«Динамо-МГТУ» Мыекъуапэ — «БАРС-РГЭУ» Ростов-на-Дону — 89:80 (22:13, 19:28, 27:14, 21:25). Мэлылъфэгъум и 12-м АР-м испорт Унэшхоу «Ошъутенэм» щызэIукIагъэх.

«Динамо-МГТУ»: Чичайкин — 4, Суслов — 9, Александров — 13, Гапошин — 17, Чаленко, Милютин — 11, НатIэкъу, Каренин — 2, Сизов — 17, Кочнев — 16.

Я 5-рэ чIыпIэр къыдэхыгъэным фэшI суперлигэм хэт командэхэу ятIонэрэ купым щешIэхэрэр зэнэкъокъугъэх. Командэхэм апэрэ зэIукIэгъоу Ростов-на-Дону щыряIагъэм «БАРС-РГЭУ-м» текIоныгъэр къыщыдихыгъ. ЯтIонэрэ ешIэгъур Мыекъуапэ щыкIуагъ.

Я 35-рэ такъикъым пчъагъэр 76:64-рэ. Такъикъищ зытешIэм, 82:73-рэ пчъагъэр хъугъэ. ЗэIукIэгъур аухынкIэ зы такъикъ къэнагъэу пчъагъэр 86:76-у щытыгъ.

Мыекъопэ «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Андрей Синельниковым баскетболым хэгъозэгъэхэ Илья Александровым, Артем Гапошиным, Павел Сизовым, нэмыкIхэм цыхьэу афишIырэр къагъэшъыпкъэжьыгъ. НыбжьыкIэхэу Даниил Чаленкэр, НатIэкъо Мэдин ешIапIэм къыригъэхьагъэх. НыбжьыкIэхэр бэрэ емышIагъэхэми, зэIукIэгъур ушэтыпIэшIу афэхъугъ.

Тыгъуасэ командэхэр ящэнэрэу зэдешIагъэх. Зэнэкъо­къум икIэух гъэзетеджэхэр щыдгъэгъозэщтых.