Адыгэ Республикэм и Къэралы­гъо академическэ къэшъокIо ансамблэу «Налмэсым» мэ­фэкIым фэгъэхьыгъэ концертышхо тыгъуасэ Мыекъуапэ къыщитыгъ.

Апэрэу къагъэлъэгъуагъ

Дунаим щыцIэрыIо ансамблэм кIэу ыгъэ­хьазырыгъэ программэу «Налмэс-Налкъутэр тыгъэм пэшIэты» зыфиIорэр апэрэу «Налмэсым» къыгъэлъэгъуагъ.

— «Налмэсыр» купышхо мэхъу. ЗэкIэ артистхэм зы пшъэрылъ агъэцакIэрэр. ЗэгурыIоныгъэ ахэлъэу лъэпкъ искусствэр лъагэу зэраIэтыщтым пылъых, — къытиIуагъ «Налмэсым» ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ язаслуженнэ артистэу, Адыгэ Республикэм инароднэ артистэу Хъоджэе Аслъан. — Илъэс 20-м нахьыбэ хъугъэу ансамблэм хэт артистхэр, бэмышIэу къы­хэхьагъэхэр тиIэх. Зыми ыцIэ къетымыIоу Iофэу ашIэрэр къыхэтэгъэщы.

— Аслъан, мэлылъфэгъу мазэм Урысыем ишъолъырхэм концерти 7 къащышъутыгъ. ЗэIукIэгъухэр дахэкIэ шъугу къэкIыжьыхэу къы­тэпIуагъ.

— Хэгъэгум и Федеральнэ проектэу «Мы — Россия» зыфиIорэм тыхэлажьэ. Лъэпкъ искусствэм ибаиныгъэ хэгъэгум къыщыдгъэ­лъэгъуагъ.

— Подольскэ щежъугъажьи, Бел­город я 7-рэ концертыр къыщы­шъутыгъ.

— Подольскэ, Великий Новгород, Псков, Великие Луки, Брянскэ, Железногорскэ, Белгород тащыIагъ. Тыдэ тыкIуагъэми, бысымхэр гуфэбэныгъэ ахэлъэу къызэрэтпэ­гъокIыгъэхэм къыхэзгъэхъожьы сшIоигъу нэIуасэ къытфэхъугъэхэр, адыгэ лъэпкъ къа­шъохэр зышIогъэшIэгъонхэр телефонкIэ къызэрэтфытеохэрэр. Урысыем ишъолъыр зэфэшъхьафхэм джыри тырагъэблагъэ.

— Бзэр цIыф лъэпкъым ыпс. Къа­шъор…

— Къашъор лъэпкъ искусствэм ыбзэкIэ къэгущыIэ. Жьы къызэрищэрэр, псэ зэрэпытыр къашъо пэпчъ артистхэм къыщагъэлъагъоу сэлъытэ.

— Мыгъэ къэжъугъэлъэгъорэ концертхэр программи 6 мэхъух.

— Къэралыгъо гъэпсыкIэ иIэу Адыгеир зыпсэурэр илъэси 100, «Налмэсыр» зызэхащагъэр илъэс 85-рэ зэрэхъухэрэм тизэIукIэгъухэр афэтэгъэхьых. Лъэпкъ фольклорым, тарихъым къащегъэжьагъэу лъэхъаным ди­штэрэ къашъохэр, театрализованнэ пычы­гъохэр къэтэшIых.

Шэн-хабзэхэр

Адыгэхэм яшэн-хабзэхэр къашъохэм ахэгъэщагъэх. «ШIуфэс къашъом», «IэкIыб къэралхэм ащыпсэурэ тилъэпкъэгъухэм язэхэт къашъохэр», нэмыкIхэри «Налмэсым» дахэу къешIых. Адыгэ шъуашэм ибаиныгъи концертхэм къащегъэлъагъо.

Урысыем ишъолъырхэм «Налмэсыр» зэращыIагъэм ехьылIэгъэ къэбархэр Интер­нетым инэкIубгъохэм игъэкIотыгъэу къаща­Iуатэ. Адыгэ лъэпкъым ипсэукIэ, инеущрэ мафэ зэрэфакIорэм, икультурэ ихэхъоныгъэ­хэм афэгъэхьыгъэ къашъохэр искусствэм иджэрпэджэжьых.

Тыркуем къыщежэх

— «Налмэсыр» Тыркуем шIэхэу кIощт, — тизэдэгущыIэгъу лъегъэкIуатэ Хъоджэе Аслъан. – Адыгэхэр миллион пчъагъэ хъу­хэу Тыркуем щэпсэух. ТызэIукIэ ашIоигъу. Ти­лъэпкъэгъухэр, культурэр зышIогъэшIэгъонхэр тиорэдышъохэмкIэ, къашъохэмкIэ дгъэгушIонхэ тимурад. Урысыем ишъолъырхэм къащыттыщт концертхэм зафэдгъэхьазырыщт.

«ШIу зышIэрэм ишIушIэ кIодырэп» адыгэмэ аIо. «Налмэсыр» ишIушIагъэкIэ Урысыем ишъолъырхэм, IэкIыб хэгъэгухэм алъэIэсы. Ансамблэ цIэрыIом ипащэхэр, артистхэр Адыгэ Республикэм и ЛIышъхьэу КъумпIыл Мурат, Правительствэм, Парламентым лъэшэу афэразэх. «Налмэсыр» пытэу ылъэ теуцоным, цIыфхэм алъыIэсыным фэшI хабзэм икъулыкъушIэхэр иупчIэжьэгъух, иIэпыIэгъух. Автобус зэтегъэпсыхьагъэхэр ансамблэм иIэх, гъогу чыжьэ техьаным фэхьазыр.

Зэкъошныгъэм игъэпытэн, мамыр псэукIэм игъэдэхэн «Налмэсыр» ахэлажьэзэ, Донбассрэ Къэбэртэе-Бэлъкъарымрэ яансамблэхэр игъусэхэу Мыекъуапэ, Налщык къащитыгъэ концертхэр Урысыем икультурэ лъагэ итарихъ шIукIэ хэхьагъэх.

Налмэс-Налкъутэр тыгъэм пэшIэты, Жъогъо 12-р огум щэнэфы. Тыгъэр тшъхьащытэу чIыр къекIокIыфэ Республикэм «Налмэсыр» къыфэшъощт!

Опсэу, тилъапIэу «Налмэсыр»! Лъэпкъым, Адыгэ Республикэм о уряй.

ЕмтIылъ Нурбый.