Къалмыкъ театрэр ашIогъэшIэгъон
Къалмыкъ республикэм драмэмкIэ ыкIи комедиемкIэ иреспубликэ урыс театрэ икъэгъэлъэгъонхэр Адыгэ Республикэм и Къэралыгъо филармоние щыкIуагъэх.
— Спектаклэ 20-м нахьыбэ тирепертуар хэт, — къеIуатэ театрэм ипащэу, Къалмыкъ Республикэм инароднэ артистэу Виктор Хаптахановым. — Адыгеим ныбджэгъухэр, нэIуасэхэр щытиIэх. Къалмыкъымрэ Адыгеимрэ яартистхэр зэлъэкIох, къэгъэлъэгъонхэмкIэ зэхъожьых. Адыгэ Республикэм инароднэ артистэу, нысхъапэхэм ятеатрэу «Дышъэ къошыным» ихудожественнэ пащэу Сихъу Станислав бэшIагъэу синыбджэгъу, тызэдеджагъ. Зэхэщэн IофхэмкIэ IэпыIэгъу къытфэхъугъэхэм, Сихъу Станислав лъэшэу тафэраз. Адыгеим творческэ зэпхыныгъэу дытиIэхэр тапэкIэ зэрэдгъэпсыщтхэм тегупшысэ.
А. С. Пушкиным ипшысэу «Сказка о мертвой царевне и о семи богатырях» зыфиIорэ спектаклэм кIэлэцIыкIухэр ашIогъэшIэгъонэу еплъыгъэх. Режиссерыр Къалмыкъ Республикэм инароднэ артисткэу Елена Хаптаханова. СурэтышIыр Къалмыкъым искусствэхэмкIэ изаслуженнэ IофышIэшхоу Павел Корниенко.
Пачъыхьэм ироль къэзышIыгъэр артистэу Леонид Сангаджиев. Пачъыхьэпхъу дахэм ироль фэгъэзагъэр артисткэ ныбжьыкIэу Зоя Кузыченко. Батыриблымэ ярольхэр къэзышIыхэрэ хъулъфыгъэхэр зэрэфэпагъэхэм, Iашэмрэ шъуашэмрэ язехьан зэрэфэгъэсагъэхэм, зэгурыIоныгъэ ахэлъэу якъулыкъу зэрахьырэм, нэмыкI пычыгъохэм спектаклэр къагъэбаигъ.
Ыпкъ ищыгъэу, нэгушIоу пачъыхьэпхъум ироль къэзышIырэ Зоя Кузыченкэм псынкIэу узыIэпещэ. ИзекIуакIэ, инэплъэгъу фабэ, игущыIакIэ гум рехьых. Филармонием изал тIысыпIэ нэкI имыIэжьэу къэгъэлъэгъоныр кIуагъэ.
Мюзиклэу «Сказ про Федота-стрельца» зыфиIорэми кIэлэцIыкIухэр ягуапэу еплъыгъэх. Пьесэр Леонид Филатовым ытхыгъ. Режиссерыр ыкIи композиторыр Урысыем, Къалмыкъым искусствэхэмкIэ язаслуженнэ IофышIэшхоу Б. Манджиев.
— Пшысэхэм атехыгъэ къэгъэлъэгъонхэр кIэлэцIыкIухэм ящыкIагъэх. ЗекIокIэ дэйхэр къызыхафэхэрэр зэрагъэмысэхэрэм, гукIэгъу зыхэлъ цIыфхэм язекIокIэ-шIыкIэхэм сабыйхэр яплъыхэзэ яшIэныгъэхэм ахагъахъо, — къытиIуагъ Адыгэ Республикэм и Къэралыгъо филармоние икIэлэцIыкIу театрэу «Дышъэ къошыным» ихудожественнэ пащэу, Адыгэ Республикэм инароднэ артистэу, тхакIоу Сихъу Станислав. — Дунэе фестивальхэм щытхъуцIэхэр къащыдэзыхыгъэ Къалмыкъ театрэм тигъэгушIуагъ.
Сахьидэкъо Нурбый.