Хэгъэгум футболымкIэ иапшъэрэ куп хэт коман­дэхэм я 27-рэ ешIэгъухэр яIагъэх. Мэлылъфэгъум и 30-м «Зенит» Санкт-Петербург апэрэ чIыпIэр къыдихи, дышъэ медальхэр къыфагъэшъошагъэх.

Зэтэгъапшэх

«Рубин» — «Шъачэ» — 0:6, «Динамо» — «Урал» — 2:3, «Краснодар» — «Ростов» — 2:1, «Зенит» — «Локомотив» — 3:1, «Арсенал» — «Нижний Новгород» — 2:2, «Спартак» — «Крылья Советов» — 2:1, «Химки» — «Уфа» — 1:1, «Ахмат» — ЦСКА — 2:0.

«Зенит» 3:1-у «Локомотив» текIуи, илъэс ешIэгъур ыухынымкIэ зэIукIэгъуи 3 къыфэнагъэу апэрэ чIыпIэр къыдихыгъ. «Локомотив» иешIакIоу Керк я 4-рэ такъикъым «Зенит» икъэлапчъэ Iэгуаор ди­дзагъ — 0:1. Сергеевым я 22-рэ, Малком я 42-рэ, Мостовоим я 77-рэ такъикъхэм «Локомотив» икъэлапчъэ Iэгуаор дадзагъ.

«Спартак» иешIакIоу Соболевым пенальтикIэ я 61-рэ такъи­къым хъагъэм Iэгуаор дидзагъ, я 82-рэ такъикъым пчъагъэм хи­гъэхъуагъ. Горшковым пенальтикIэ «Спартак» икъэлапчъэ Iэгуаор я 30-рэ таикъым дидзагъ.

«Краснодар» «Ростов» дешIэзэ я 4-рэ такъикъым Комличенкэм «Краснодар» икъэлапчъэ Iэгуаор дидзагъ. Николай Комличенкэр къалэу Краснодар щапIугъ. Кривцовым я 14-рэ такъикъым «Рос­тов» икъэлапчъэ Iэгуаор ди­дзагъ. Калининым икъэлапчъэ Iэ­гуаор дидзэжьыгъ.

«Химки» «Уфа» 1:0-у текIозэ, Агаларовым пенальтикIэ я 90+2-м хъагъэм Iэгуаор дидзагъ.

«Ахмат» иешIакIохэу Уткиным, я 46-рэ такъикъым, Беришэ я 90+7-м ЦСКА-м икъэлапчъэ Iэ­гуаор дадзагъ.

«Зенит» илъэси 4 хъугъэу зэ­кIэлъыкIоу дышъэ медальхэр къы­дихыгъэх, Урысыем гъого­гъуи 8 ичемпион хъугъэ.