Шъачэ щэкIо
Хэгъэгум кушъхьэфэчъэ спортымкIэ изэIукIэгъухэр ижъырэ адыгэ къалэу Шъачэ щэкIох.
— Мэлылъфэгъум и 12-м аублэгъэ зэнэкъокъур и 17-м аухыщт, — къытиIуагъ Адыгэ Республикэм кушъхьэфэчъэ спортымкIэ и Федерацие ипащэу Анатолий Лелюк. — Адыгеим испортсменхэр хагъэунэфыкIырэ чIыпIэхэм афэбанэх.
Апэрэ мафэм купым хэтхэу километри 5-м ехъу къакIугъ. Адыгеим икомандэ Александр Евтушенкэр къыхэщыгъ, ящэнэрэ чIыпIэр къыдихыгъ.
Купым хэтхэу километри 158-рэ хъурэ гъогум зыщызэнэкъокъухэм, спортымкIэ дунэе класс зиIэ мастерэу СтIашъу Мамыр ящэнэрэ чIыпIэр къыхьыгъ.
Хэгъэгум изэнэкъокъу спортсменхэм лъагъэкIуатэ. Мэлылъфэгъум и 15-м ехъулIэу Александр Евтушенкэр ящэнэрэ чIыпIэм щыI, апэ ишъыгъэм нэгъэупIэпIэгъу 15-кIэ ыуж къенэ. Урысыем ишъолъыр 24-мэ яспортсмени 110-рэ Шъачэ щыкIорэ зэнэкъокъум хэлажьэ.