Анастасие шъуедэIу, зыжъугъэпсэф
Орэдым псэ къыпызыгъакIэрэм, тамэ езытырэм ипчыхьэзэхахьэ гъэшIэгъон зэрэхъущтым щэч хэлъэп.
Адыгэ Республикэм и Къэралыгъо филармоние и Къэралыгъо оркестрэу Анатолий Шипитько ыцIэ зыхьырэ «Русская удалым» иконцерт мэлылъфэгъум и 22-м Мыекъуапэ щыкIощт. Дунэе фестиваль- зэнэкъокъухэм пчъагъэрэ щытхъуцIэхэр къащыдэзыхыгъэ орэдыIоу Анастасия Истамуловам ипчыхьэзэхахьэ искусствэр зышIогъэшIэгъонхэр зэхэщакIохэм рагъэблагъэх.
«Русская удалым» ихудожественнэ пащэу, Адыгэ Республикэм инароднэ артистэу, музыкант цIэрыIоу Андрей Ефименкэм игуапэу тыщигъэгъозагъ Анастасия Истамуловам орэд зэфэшъхьафхэр концертым къызэрэщиIощтхэм.
Сэнаущыгъэ зыхэлъ артисткэу мэкъэ Iэтыгъэ зиIэм Адыгэ Республикэм иконцерт хэхыгъэхэр къегъэдахэх. Макъэр зэкIищызэ, орэдым хэлъ гущыIэхэр къабзэу къыплъегъэIэсых. Орэдышъомрэ макъэмрэ зэрэзэдиштэхэрэм ишIуагъэкIэ игущыIэхэр гурыIогъошIух.
Урыс лъэпкъ орэдхэр макъэм имызакъоу, гукIэ къэсэIох. Орэд пэпчъ екIолIэкIэ шъхьаф къыфэзгъотыным фэшI сикIэлэегъаджэхэм, оркестрэм хэтхэм яшIуагъэ къысагъэкIыгъ, — къеIуатэ Анастасия Истамуловам.
Артистым искусствэ лъагэм зыфигъасэзэ, орэдыIохэм яшэн- хабзэхэм, къыодэIурэ цIыфхэм гукIэ уалъыIэсын зэрэфаем А. Истамуловам мэхьэнэ ин реты.
Оркестрэм илектор-искусствоведэу Ирина Ибрагимовам концертыр зэрищэнэу зегъэхьазыры. Урыс лъэпкъ ыкIи сэмэркъэу зыхэлъ кIэнэкIэлъэ орэдхэр, гур зыIэтыхэрэр, СССР-м илъэхъан, джырэ уахътэ аусыгъэхэр А. Истамуловам къыIощтых. Пчыхьэм концертыр сыхьатыр 6-м рагъэжьэщт. Искусствэр зышIогъэшIэгъонхэр, артисткэм итворчествэ зыгъэлъапIэхэрэр, «Русская удалым» едэIу зышIоигъохэр зэхэщакIохэм филармонием рагъэблагъэх. ЕмтIылъ Нурбый.