«Шыу мафэ» илъэпэ маф
Дэрбэ Тимур ипьесэу «Бромберг щыкIогъэ процессыр» зыфиIорэм техыгъэ спектаклэу «Шыу мафэр» Адыгэ Республикэм и Лъэпкъ театрэ къызщагъэлъагъом, культурэм ылъэныкъокIэ ар хъугъэ-шIэгъэ инхэм ахэхьагъ.
ПчыхьитIуми зэкIэлъыкIоу Мыекъуапэ спектаклэм щеплъыгъэх, ары къэс залым цIыфхэр бэу чIэсыгъэх. Зэплъыгъэхэр агу нэсыгъэу, ащымыгъупшэу ахэр «Шыу мафэ» бэрэ рыгущыIагъэх, лъэпкъ хабзэр къизыIотыкIырэ пьесэу адыгэ дзэкIолIхэм афэгъэхьыгъэр артистхэм къызэрагъэлъэгъошъугъэр, ар къазэрэдэхъугъэр еплъыгъэхэм зэдырагъаштэу хагъэунэфыкIыгъ.
Спектаклэм Адыгэ театрэм иартистхэр хэлэжьагъэх. Роль шъхьаIэмэ ащыщэу нэмыц прокурорэу Нойман къэзышIыгъэр Адыгэ Республикэм инароднэ артистэу Тхьаркъохъо Теуцожь. Ащ сиупчIэхэр фэзгъэзагъэх.
— Теуцожь, Дэрбэ Тимур ытхыгъэ пьесэр хъугъэ-шIэгъэ шъыпкъэмэ атехыгъ. Ахэр тарихъым къыхэнагъэх. Пьесэр зэрэтхыгъэмрэ спектаклэр зэрэгъэуцугъэмрэ сыда зэрэзэтекIыхэрэр?
— Мы хъишъэм хъарзынэщым чIыпIэ зыщиубытыгъэр илъэси 172-рэ хъугъэу непэрэ мафэхэм къыднэсыжьыгъ. Тигуапэ ащ фэдэ хъугъэ-шIагъэу тилъэпкъ щыщ кIалэмэ къяхъулIагъэр къызэрэтлъыIэсыжьыгъэр. ТшIогъэшIэгъонэу Iоф дэтшIагъ спектаклэм. ЦIыфхэр зэплъыгъэхэмрэ тарихъым щыщ нэкIубгъохэмрэ зэтекIых. ШIулъэгъуныгъэ темэр Тимур хигъэуцуагъ — герой шъхьаIэм нэмыц пшъашъэр шIу елъэгъу. Ащ пьесэр нахь гъэшIэгъон къышIыгъ. Рольхэм кIуцI яI, псыхьагъэх.
— О прокурорым ироль къэпшIыгъ. Къэбгъэлъэгъуагъэр нэмыц прокурор, цIыф пхъаш. IэнатIэмрэ цIыфыгъэмрэ, тымрэ прокурорымрэ сыдэущтэу зэпэщэчыгъэ хъугъэха, сыда нахь къыптекIуагъэр?
— КъэсшIыгъэ ролым — прокурорэу Нойман — адыгэхэр зыфэдэхэр ешIэх, бэмэ яджагъ, гъэсагъэ, анахь шъхьэкIафэ зыфашIыщтыгъэ прокурорэу Пруссием исыгъэмэ ащыщ. Мыщ адыгэхэм дэй къяхъулIэ шIоигъоп, шъхьэкIафи афешIы, шIу елъэгъух, елъытэх. Ау ыпхъу ары зэкIэри зыпкъ къикIыгъэр. Прокурорыр ыпхъу фэгуIагъ, унэгъо дахэ ышIэнышъ, Европэм иобществэ чIыпIэ щиубытымэ шIоигъуагъ. Шъхьэгъусэр имыIэжьэу пшъашъэр изакъоу къызыфанэм, ащ ищыIэныгъэ фигъэшъошагъ. Мощ фэдиз къин зыпшъэ дэкIэу, заомэ ахэлэжьэрэ имылъэпкъэгъу кIалэр ипшъашъэ къызэрэхихыгъэр хэукъоныгъэу прокурорым ылъытагъ. Ащ дакIомэ сыдэу хъущта, тыдэ щыпсэущта, сыд фэдэ щыIакIэ иIэщта? Джары мысагъэу щыIэр прокурорым Шыумафэ зыкIыпигъохырэр. ШъыпкъэмкIэ, ащ зи мыхъун ышIагъэп — игъусэгъэ дзэкIолIхэм, ежьыри зэрахэтэу, Пруссием игъунапкъэ зэрэзэпачыгъэр ары ныIэп. Дэеу адэпсэугъэхэп ыкIи пэгъокIыгъэхэп. Ау ахъщэ къуалъхьэ афишIызэ прокурорым ахэр еумысых, мыхъэр егъахъэ. Ыгу ихъыкIырэр къэбгъэлъэгъоныр псынкIэп, ащ нахь къиныжь ироль къэпшIыныр. Лъэпкъым пэуцурэм сыгукIэ десымыгъаштэу, ау къытэплъырэм героир ышIошъ згъэхъуныр пшъэрылъ шъхьаIэу сиIагъ.
— Спектаклэр мэкIофэ ащ хэт геройхэм къаIорэ гущыIэ зырызхэр тыгу къинагъэх. Очылым игущыIэхэу «Мы адыгэхэм якъэбзагъэ ныбжьи тыкIэхьащтэп» — а уахътэм лъэпкъым осэшхоу фашIыгъэм ишыхьатых. ГущыIэхэу Шыумафэ епIуагъэхэр: «О лIыгъэ зэрэпхэлъыр сэ сшIагъэ!» Лъэпкъым зэрэщытэу зыфэбгъазэзэ, «лIыгъэ зэрэшъухэлъыр сэ сшIагъэ» пIорэм фэдэу. Лъэойхэу очылымрэ прокурорымрэ зытесыгъэхэ лъэгапIэхэм якIуалIэщтыгъэхэр къыдахьыехэшъ, лъэмыдж зэикI зэрэхъужьыхэрэр, ахэм апышIэгъэ щыуан-лэгъэжъыехэр Фемидэм итамыгъэхэу шъыпкъагъэр зыщызэпащэчырэ ушэтыпIэу зэрэхъухэрэр. Шыумафэ ыIэхэр, ылъакъохэр зэрэпхыгъэгъэ пшъэхъухэр къамэкIэ къызэрэзэпиутхэрэр, кIэухым лъагэу зэрэдэкIоежьырэр. А зэпстэури мэхьанэ куу зиIэ тамыгъэу къэлъагъох.
— Бэгъушъэ Анзор очылым ироль къыупкIэпкIыгъ, гущыIэхэу ащ къыIохэрэм лъэпкъым ыкупкI къагъэлъагъо: «Черкесхэр яцIыкIугъом щегъэжьагъэу щэрыоным фагъасэх. ЩабзэкIи, щэкIи, сэшхокIи, къамэкIи уапэшIуекIон умылъэкIынэу щэIэхэфэ загъасэ. Шыр зэрагъэзекIорэр, шым ахэр зэрэфыщытхэр, шыхэр къазэрафыщытыжьхэр — заом нэмыкI щымыIэу ашIошъ хъугъэ, ащ хэт зэпытхэзэ. Шыумафэ заом хищыжьымэ шIоигъоу а шыр лъэгонджэмышъхьэкIэ ыпашъхьэ къызэритIысхьагъэр, ыныбэбгъукIэ гъолъи зэрэзытыригъэпшыхьажьыщтыгъэр. ЗэрэфэмылъэкIыжьырэр къыгурыIорэм фэдагъ. Ащ фэдэу шыр агъасэми ныбжьи сшIагъэп. «Iэлхэр» аIо, а Iэлхэм хабзэу яIэр, напэр къызэраухъумэрэр, ахэм якъэбзагъэ тэ тыкIэхьанкIэ тиIэр бэ!»
Бэу къин слъэгъугъэ. Ащ фэдиз дэхагъэр чIэсыухъумэнышъ ыпшъэ сыкIон фэягъэ сэ къэсшIыгъэ прокурорым иролькIэ. Ыпшъэ сызымыкIокIэ пшъашъэр сIэкIэкIыщт. Адыгэхэм афэгъэхьыгъэ гущыIэ инхэу, шъыпкъэхэу, кIуачIэхэу мы пьесэм хэтхэм шъхьафэу цIыфхэр ябгъэджэнхэ, зэхябгъэхынхэ фае. Сценэм имызакъоу, тиIэх мафэхэр ахэр зыщыбгъэIунхэ фаехэр. Ахэр лъэпкъым инэпэеплъых.
— Спектаклэ ужым гъэзетэу «Адыгэ макъэм» и Телеграм- канал театральнэ критикэу Шъхьэлэхъо Светланэ о къэпшIыгъэ ролым фэгъэхьыгъэу мыщ фэдэу къыригъэхьэгъагъ: «Режиссерыри, актерыри гущыIэ кIамыгъэзэу игъэкIотыгъэу пьесэм дэлэжьагъэх. …Тхьаркъуахъом нэгуухъор (маска), шъхьацтелъхьэр (парик) фэIазэу зэрэзэрихьэхэрэр. Зытес лъэгапIэм жьы кIэтэу лъэоимкIэ зэрэдэчъэежьырэр, къызэречъэхыжьырэр… Актерыр IэпэIэсэ шъыпкъ, шъхьащэ фэсэшIы!» Нэгуухъом къыфэдгъэзэжьмэ, Европэм ис цIыфхэр къэзыгъэлъагъощтыгъэхэм ахэр аIулъыгъэх. Сыда ащ имэхьаныгъэр?
— Къонтхъ, банэ, пцIы — ахэм зэрафэкIыгъэу ынэгу къэлъагъорэп европейцэм. Адыгэ кIэлэ ныбжьыкIэхэу джа Европэм кIуагъэхэм анэгухэр ихыгъэх. Мы кIалэхэм дахэу къагъэлъэгъуагъэм, арагъэлъэгъугъэм нэгуухъохэр къакIигъэзыгъэх. ЩыIэныгъэм нэмыкI еплъыкIэхэр зэриIэхэр Европэм исхэм къагурыIуагъ.
— Теуцожь, роль шъхьаIэр къэзышIыгъэ Хъуадэкъо Азэмат Шыумафэ ироль къыдэхъугъоу олъыта?
— Актерэу Хъуадэкъо Азэмат адыгабзэ Iулъыгъэп. КъасIомэ сшIоигъу, Тхьэкъохъо Марджэнэтрэ УдыкIэко Ислъамрэ мэзэ пчъагъэм ар рагъаджэзэ, агъэтэрэзыжьызэ джа къыIуагъэхэр рагъэшIагъэх. Ежь Азэмат ынэхэр жъыухэу пшъашъэм, очылым сценэу адыриIэхэр къыубытыгъэх, къыгурыIуагъэх, къышIыгъэх. Дэхагъэу, мэхьанэу ролым иIэр зэхишIагъ.
Нэм къыкIэуцо Шыумафэ иныбджэгъу дзэкIолIхэр игъусэхэу мэшIокухэр зыIукIыхэрэ вокзалым тетхэу, прокурорым ипшъашъэ апэрэу зыщыIукIэрэ пычыгъоу спектаклэм хэтыр:
Шыумаф: Сэ сызыфаер сшIэнэу пцIэ.
Маргрезе: Сэ сцIэр Маргрезе, сынэмыц пшъашъ.
Шыумаф: Ар цIэ дах. Марзет тызэрэоджэщтыр.
Маргрезе: Марзет, сыд Марзета?
Шыумаф: Адыгэ гуащэ ухъумэ джары къызэрэоджэщтхэр, — Шыумафэ гушIозэ иныбджэгъухэм закъыфегъазэ. ШIулъэгъум зэлъиштэгъэ кIэлакIэм иобраз Хъуадэкъо Азэмат къыдэхъу.
— Роль зэфэшъхьафхэр спектаклэм хэтых. Ахэм зэу ащыщ прокурорым ыпхъоу Маргрезе иролэу Тхьэкъохъо Марджэнэт къышIыгъэр. Ар анахь роль гъэшIэгъонхэм ыкIи къинхэм ащыщ. Пхъумрэ тымрэ азыфагу къитэджэгъэ зэгурымыIоныгъэр шIулъэгъуныгъэу Маргрезе Шыумафэ фишIыгъэм къыхэкIыгъ. Ар къэжъугъэлъэгъоныр сыдэущтэу къыжъудэхъугъа?
— Марджэнэт ироль усэкIэ тхыгъэ. Дэгъоу къыгурыIуагъ. Хахъозэ дэкIоягъ, зы орэдэу къыIуагъэм фэд. Бэрэ ащыгъыгъ репетициехэм. Режиссерым «умыгъ» ыIуагъэп. КIэухым тыфакIо зэхъум, «щыгъэт» ыIозэ режиссерым Марджэнэт ыIэжагъ. Ыпхъу шIу елъэгъу прокурорым. Ар игущыIэмэ къаушыхьаты: «Уянэ зэблэсхъун слъэкIыгъэп. Ау ны зиIэхэм уямыхъопсэным, умынэтIупцIэным сыпылъыгъ. Уянэ зэлIэм къэсщэжьыгъэп, къэсщэжьырэм иягъэ къыуигъэкIымэ сIуи. Ощ нахь лъапIэ сэ сиIагъэп, о сэ сыгу ухэтIагъ. ЕгъашIэм насыпышIо узэрэхъущтым сыкIэхъопсызэ къэсхьыгъ. НэмыкI гъогу сэ фыхэсхыгъэр, нэмыкI кIал сэ къыоспэсыщтыгъэр, ау мы черкесыр о къыхэпхыгъэмэ, сыд сикъинми, къыбдесэгъаштэ. Тхьэм насыпышIо шъуешI, шъузэдегъэтхъэжь! Гъогу мафэ шъутехь!» Тыр еуцуалIэ пхъум къыхихыгъэм. Мы сценэм анахь эмоциональнэ кIуачIэ иIэу щыт.
ЕмкIуж Андзор сыкъыщытхъу сшIоигъу. Чэщи мафи къэмыуцоу Iоф ышIагъ. Лъэоим зэрэдэкIоежьырэр Шумафэ, ишъэогъу дзэкIолIхэр зэрэготхэр, ежьыр кIэухым къэзыIэтырэ лъэгапIэр — зэкIэ зым зыр ыуж итэу къыхигъэхьагъэх, гъэпсыгъэ хъугъэ, къызэпыуцуагъ.
— Прокурорым ироль къэмышIыгъагъэмэ, хэт ироль къыхэпхыщтыгъэр?
— Очылыр ары. (Теуцожь мэщхы.) Ащ Дэрбэ Тимур жабзэу Iуилъхьагъэр! Непэ, сэрымэ, згъэфедэщтыгъэ а гущыIэхэр, цIыфмэ зэхязгъэхыщтыгъэ. Лъэпкъым щытхъоу пылъыр, уасэу фашIыщтыгъэр пстэуми ашIэн фае!
— Спектаклэр Мыекъуапэ гъогогъуитIо зэкIэлъыкIоу, Краснодар зы пчыхьэ къащыжъугъэлъэгъуагъ. Хэт нахь фабэу къышъупэгъокIыгъэр?
— Краснодар щыIэхэр нахь эмоциональнэхэу къысщыхъугъ. Бэгъушъэ Анзор монолог къызешIым, залым чIэсхэр Iэгу фытеуагъэх. «Тхьэм насыпышIо шъуешI, шъузэдегъэтхъэжь!» сэ къызысэIом, джащ фэдэу Iэгушъо теуагъэх. Джащ фэдэ чIыпIэхэр къыхэкIыгъэх. Тэ тизритель фэшъхьаф. Пчыхьищми щыIагъэхэр зэфэшъхьафыгъэх. Ау яшъыпкъэу къытэплъыгъэх, спектаклэр ашIогъэшIэгъоныгъ.
— Адыгеим къэралыгъо гъэпсыкIэ зиIэр мыгъэ илъэси 100 мэхъу. А хъугъэ- шIагъэм мы пьесэр Лъэпкъ театрэм фегъэшъуашэ. ЕкIу шъыпкъэу къысшIошIы. Сыд фэдэ Iофтхьабзэхэр джыри театрэм зэхищэщтха?
— Мы спектаклэм фэдэ Темыр Кавказым щагъэуцугъэп. Тэ ар къыддэхъугъ. ТитхакIохэм, тиусакIохэм ятхыгъэхэм ащыщхэр зыхэхьащтхэ къэгъэлъэгъон Хьакъуй Аслъан зэхищэщт. Джыдэдэм ар тэгъэхьазыры, аугъоигъэр бэ. Къытфагощыгъ пычыгъоу къэтIощтхэр, пчыхьэзэхахьэр театрализованнэу тшIыщт. «Шыу мафэр» апшъэ итэу илъэс реным къэдгъэлъэгъощт.
— Теуцожь, тхьауегъэпсэу сиупчIэхэм джэуап гъэшIэгъонхэр къызэряптыжьыгъэмкIэ. Лъэпкъ театрэм джыри пьесэ гъэшIэгъоныбэ ыгъэуцунэу, актер бэлахьэу тиIэхэр къыщылъэгъонхэу, лъэпкъым, адыгэм ыцIэ дахэкIэ жъугъэIун шъулъэкIынэу шъуфэтэIо!
— Тхьауегъэпсэу.
Тэу Замир.