Мэлылъфэгъум и 23 — 25-м Урысыем кушъ­хьэфэчъэ спортымкIэ изэнэкъокъу Адыгэ Рес­публикэм имыжъо гъогухэм ащыкIуагъ.

Санкт-Петербург, Удмуртием, Татарстан, Красноярскэ, Ново­сибирскэ, Омскэ, Адыгеим якIэлэеджакIохэу илъэс 15 — 16 зыныбжьхэр зэIукIэгъухэм ахэлэжьагъэх.

Апэрэ мафэм зэхащэгъэгъэ шIэжь зэнэкъокъур Урысыем ихэ­шыпыкIыгъэ командэ хэтэу СтIа­шъу Мамыр кушъхьэфэчъэ спортымкIэ иапэрэ тренерэу С. А. Алыбэрдым фэгъэхьыгъагъ.

Адыгэ Республикэм и Къэралыгъо быракъ и Мафэ ехьылIэгъэ зэнэкъокъур гъэшIэгъонэу зэхащагъ. Урысыем кушъхьэфэчъэ спортымкIэ икомандэ хэтхэу Александр Евтушенкэмрэ СтIашъу Мамыррэ спортсменхэм гущыIэгъу афэхъугъэх. Зэнэкъо­къум хагъэунэфыкIырэ чIыпIэхэр къыщыдэзыхыгъэхэм афэгушIуагъэх, шIухьафтынхэр аратыжьыгъэх.

— Республикэм щызэхэтщэгъэ спорт зэIукIэгъухэм урысхэр, къэндзалхэр, удмуртхэр, адыгэхэр, фэшъхьафхэри хэлэ­жьагъэх, — къытиIуагъ Адыгэ Рес­публикэм кушъхьэфэчъэ спор­тымкIэ и Федерацие ипащэу Ана­толий Лелюк. — Адыгеим итарихъ, икультурэ ыкIи испорт афэгъэхьыгъэ хъугъэ-шIагъэхэм кIэлэеджакIохэр ащыдгъэгъоза­гъэх.

Жъогъо 12-р къызыхэлыдыкIырэ адыгэ быракъыр зэнэкъокъум щаIэтыгъ, щагъэбыбэтагъ. Спорт­сменхэр, тренерхэр зэхэуцохэзэ нэпэеплъ сурэтхэр атырахыгъэх.

— Республикэ общественнэ движениеу «Адыгэ Хасэм» бэмышIэу сырагъэблагъи, адыгэ быракъыр зэхахьэм къыщысатыгъ. Хасэм итхьаматэу ЛIы­мыщэкъо Рэмэзан, Хэсашъхьэм хэт­хэу СтIашъу Юрэ, ЦIыкIушъо Аслъан, Хъот Юныс, нэмыкIхэм гущыIэ фабэу къысаIуагъэхэр сщыгъупшэхэрэп, — къеIуатэ СтIашъу Мамыр.

Республикэм испортсменхэр зэнэкъокъухэм ахэлэжьэнхэу за­гъэхьазыры зыхъукIэ адыгэ быракъыр зыдаштэныр, зэнэкъокъур зыщыкIорэ чIыпIэм щагъэбыбэтэныр, быракъыр аIыгъэу сурэтхэр атырахыныр шэнышIу афэхъугъ.

Сурэтым итхэр: Александр Евтушенкэмрэ СтIашъу Ма­мыррэ.