Мэлылъфэгъум и 25-м Адыгэ Республикэм и Къэралыгъо быракъ и Мафэ игъэкIотыгъэу республикэм щагъэмэфэкIыщт.

Республикэм испорт еджапIэу N 2-м ипащэу, Урысыем, Адыгеим язаслуженнэ тренерэу, Дунэе Адыгэ Хасэм ныбжьыкIэ Iоф­хэмкIэ, зекIонымкIэ, физкультурэмкIэ ыкIи спортымкIэ и Комитет итхьаматэу Хъот Юныс къытиIуагъ мэфэкI зэхахьэхэм нэ­бгырабэ зэрахэлэжьэщтыр.

— Адыгэ быракъым лъэпкъхэр зэфещэх. МэфэкIхэм, Iофтхьэбзэ хэхыгъэхэм, спорт зэнэкъокъухэм тахэлажьэ зыхъукIэ, адыгэ быракъыр ащагъэбыбатэ. Адыгэ быракъым имэфэкI ехьылIэгъэ зэIукIэгъухэр тиспорт еджапIэ щызэхэтщагъэх, — къеIуатэ Хъот Юныс. — Урысхэм, адыгэхэм, ермэлхэм, нэмыкIхэм ащыщ лъэпкъхэм тиеджапIэ зыщагъасэ. Республикэм ибыракъ итарихъ фэгъэхьыгъэ къэбархэм ныбжьыкIэхэр ащыдгъэгъозагъэх.

Адыгеим итренер анахь дэгъухэу 2021-рэ илъэсым къыхахыгъэхэм ащыщых Олег Тыщенкэр, Василий Есиныр, Хьаткъо Ахьмэд, НэмытIэкъо Аскэрбый. Спортсмен анахь дэ­гъухэм ахалъытагъэх Кристина Дюбинар, Кристина Морозовар, Даур Къадырбэч.

Джырэблагъэ Владислав Власовым Къыб­лэм тхэквондомкIэ изэнэкъокъу апэрэ чIыпIэр къыщыдихыгъ, Урысыем икIэлэеджакIохэм якIэух спартакиадэу бэдзэогъум зэхащэщтым хэлэжьэщт.

Сурэтым итхэр: АР-м испорт еджапIэу N 2-м зыщызыгъасэхэрэр.