Урысые Федерацием щынэгъончъэнымкIэ и Совет и Секретарэу Николай Патрушевым тхьамэтагъор зыщызэрихьэгъэ зэIукIэр тыгъуасэ Астрахань щыкIуагъ.

Ащ хэлэжьагъэх Урысые Фе­дерацием и Президент ЮФО-мкIэ и Полномочнэ лIыкIоу Владимир Устиновыр, шъо­лъырхэм япащэхэр, федеральнэ министерствэхэмрэ ведомствэхэмрэ ялIыкIохэр. Адыгэ Республикэм и ЛIышъхьэу Къум­пIыл Мурат Адыгеим ыцIэкIэ ащ иIофшIэн хэлэжьагъ.

Iофыгъоу зытегущыIэщтхэм анахь шъхьаIэхэм ащыщыгъ Урысые Федерацием ишъо­лъырхэу Къыблэ федеральнэ шъолъырым игъунапкъэхэмкIэ гъэзагъэхэм ябиологическэ щы­нэгъончъагъэ.

ЗэIукIэр къызэIуихызэ Ни­колай Патрушевым къызэрэхигъэщыгъэмкIэ, Урысые Феде­рацием и Президентэу Вла­димир Путиным хэушъхьафыкIыгъэ дзэ операциеу зэри­хьэ­рэр пстэуми апэу зыфэгъэхьыгъэр илъэсиим къыкIоцI жъа­лымыгъэ зыдызэрахьэгъэ цIыф­хэр, Киев неонацистскэ режи­мэу ыгъэуцугъэм тхьамыкIагъо къыз­фихьыхэрэр къэухъумэгъэн­хэр ары.

Урысые Федерацием и Совбез и Секретарь ипсалъэ къыщыхигъэщыгъ США-м зэрэду­наеу биологическэ лаборато­риехэр зэрэщигъэпсыгъэхэм ыпкъ къикIэу биологическэ щы­нэгъончъагъэм иIофыгъоу зытегущыIэхэрэм мэхьанэшхо зэриIэр. Урысые Федерацием игъунапкъэхэм апэблагъэуи ащ фэдэ лабораториехэр ашIых.

«Къыблэ федеральнэ шъо­лъырыр чIыпIэу зыдэгъэзагъэм, чIыопс нэшанэу иIэхэм, гъогу зэпырыкIыпIэхэр бэу зэриIэхэм, зекIохэр бэу къызэрэкIо­хэрэм, мэкъумэщ товархэмкIэ дунэе сатыум зызэрэщиушъомбгъугъэм къахэкIэу биологическэ лъэныкъомкIэ щынагъоу щыIэр къылъыIэсын зэрилъэ­кIыщтыр лъэшэу гумэкIыгъо инэу къэуцугъ», — къыIуагъ Николай Патрушевым.

ЦIыфхэр къэухъумэгъэнхэмкIэ, ошIэ-дэмышIагъэ зыхэлъ тхьамыкIагъохэр къэхъунхэмкIэ гумэкIыгъо гъэнэфагъэхэр къызыкъокIыхэкIэ, псэуалъэхэу зишIуагъэ къэкIощтхэр, цIыфхэм псынкIэу макъэ зэрарагъэIущт системэхэр ЮФО-м ишъолъыр­хэм ащыгъэпсыгъэнхэу Н. Пат­рушевым пшъэрылъ къафи­шIыгъ. Анахь мэхьанэ зиIэ пшъэрылъхэм зыкIэ ащыщ ведомствэхэмрэ организациехэмрэ ямылъку­техникэ базэ гъэпытэгъэныр, IэпэIэсэныгъэ ин зыхэлъ кадрэ­хэр ахэм ащылэжьэнхэр, цIыф­хэм япсауныгъэ икъэухъу­мэн ылъэныкъокIэ IофшIэнэу зэ­шIуа­хырэр нахь агъэлъэшыныр.

Владимир Устиновым джащ фэдэу шъолъырхэм япащэхэм анаIэ зытыраригъэдзагъэхэм ащыщ IэкIыб къэралхэм къарыкIыхэрэм япчъагъэ нахьыбэ зэрэхъурэм къыхэкIэу зэпахырэ узхэр къямыутэлIэнхэмкIэ Iоф­тхьабзэхэр зэшIуахынхэр.

Адыгэ Республикэм и ЛIышъхьэ къызэрэхигъэщыгъэмкIэ, республикэм биологическэ лъэ­ныкъомкIэ ищынэгъончъагъэ лъэшэу анаIэ тырагъэты, ащкIэ Iофтхьэбзэ гъэнэфагъэхэр зэра­хьэх. Зэпахын алъэкIыщт анахь щынэгъо узхэр къыхэгъэщыгъэн­хэм медицинэ организациехэр фэхьазырых. Пандемием илъэ­хъан Iофхэм язытет зыфэдэ хъу­гъагъэм ар нафэ къышIыгъ. Зэпахырэ узым зимыушъомбгъуным пае Iофтхьэбзэ гъэнэфагъэхэр республикэм щызэрахьагъэх, вакцинациер амал зэриIэкIэ нахьыбэмэ апэкIэкIыным тынаIэ тедгъэтыгъ, санитарнэ-эпидемиологие лъэны­къомкIэ Iофхэм язытет тэрэзыным тыдэлэжьагъ.

Ащ нэмыкIэу кIэлэцIыкIухэр биологическэ ыкIи химическэ лъэныкъохэмкIэ щынэгъончъэу щытынхэм телъытэгъэ Iофтхьабзэхэр зетэхьэх, гъомылапхъэ­хэм ящынэгъончъагъэ тылъэп­лъэ. Краснодар краим чIыопс къэкIуапIэхэмкIэ и Министерствэ дэтшIыгъэ зэзэгъыныгъэр зыфэгъэхьыгъэр краимрэ рес­публикэмрэ къапэIулъ шъолъыр­хэм ябылымхэм зэпахырэ узхэу яIэхэр къытэнэмысынхэр ары. Джащ фэдэу бамыкIэхэм нахь зыкъызщагъэчанырэ лъэхъаным былымпIашъэхэр обра­боткэ шIы­гъэнхэмкIэ ыкIи кIэлэцIыкIухэм зызщагъэпсэфырэ чIы­пIэхэм язытет зыфэдэр уплъэ­кIугъэнымкIэ Iофыгъо гъэнэфагъэхэр Адыгеим щызэшIуахых.

Республикэм исхэр псы къа­бзэ ешъонхэм тегъэпсыхьэгъэ уплъэкIунхэр зэхэтэщэх, гупчэм къикIэу псыр аIэкIэгъэхьэгъэным тегъэпсыхьэгъэ къэкIопIэ 85-мэ язытет лъэплъэх. Респуб­ликэ программэу «Псы къа­бзэр» зыфиIоу 2019 — 2024-рэ илъэсхэр къызэлъызыубытырэр зэшIохыгъэным пае псыубытыпIэ 38-рэ зэтырагъэпсыхьа­жьыщт ыкIи кIэу агъэпсыщт, муниципальнэ образование 26-мэ арыт псэупIэ 50 ащ къы­хиубытэщт.

Шъугу къэтэгъэкIыжьы: Урысыем икъыблэ шъолъырхэм яIофхэм язытет фэгъэхьыгъэ зэIукIэу Совбезым исекретарь ыпэкIэ зэхищэгъагъэр илъэсэу икIыгъэм бэдзэогъум рекIокIыгъагъ. Ар Адыгеим щыкIогъагъ ыкIи Урысыем и Къыблэ ишъо­лъырхэм яэкологическэ щынэгъончъагъэ иIофыгъохэм афэгъэ­хьыгъагъ.

АР-м и ЛIышъхьэ ипресс-къулыкъу