Ростов хэкум икъалэу Новочеркасскэ дзюдомкIэ зэIукIэгъухэр щыкIуагъэх.

Тренер цIэрыIоу Алексей Минаевым фэгъэхьыгъэ шIэжь зэнэкъокъум илъэс 18-м нэс зыныбжь кIалэхэр, пшъашъэхэр хэлэжьагъэх. Волгоград, Ростов хэкухэм, Краснодар краим, Къалмыкъым, Адыгеим ябэнакIохэм яIэпэIэсэныгъэ алырэгъум щауплъэкIугъ. Тиреспубликэ щыщ ныбжьыкIэхэм хагъэунэфыкIырэ чIыпIэхэр къыдахыгъэх.

Дарья Головиновам, кг 57-рэ, апэрэ чIыпIэр къыфагъэшъошагъ. Мария Лодневам, кг 70-рэ, Виктория Пылевам, кг 70-м къехъу, ятIонэрэ чIыпIэхэр къахьыгъэх. Элина Подгорнаям, кг 63-рэ, ящэнэрэ чIыпIэр къыдихыгъ. Тренерэу Мерэм Саидэ пшъашъэхэр егъасэх. Камила Дзагаловам, кг 48-рэ, ятIо­нэрэ чIыпIэр къыхьыгъ, Адыгэ Респуб­ликэм изаслуженнэ тренерэу Нэпсэу Бислъан ипащ.

Къалэм изэнэкъокъу

Новочеркасскэ дзюдомкIэ изэIухыгъэ зэнэкъокъу Урысыем ишъолъырхэм якоманди 5 хэлэжьагъ.

Зыныбжь икъугъэ бэнакIохэм якуп Адыге­им щыщхэм медальхэр къыщахьыгъэх.

Татьяна Шаталовам, кг 52-рэ, апэрэ чIыпIэр къыфагъэшъошагъ, ипащэр Нэпсэу Бислъан. Адыгэ Республикэм ибзылъфыгъэ хэшыпыкIыгъэ командэ итренер шъхьаIэу Мерэм Саидэ ыгъасэхэрэр яIэпэIэсэныгъэкIэ къахэщыгъэх. ХьакIэко Данэ, кг 57-рэ, Мыгу Миланэ, кг 70-рэ, Анастасия Коржовам, кг 78-м къехъу, апэрэ чIыпIэхэр къыдахыгъэх.

Екатерина Соловьевам, кг 78-м къехъу, ятIонэрэ чIыпIэр къыфагъэшъошагъ. Къуа­джэм Iоф щызышIэрэ тренерэу Нэныжъ Байзэт ипащ. Тулпэрэ Данэ, кг 78-м къехъу, ятIонэрэ чIыпIэр къыхьыгъ.

Хъулъфыгъэхэри хагъэунэфыкIырэ чIыпIэхэм афэбэнагъэх. Эдуард Мирошниковым, кг 60, купэу зыхэтым текIоныгъэр къыщыдихыгъ. Тренерхэу Роман Оробцовыр, Беданыкъо Рэмэзан ипащэх.

Ингъуш Владимир самбэмкIи, дзюдомкIи мэбанэ, имедальхэм ахегъахъо. Нарт шъаор кг 100 къэзыщэчыхэрэм ябэныгъ, апэрэ чIыпIэр къыфагъэшъошагъ. Тренерхэу Бастэ Сэлымрэ Нэпсэу Бислъанрэ ипащэх.

ПашIо Алый, кг 66-рэ, ятIонэрэ чIыпIэр къыхьыгъ, Александра Клочковар, кг 52-рэ, ящэнэрэ хъугъэ. Тренерэу Нэпсэу Бислъан бэнакIохэм япащ. Тулпэрэ Данэ, кг 78-м къехъу, Гъыщ Ауес, кг 60, Кобл Азэмат, кг 66-рэ, ящэнэрэ чIыпIэхэр къахьыгъэх. Тренерхэр Мерэм Саид, Нэпсэу Бислъан, беданыкъо Рэмэзан, Беданыкъо Байзэт.

Зэхэпхъагъэхэм къахэщыгъэхэр

Зэфэшъхьаф онтэгъугъэ зиIэхэр зэхэпхъа­гъэхэу зэнэкъокъугъэх. Мыгу Миланэ ятIо­нэрэ чIыпIэр, Анастасия Коржовам, Тулпэрэ Данэ ящэнэрэ чIыпIэхэр къахьыгъэх.

Хъулъфыгъэхэм язэIукIэгъухэм Ингъуш Владимир ящэнэрэ чIыпIэр къащыдихыгъ.

— Краснодар краим, Ростов ыкIи Волгоград хэкухэм, Къалмыкъым, Адыгеим ябэнэкIо 200 Новочеркасскэ щызэнэкъокъугъ, — къытиIуагъ Адыгэ республикэм изаслуженнэ тренерэу Бастэ Сэлым. — КIалэхэм, пшъа­шъэхэм яIэпэIэсэныгъэ хагъэхъонымкIэ ащ фэдэ зэIукIэгъухэр ящыкIагъэх. Адыгеим итренерхэр, дзюдомкIэ ибэнакIохэр зэхэщакIохэм афэразэх.