащызэIуахыгъэх.
Заводхэу «Дружбэр», «Промсвязыр», «Фрунзэр», «Редукторнэр», целлюлоз-картонышI, кIэпсэшI, сэнэшI, ахэм анэмыкIхэу псэолъэшIыным щагъэфедэрэ пкъыгъохэр къыдэзыгъэкIырэ хъызмэтшIапIэхэри, нэмыкIхэри а лъэхъаным хэкум щашIыгъэх. Мыекъуапэ итыгъэкъохьапIэкIэ гъэзагъэу микрорайон пчъагъэ цIыфхэр щыпсэунхэу ашIыгъ. Хэкум ит псэупIэхэм гъогухэр, газыр, псыр, электричествэр, связыр яIэ хъугъэ.
Адыгэ хэку исполкомым иотделхэм япащэхэр Малыч ягъусэу зынэмысыгъэхэ федеральнэ министерствэ щыIэп. Ежь Москва къызыкIокIэ къытлъыхъущтыгъ, а уахътэм къэлэ шъхьаIэм щыIэу къыгъотырэр IэпыIэгъу ышIыщтыгъ. Iофэу зэдихьырэр багъэ. Тэри ащ тызэрэхэлажьэрэр гъэсэпIэшIу тфэхъущтыгъ. Тыдэ тыкIуагъэми, Малыч шъхьэкIэфагъэ хэлъэу къыщыпэгъокIыщтыгъэх. Ежь Iэдэбэу хэлъым къыхэкIэу зыдэгущыIэхэрэр зэрягуапэр къахэщэу къедэIущтыгъэх. Нэбгырэ пэпчъ едэIунэу ежьыри щэIагъэ иIагъ.
Сыгу къэкIыжьы: Мыекъопэ псырыкIуапIэм заказчикэу иIэр зызэблахъум, проектыр СССР-м и Минводхоз къитщыжьынышъ, УФ-м и Госстрой экспертизэ икIэрыкIэу щашIыжьынэу тщэжьын фаеу хъугъагъэ. Малыч Москва щыIэу ар зызэхехым, УФ-м и Правительствэ машинэр къыIихи, Госстроим проектыр тигъэщэжьыгъагъ. Къызготэу машинэм зэрифэу къыздиушъагъэх, етIанэ тызэдеIэзэ яплIэнэрэ къатым дэтхьыежьыгъэх. Госстроим проектым осэ ин къыфишIи, щысэтехыпIэу ылъытэгъагъ.
ПсырыкIуапIэм ишIын фэгъэхьыгъэ титулыр аштэным фэшI Госпланым иотдел 32-рэ къыкIэтхэжьын фаеу хъугъагъэ. Ахэр къатихмэ зэбгырыдзыгъэу атетыгъэх (джырэ Къэралыгъо Думэр зычIэт хъужьыгъэр ары). ШышъхьэIу мэзагъ, фабэр градус 40-м нэсыщтыгъ, мафэм джанэр зытIо-зыщэ зэблэтхъунэу хъущтыгъэ. Тинасыпти, Госпланыр хьакIэщэу «Москва» пэмычыжьэу щытыгъ. Апэрэ илъэсым псырыкIуапIэм пэIухьащт ахъщэр агъэунэфы зэхъум, Главкым ипащэрэ Малычрэ зым хигъэкIымэ, адрэм хигъахъозэ, къэлэмыр пчъагъэрэ зэIэпахыгъ. Малыч ежь зыфиIуагъэм афытекIыгъэп ыкIи пхыригъэкIыгъ. Главкым ипащэ рымыразэу къеплъы зэхъум «Мы пчъагъэхэм акIыб цIыфхэр дэтых, ахэр згъэпцIэнхэ сыфитэп» риIогъагъ. Ащ тетэу 1979-рэ илъэсым, пIалъэм къыпэу, псырыкIуапIэм ишIын рагъэжьэгъагъ.
Поселкэу Тульскэм район сымэджэщэу щашIырэр аухыщтыгъ, ау псы шIоир зыщаукъэбзырэ чIыпIэр хьазырыгъэп. Малыч хэкIыпIэ лъыхъоу шIэгъэн фаемкIэ щысымэ зырызэу яупчIыгъ. Сэ къызысэнэсым, ащ псы шIоеу къикIырэр Мыекъопэ къэлэ укъэбзыпIэм къэщагъэмэ нахь тэрэзэу къэсIуагъ. Малыч проектировщикмэ лъэшэу яцIэцIагъ Мыекъуапэ дэс цIыфхэр зашъорэ псыхъом а псы шIоир хэлъэдэжьынэу зэрашIыгъэм фэшI. А чIыпIэ дэдэм трубэхэр къэзышIырэ заводэу Краснодар дэтым ипащэ телефонымкIэ фытеуи, ащ пэIухьащт километрэ 16-р къаратынэу езэгъыгъагъ. Iофри псынкIэу зэшIохыгъэ хъугъагъэ.
Мыекъуапэ троллейбус кIуапIэхэр щагъэпсыхэ зэхъуми Малыч иIахьышхо ащ хилъхьагъ. Ащ пае Москва пчъагъэрэ кIуагъэ. Депом чIэтыщт станокхэри, троллейбусхэри ащ ихьатыркIэ къытатыгъагъэх. Росавтодорым ипащэ ныбджэгъуныгъэу дыриIэм къыхэкIэу, мэшIоку гъогум шъхьарыкIырэ лъэмыджэу урамэу Шэуджэным ыцIэкIэ щытым телъыр Мыекъуапэ щытшIыгъагъ. Ащ ишIуагъэкIэ троллейбусыр къалэм итемыр лъэныкъокIэ гъэзэгъэ IофшIапIэмэ анэсэу хъугъагъэ.
Хэку театрэр рагъэжьэгъэ къодыеу (непэрэ Филармониер ары) а илъэс дэдэм культурэм епхыгъэ псэуалъэхэу цIыф жъугъэхэр къызэкIуалIэхэрэр Урысыем щамыгъэуцунхэу, рагъэжьагъэхэри къызэтырагъэуцонхэу федеральнэ унашъо къыдэкIыгъагъ. Ащ пае къэмынэу драматическэ театрэр къызэтемыуцоу ашIынэу Малыч фитыныгъэ къыдихыгъагъ. Ар ашIы зэхъум метрэ 24-рэ зикIыхьэгъэ гъучI бгыкъухэу унашъхьэм тырагъэуцохэрэр хэгъэгум рагъотагъэхэп. Ахэр Грузием щашIыхэу къычIэкIыгъ. Малыч хэку культурэм ипащэ гъусэ ешIышъ, псэолъэшIмэ япащэ акIыгъоу, Грузием макIохэшъ, а бгыкъухэр къафашIынхэу къязэгъых. Ащ фэдэу Малыч зэрихьагъэу, гу зылъитагъэу зигугъу къэпшIынэу щыIэр гъунэнчъ.
Малыч ицIыф гъэпсыкIэкIэ гулъытэшхо иIагъ, гъунэ зылъимыфырэ щыIагъэп. Пчъагъэрэ къыхэкIыщтыгъ Москва тыкъикIыжьэу ом зыкъызэблихъумэ Краснодар иаэропорт самолетыр щамыгъэтIысэу Ростов, Анапэ е нэмыкI къалэ горэм къыщытIысэу. Джащыгъум Малыч имашинэ ащ къыгъакIоти, зэкIэми тиугъоижьыти, тыкъыдищэжьыщтыгъ.
Малыч адыгабзэр дэгъоу ышIэщтыгъ, ащ изытет гъунэ лъифыщтыгъ. Адыгэ литературэм ыбзэрэ грамматикэм хабзэу хэлъхэмрэ язэгъэфэн ынаIэ тыригъэтыщтыгъ. Илъэсым къыкIоцI ахэм афэгъэхьыгъэу зытIо-зыщэ исполкомым щыхэплъэнхэу народнэ образованием зи къахимылъхьагъэмэ, емыкIушхоу афилъэгъущтыгъ. ЕтIани, къэIогъэн фаер, тхьаусыхэ зиIэу исполкомым къакIорэ пстэуми тынаIэ атетын, IэпыIэгъу тафэхъун зэрэфаер ренэу къызэрэхигъэщыщтыгъэр ары. «Егъэзыгъэм къыхэкIэу зыкъытфагъазэ. Тэ тшъхьарыкIхэу ахэр зыдэкIожьынхэ щыIэп. ЦIыфыр къин чIыпIэу зэрыфагъэр зэхэфыгъэу дгъэрэзэн, тыдеIэн фае. Ахэм шъузэрапэгъокIырэ шIыкIэр хабзэм напэ фэхъужьы», — ыIощтыгъ.
Малыч шIэныгъэлэжь-агрономэу зэрэщытыгъэм елъытыгъэу мэкъумэщ хъызмэтым хэхъоныгъэхэр ышIынхэм, пынджлэжьыным игъэпсын, Адыгэкъалэ ишIын иIахьэу ахилъхьагъэхэм хэушъхьафыкIыгъэу ягугъу къэпшIыныр тефэ. Сэ сишIошIыкIэ, IофшIэгъоу а лъэхъаным иIагъэхэм, готыгъэхэм ар зэрифэшъуашэм тетэу къаIотэн, къатхыжьын алъэкIыщт. Малыч ар къылэжьыгъ! ЧIыгум пылъхэр зэкIэ, звеньевойхэм, бригадирхэм, мэкъумэщышIэ пэрытхэм къащегъэжьагъэу пащэхэм анэсыжьэу, инэIосагъэх, ышIэщтыгъэх.
Ащ пэщэныгъэ зыщызэрихьэгъэ илъэсхэм Урысые хэгъэгум иапшъэрэ тын лъапIэу Лениным иорден, Лъэпкъхэм язэкъошныгъэ иорден къыфагъэшъошагъэх. РСФСР-м иминистрэхэм я Советрэ, ВЦСПС-мрэ ябыракъэу зэIэпахырэр мызэу, мытIоу хэкум къыратыгъ. Краснодар краим Iоф щешIэфэ Адыгеимрэ краимрэ азыфагу зэгурыIоныгъэ, зэкъошныгъэ илъыным лъэпсэшIу фишIын ылъэкIыгъ.
Малыч унэгъо зэгъэфэгъэ дахэ иIагъ. Ишъхьэгъусэрэ ежьыррэ къуитIу зэдапIугъ, зэдалэжьыгъ — Аслъанрэ Руслъанрэ. ТIуми шIэныгъэ дэгъухэр агъотыгъэх, унагъохэри лъфыгъэхэри яIэх, щыIэныгъэми чIыпIэ гъэнэфагъэ щаубытыгъ. Илъэс 56-рэ ныIэп Малыч къыгъэшIагъэр. Адыгеир республикэ хъуным, цIыфхэр нахьышIоу щыIэнхэм ыгурэ ыпсэрэ ахилъхьагъ. Ащ зэрихьэгъэ Iофхэр непэрэ щыIакIэм, тыдэ уплъагъэми, къыхэщых. КъыгъэшIэгъэ илъэсхэм хэмыкIокIэжьынэу лъэуж дахэ къыгъэнагъ, Iоф дэзышIагъэхэми, зышIэщтыгъэхэми шIукIэ агу къинэжьыгъ.
ГЪУКIЭЛI Нурбый. Адыгеим инахьыжъхэм я Совет и Тхьамат.