Адыгэ къамылыр зие лъэпкъым къыфэкIожьы
Мэлылъфэгъум и 14-м АР-м итхылъеджапIэ ГъукIэ Замудин итхылъыкIэу «Адыгэ къамыл». («Черкес (адыгэ) къамыл») зыфиIорэм илъэтегъэуцо щыIагъ.
Адыгэ музыкальнэ культурэм чIыпIэ ин щызыубытыщт IофшIагъэр 2022-м — лъэпкъ искусствэм ыкIи культурнэ кIэным я Илъэс тефэу къыдэкIыгъ.
Iофтхьабзэм Адыгэ Республикэм ишIэныгъэлэжьхэм ащыщхэр, лъэпкъ интеллигенцием инахьыжъ гъэшIуагъэхэр, АР-м культурэмкIэ и Министерствэ къикIыгъэхэр, еджэпIэ зэфэшъхьафхэу Мыекъуапэ дэтхэм ащеджэхэрэр, журналистхэр ыкIи искусствэр зикIасэхэр хэлэжьагъэх.
ГъукIэ Замудин илъэпкъ паемэ, зышъхьамысыжьхэрэм ащыщ — IофшIэкIошху. Ар АР-м изаслуженнэ сурэтышI, Урысыем исурэтышIхэм я Союз хэт, художествэхэмкIэ Урысые академием идипломзехь. Адыгэ пэсэрэ культурэм иушэтакIу. Адыгэ пIуаблэм, лъэпкъ пщынэ Iэмэ-псымэхэм яшIынкIэ IэпэIас. Тхылъхэу «Адыгэ пIуаблэм иискусств», «ШыкIэпщынэ къегъэIуакIэ зэтэгъашIэ», «Адыгэ шыкIэпщынэм и Атлас» зыфиIохэрэр Мыекъуапэ къыщыдэкIыгъэх. ГъукIэлI Замудин пэсэрэ бзэпситIу шыкIэпщынэм икъегъэIон зыщыфагъэсэрэ еджапIэ къызэIуихыгъ, орэдыIо-шыкIэпщынэо купэу «Жъыур» зэхищагъ. 2010-рэ илъэсым щегъэжьагъэу Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм иIорIотэ къутамэ икIэлэегъадж.
Къамылыр ижъ-ижъыжькIэ адыгэхэм анахь якIасэу агъэфедэщтыгъэ мэкъэмэ Iэмэ-псым, IэпэIасэхэм ар «къагъэгущыIапэу» зэрэщытыгъэр фольклор тхыгъэхэм къаIуатэ. Арышъ, «Адыгэ къамыл» зыфиIорэ энциклопедическэ къыдэкIыгъоу Замудин илъэс 30 Iэпэ-цыпэм Iоф зыдишIагъэр осэшхо зиI.
Тхылъым фэгъэхьыгъэ мэфэкI лъэтегъэуцор псэлъэ фабэкIэ къызэIуихыгъ Адыгэ Республикэм культурэмкIэ иминистрэ игуадзэу Кушъу Светланэ.
— Илъэс 35-рэ хъугъэ ГъукIэ Замудин зысшIэрэр, — къыIуагъ ащ — анахьэу згъэшIагъорэр, гукIодыныр зыщыщ ымышIэу, анахь лъэпкъ Iофыгъошхом сыдигъуи зэрэфежьэрэр; игупшысэ гъогу зэригъотырэр, имурад ехьыжьагъэ сыдигъокIи щытхъу хэлъэу зэрэкIищырэр ары. Ау а IофшIагъэхэм зэкIэ лIым ыкIуачIи, иамали, игупшыси зэрахэлъыр къызыдэплъытэкIэ, ар лъэныкъуабэкIэ гъэзагъэу шIэныгъэ куур искусствэмкIэ зылэжьэу зэрэщытыр къыпфэнафэ. Мары итхылъышхоу «Адыгэ къамыл» зыфиIорэр ащ ищыс, тыгу къыддеIэу зэкIэ мы къекIолIагъэхэм ацIэкIэ ыкIи сэ сшъхьэкIэ тыфэгушIо адыгэ къамылыр лъэпкъым зэрэIуигъэкIэжьыгъэмкIэ, псауныгъэ дахэ иIэу гъэхъэгъакIэхэм афэкIонэу тапэкIи сыфэлъаIо.
МэфэкI Iофтхьабзэм хэлэжьагъ ыкIи къыщыгущыIагъ искусствэхэмкIэ кIэлэцIыкIу еджапIэу К. Лъэцэрыкъом ыцIэ зыхьырэм идиректорэу, искусствоведениемкIэ кандидатэу Анзэрэкъо Марзиет. ЗэлъашIэрэ IэпэIасэу ГъукIэ Замудин иадыгэ лъэпкъ фэлэжьэн насыпрэ акъылрэ зэриIэр ыкIи ар къызэрэдэхъурэр, ышIэрэ Iофым сыдигъуи псэ къызэрэпигъакIэрэр, зэрэIофшIэкIошхор, непэрэ лъэтегъэуцор, тхылъыкIэу «Адыгэ къамылыр» адыгэ лъэпкъымкIэ ыкIи ежь авторымкIэ мафэ хъунхэу къафиIуагъ.
Лъэтегъэуцом хэлэжьагъ ыкIи игуапэу ежь иусэу «Къамыл» зыфиIоу тхылъыр къызэIузыхырэм къеджагъ зэлъашIэрэ сурэтышIэу, архитекторэу Бырсыр Абдулахь.
ЗэIукIэм IэкIыбым къикIыжьыгъэ лIы Iушыбэ щыIагъ, ахэр, зэкI пIоми хъунэу, тхылъым хэлъ гупшысэр зэIугъэкIэгъэным ыкIи ащ икъыдэгъэкIын пэIухьащт мылъкум зиIахь хэзылъхьагъэх.
ТхылъыкIэу «Адыгэ къамыл» зыфиIоу илъэс пшIы пчъагъэм Iоф зыдишIагъэм изэхэтыкIэ-гъэпсыкIэ, итеплъэ, зэрэзэтеутыгъэ шIыкIэр, шъхьэ пэпчъ къыIуатэрэр, тхылъ-энциклопедием осэшIу (къыдэгъэкIыгъэным ыпаIоу) УрысыемкIэ искусствэхэм ятарихъ институт къызэрэщыратыгъэр ГъукIэ Замудин игуапэу къыIуагъ. Ащ пыдзагъэу ипэублэ гущыIэ зытхыгъэр искусствоведениемкIэ кандидатэу, УрысыемкIэ искусствэхэм ятарихъ институт икъутамэ пщынэ Iэмэ-псымэхэмкIэ ишIэныгъэлэжь шъхьаIэу Динара Булатовар арэу зэрэщытыр къыхигъэщыгъ.
Тхылъышхом ыкIышъо тет сурэтыр зышIыгъэр Къэбэртэе-Бэлъкъарым щыщ сурэтышIэу Бгъажънэкъо Заур.
Джащ фэдэу Замудин тхылъым иредакторхэм ацIэ къыриIуагъ: филологие шIэныгъэхэмкIэ докторэу, профессорэу ГутIэ Адам, филологие шIэныгъэхэмкIэ докторэу, профессорэу Унэрэкъо Рай.
ТхылъыкIэмкIэ упчIэжьэгъур (консультантыр) Увыж А. М., сурэтышIыр Щоджэн Жанна.
«Адыгэ къамылыр» бзищыкIэ тхыгъэ: адыгабзэкIэ, урысыбзэкIэ, инджылызыбзэкIэ. АдыгабзэкIэ зэзыдзэкIыгъэр Унэрэкъо Рай, инджылызыбзэм изылъхьагъэхэр Теуцожь Фатимэрэ В. Беренковамрэ.
Тхылъыр нэкIубгъо 478-рэ мэхъу, шъхьи 9-у зэхэт. Булатовам ипэублэ гущыIэ ыкIи ежь ГъукIэ Замудин истатьяу «Адыгэ къамылымрэ пщынэ Iэмэ-псымэхэм яхьылIэгъэ шIэныгъэмрэ» зыфиIорэм ар къызэIуахы. Къамылым икъэхъукI, къамылапщэхэм якъэбархэр, мэкъамэхэм янотэхэр, сурэтхэр тхылъым щызэхэугъоягъэх. Къамылыр зэрагъэфедэрэр, ащ ишIыкIэ, къызэребгъэIощтыр, Iэмэ-псымэм инэшэнэ шъхьаIэхэр З. ГъукIэм итхылъ къыщиIотыкIыгъэх. СД-альбомэу «Адыгэ къамыл мэкъамэхэм яантологий, 1941 — 2021» зыфиIорэр тхылъым игъус. Статья зэфэшъхьафхэр ыкIи ахэмкIэ сурэтхэр бэу дэтых, а зэкIэ адыгабзэкIэ, урысыбзэкIэ, инджылызыбзэкIэ тхыгъэх. Адыгэ культурэр зышIогъэшIэгъонхэмкIэ, ащ дэлажьэу, хахъо фэзышIыхэрэмкIэ Замудин итхылъыкIэ шIэныгъэ IэпыIэгъу ин хъущт. Тхылъ-энциклопедием икъыдэгъэкIынкIэ мылъку IэпыIэгъу авторым къыфэхъугъэхэм ацIэхэр тхылъым ыкIэкIэ къыщыIуагъэх — нэбгырэ 17 мэхъух. АР-м и ЛIышъхьэу КъумпIыл М., Шъэумэн Хьазрэт Мэджыдэ ыкъом ишIушIэ фонд, мыхэм анэмыкIхэри.
ГъукIэ Замудин лъэныкъуабэкIэ тхылъым итхынкIэ къыдеIагъэхэм ыкIи икъыдэгъэкIын къыфэзыгъэпсынкIагъэхэм, непэрэ лъэтегъэуцом хэлэжьагъэ пэпчъ лъэшэу зэрафэразэр кIигъэтхъыгъ, псауныгъэкIэ къафэлъэIуагъ.
Лъэтегъэуцом хэлажьэхэрэм ГъукIэ Замудин итхылъыкIэ «Гъогу маф!» фаIуагъ.
Мамырыкъо Нуриет. Сурэтхэр Iэшъынэ Аслъан тырихыгъэх.