ЛIыхъужъхэм афэгъэхьыгъэ зэIукIэгъухэр
Советскэ Союзым и ЛIыхъужъэу Андырхъое Хъусен фэгъэхьыгъэ шIэжь зэнэкъокъу панкратионымкIэ Мыекъуапэ щыкIуагъ.
Адыгэ къэралыгъо университетым испорт Унэшхоу Кобл Якъубэ ыцIэ зыхьырэм Урысыем ишъолъыр 22-мэ якомандэ 36-рэ, бэнэкIо 350-рэ щызэIукIагъ. Советскэ Союзым и УIэшыгъэ КIуачIэхэм Хэгъэгу зэошхом ТекIоныгъэр къызыщыдахыгъэр илъэс 77-рэ, Урысыем ДОСААФ-р зыщызэхащагъэр илъэс 95-рэ зэрэхъухэрэм афэгъэхьыгъэ зэнэкъокъум АР-м панкратионымкIэ и Федерацие кIэщакIо фэхъугъ. Адыгэ Республикэм физкультурэмкIэ ыкIи спортымкIэ и Комитет, Урысыем ихьыкум приставхэм я ГъэIорышIапIэу АР-м щыIэр, республикэм и ДОСААФ спонсор фэхъугъэх.
ПанкратионымкIэ, IэкIэ зэбэнынхэмкIэ ыкIи шъхьэзэкъо зэнэкъокъухэмкIэ Адыгэ Республикэм и Федерацие зэхэщэгъэным икIэщакIор спортымкIэ апэрэ лъэгапIэр къызыфагъэшъошэгъэ судьяу Къэлэшъэо Аскар.
Советскэ Союзым и ЛIыхъужъхэу Андырхъое Хъусенрэ Къош Алыйрэ афэгъэхьыгъэ зэнэкъокъухэр республикэм щызэхэщэгъэнхэмкIэ А. Къэлэшъаом егъэжьапIэхэр ышIы-гъэх.
Кобл Якъубэ ыцIэ зыхьырэ спорт Унэшхом патриотическэ пIуныгъэм фэгъэхьыгъэ къэгъэлъэгъоныр къыщызэIуахыгъ. Юнармейцэхэм якупэу «Варягым», нэмыкIхэм яхьылIэгъэ къэбархэр зэхэщакIохэм къаIотагъэх.
Адыгэ Республикэм ыцIэкIэ зэнэкъокъум команди 6 хэлэжьагъ. Волонтерхэм В. В. Новарчук япащэу зэхэщэн Iофыгъохэр агъэцэкIагъэх.
Шъхьэзэкъо зэнэкъокъухэм якуп Сихъу Казбек, кг 62-рэ, Александр Ланиным, кг 92-рэ, апэрэ чIыпIэхэр къыщыдахыгъэх, Урысыем спортымкIэ имастер хъугъэх.
Илъэс 14 — 15 зыныбжьыхэм язэIукIэгъухэм Дмитрий Петрушиныр чанэу ахэлэжьагъ, спортымкIэ мастер хъуным фэшI кандидат шапхъэхэр къыгъэшъыпкъэжьыгъэх.
Андырхъое Хъусен фэгъэхьыгъэ шIэжь зэнэкъокъум Темыр Осетием — Аланием икомандэ апэрэ чIыпIэр къыщыдихыгъ. Ингушетием ятIонэрэ, Чэчэн Республикэм ящэнэрэ чIыпIэхэр ахьыгъэх. Адыгэ Республикэм икомандэ я 5-рэ чIыпIэр къыфагъэшъошагъ.
Къэлэшъэо Аскар зэнэкъокъум изэхэщэнкIэ IэпыIэгъу къафэхъугъэхэм лъэшэу афэраз. ШIэжь яIэу ныбжьыкIэхэр пIугъэнхэмкIэ ащ фэдэ спорт зэIукIэгъухэм ямэхьанэ зыкъызэриIэтырэр А. Къэлэшъаом хигъэунэфыкIыгъ. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ехьылIэгъэ зэIукIэгъухэм тибэнакIохэм зафагъэхьазыры.