Белоруссием щызэнэкъокъущтых
Урысые Федерацием кушъхьэфэчъэ спортымкIэ изэнэкъокъу Шъачэ щыкIуагъ.
Хъулъфыгъэхэр едзыгъуи 5-мэ ахэлэжьагъэх. Адыгэ Республикэм испортсменэу Александр Евтушенкэм я 4-рэ чIыпIэр къыдихыгъ. Нарт шъаоу СтIашъу Мамыр я 4-рэ едзыгъом ятIонэрэ чIыпIэр къыщихьыгъ. Километри 110-рэ спортсменхэм къызакIум, М. СтIашъум апэрэ чIыпIэр къыдимыхыгъэми, щысэшIу къыгъэлъэгъуагъ.
— ЖъоныгъокIэ мазэм кушъхьэфэчъэ спортымкIэ дунэе зэIукIэгъухэр Минскэ щыкIощтых, — къыIуагъ Адыгэ Республикэм кушъхьэфэчъэ спортымкIэ и Федерацие ипащэу Анатолий Лелюк. — СтIашъу Мамыр, Александр Евтушенкэм Белоруссием щызэхащэщт зэнэкъокъум хэлэжьэнхэу фитыныгъэ къыдахыгъ.
Лъэпкъхэр спортым зэфещэх. Мамырныгъэм игъэпытэн фэгъэхьыгъэ зэIукIэгъухэм Адыгеим испортсменхэм яухьазырыныгъэ къащагъэлъэгъощт, спортыр мамырзехьэу зэрэщытыр зэнэкъокъум къыщагъэлъэгъощт.