Зырагъэушъомбгъун ямурад
Адыгэ Республикэм атлетикэ онтэгъумкIэ изэнэкъокъу Тэхъутэмыкъое районым ипсэупIэу Инэм щызэхащагъ.
Хъулъфыгъэ 58-рэ апэрэ чIыпIэхэм афэбэнагъ. Яонтэгъугъэхэм ялъытыгъэу батырхэр купи 7-мэ ахэтыгъэх.
Бгъуашэ Асхьад, кг 55-рэ, апэрэ чIыпIэр къыдихыгъ, тренерэу Бгъуашэ Тимур ипащэу Улапэ зыщегъасэ.
Арсен Саканян, кг 61-рэ, тренерыр Шъэожъ Мурадин, ПчыхьакIэ Амир, кг 73-рэ, тренерыр Чэмбэхъу Анзор, Шэуджэн Адам, кг 96-рэ, тренерыр Чэмбэхъу Анзор — зэкIэ зыцIэ къетIогъэ спортсменхэр Красногвардейскэ районым щыщых, Адыгэ Республикэм апэрэ чIыпIэр къыщахьыгъ.
Михаил Федотовым, кг 67-рэ, Мыекъуапэ зыщегъасэ, тренерэу ипащэр Сихъу Аслъан. Артем Горловым, кг 81-рэ, тренерхэу Александр Горловымрэ Роман Казаковымрэ ипащэх. Хьабый Хъусен, кг 89-рэ, тренерэу Роман Казаковым егъасэ. Батырхэм Тэхъутэмыкъое районым испорт еджапIэ яIэпэIэсэныгъэ щыхагъахъо. Адыгеим ичемпион хъугъэх.
— Къоджэ спортыр нахь лъагэу къэIэтыгъэным, физкультурэм пыщагъэхэм япчъагъэ хэгъэхъогъэным, ныбжьыкIэхэм япсауныгъэ гъэпытэгъэным афэгъэхьыгъэ зэнэкъокъум икIэуххэр зэфэтэхьысыжьых, — къытиIуагъ Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу спортымкIэ дунэе класс зиIэ мастерэу Сихъу Рэмэзан. — Зэнэкъокъухэр нахьыбэрэ зэхатщэхэзэ атлетикэ онтэгъум зедгъэушъомбгъун тимурад.
Сурэтым итхэр: хагъэунэфыкIырэ чIыпIэхэр къыдэзыхыгъэхэр, тренерхэр.