«Ставрополье» Ставрополь — «АГУ-Адыиф» Мыекъуапэ — 20:19 (9:11). ШышъхьэIум и 14-м Ставрополь щызэдешIагъэх.

«АГУ-Адыиф»: къэлэпчъэIутхэр: Ламзина, Баскакова, ешIа­кIохэр: Краснокутская — 1, Никулина — 1, Кириллова — 1, Колодяжная — 2, С. Морозова, А. Морозова — 2, А. Куцевалова — 2, Казиханова — 5, Ка­занджян — 1, Кобл, Кожубеко­ва — 4. «Ставропольем» къыхэщыгъэ­хэр: Лунина — 5, Нефедова — 4, Бельчикова — 4.

Суперлигэм щешIэрэ гандбол командэхэу я 9-рэ чIыпIэм фэбанэхэрэр Ставрополь щызэIукIагъэх. Апэрэ ешIэгъоу Мыекъуапэ щыкIуагъэр 20:18-у аухыгъ. Ар къыдалъытэзэ, текIоныгъэр зы­хьыщтыр язэрэмыгъашIэу пшъа­шъэхэр зэнэкъокъугъэх. Пчъагъэр зэрэлъыкIуатэщты­гъэр: 1:2, 5:4, 6:8, 8:10. Я 30-рэ такъикъым 9:11. ЕшIэгъум иятIо­нэрэ едзыгъо «Адыифым» дэгъоу ригъэжьагъ — 12:15. Бысымхэр нахьыбэрэ апэкIэ къилъыхэу фежьагъэх. Пчъагъэр нахьыбэ зэрэхъурэм тигъэгумэкIыщтыгъ — 17:16, 18:16, 19:17. Я 55-рэ такъикъым 20:17, арэущтэу заухыкIэ «Ставропольем» я 9-рэ чIыпIэр ыхьыщт. Зы такъикъ тешIагъэу Алина Казанджян хъагъэм Iэгуаор ре-­ дзэ — 20:18. «Адыифыр» нахь псынкIэу, дахэу ешIэ. Уахътэр 59:01. Дарья Никулинам ухъумакIор къызэринэкIи, къэлапчъэм Iэгуаор дидзагъ — 20:19. «Ставропольер» ыпэкIэ псын­кIэу къилъыгъ, ау пчъагъэм хигъэхъон ылъэкIыгъэп. Пчъагъэр 20:19, уахътэр 59:51. Алина Морозовар къэлапчъэм зыдаом, къэлэпчъэпкъым Iэгуаор къыгъэлъэтэжьыгъ, зэIукIэгъур аухыгъ. ЕплъыкIэхэр — ЗэIукIэгъур гумэкIыгъоу кIуагъэ, — къытиIуагъ «Адыифым» итренер шъхьаIэу, Урысыем изаслуженнэ тренерэу Александр Реввэ. — «Адыифыр» зэщизэу, зыпкъ итэу ешIэн ылъэкIырэп. Пчъагъэр 15:12-у бысымхэм татекIозэ, тапэ ишъыжьыгъэх. Опыт тиешIакIохэм яIэп, зэнэкъокъум икъоу зыкъыщызэIуахыным фэ­хьазырхэп, ныбжьыкIаIох. А. Реввэ тиешIакIохэм къахигъэщыгъэх къэлэпчъэIутхэу Дарья Ламзинар, Людмила Баскаковар, ешIакIохэу Алина Колодяжнаяр, Диана Казихановар, Алина Морозовар. Ангелина Куцеваловам зэхэщэн Iофхэр дэгъоу ыгъэцэ­кIагъэх. Ащ Iэгуаор аритызэ, типшъашъэхэм гъогогъуищэ хъагъэм Iэгуаор радзагъ. «Адыифым» илъэс ешIэгъур ыухыгъ, суперлигэм я 9-рэ чIы­пIэр къыщыдихыгъ. «КъэкIощт илъэс ешIэгъум я 7-рэ чIыпIэм тыфэбэнэщт, — къытиIуагъ Александр Реввэ. Финалныкъор ЦСКА — «Звезда» — 37:20, «Ростов-Дон» — «Лада» — 43:30. Я 5 — 8-рэ чIыпIэхэр «Астраханочка» — «Университет» — 33:26, «Кубань» — «Динамо» — 25:23. ЯтIонэрэ ешIэгъухэр жъоны­гъуакIэм и 17-м яIэщтых.