«АГУ-Адыиф» Мыекъуапэ — «Динамо-Синара» Волгоград — 21:22 (12:15). Мэлылъфэгъум и 13-м Кобл Якъубэ ыцIэ зыхьырэ спорт Унэшхом щешIагъэх.

«АГУ-Адыиф»: Кобл Зуриет — 6, Краснокутская — 3, Ни­кулина, Кириллова — 2, Колодяжная — 1, С. Морозова — 2, Мещерякова, А. Морозова — 2, Казиханова, Поршина, Краснова — 1, къэлэпчъэIутхэр: Ламзина, Баскакова.

«Динамэм» къыхэщыгъэхэр: Долматова — 9, Старшова — 3, Дудкина — 3.

Финалым и 1/8-м хэхьэрэ апэрэ зэIукIэгъур гандбол командэхэм Мыекъуапэ щыряIагъ. ПэшIорыгъэшъ ешIэгъухэу суперлигэм щыкIуагъэхэм «Динамэм» апэрэ чIыпIэр, «Адыифым» я 4-рэ чIыпIэр къащахьыгъэх.

Мыекъуапэ щызэхащэгъэ зэ­IукIэгъум пчъагъэр зэрэщылъыкIуатэщтыгъэр: 4:1, 4:4, 5:5, 7:7. Я 25-рэ такъикъым 11:11. Я 40-рэ такъикъым 14:18. ЗэIукIэгъур аухынымкIэ такъикъ 14 къызэнэм, 15:20 пчъагъэр хъугъэ.

Анна Красновар джабгъу лъэныкъом щыIэу ухъумакIохэм аIэ­кIэкIыгъ, къэлапчъэм Iэгуаор ди­дзагъ — 17:20. Татьяна Кирилловамрэ Кобл Зуриетрэ зырызэ хъагъэм Iэгуаор радзэ — 19:21. Алина Морозовам я 53-рэ ыкIи 55-рэ такъикъхэм къэлапчъэм Iэгуаор тIогъогогъо дедзэ — 21:21. Зы такъикъ тешIагъэу «Динамэм» иешIакIоу Е. Скивко «Адыифым» икъэлапчъэ Iэгуаор дедзэ — 21:22.

Аужырэ такъикъым Ангелина Куцеваловар ыпэкIэ зелъым, «Динамэм» иухъумакIо шапхъэхэр ыукъуагъэх. Метри 7 тазыр дзыгъор Юлия Кожубековам дэеу ыгъэцэкIагъ. Шъабэу ыдзыгъэ Iэгуаор къэлэпчъэIутэу А. Верещак къызэкIидзэжьыгъ, ешIэгъур 21:22-у аухыгъ.

Кобл Зуриет ешIэкIо анахь дэгъоу зэхэщакIохэм къыхахыгъ.

— Мэлылъфэгъум и 17-м Волгоград ятIонэрэ зэIукIэгъур щыти­Iэщт, — къытиIуагъ «Адыифым» итренер шъхьаIэу Александр Рев­вэ. — ТекIоныгъэм тыфэбэнэщт.