Апшъэрэ купым хэт футбол командэхэм мэлылъфэгъум и 9 – 10-м я 24-рэ зэIукIэгъухэр яIагъэх.

2021 — 2022-рэ илъэс зэнэкъо­къур командэхэм шIэхэу аухыщт, ешIэгъу хырых къафэнагъ. Апэ ишъыгъэхэри, ауж къинагъэхэри рэхьатыхэп. ЗэIукIэгъу пэпчъ имэхьанэ зыкъеIэты.

ЕшIэгъухэр

«Химки» — ЦСКА – 4:2, «Нижний Новгород» — «Динамо» — 0:1, «Рубин» — «Краснодар» — 0:1, «Ахмат» — «Зенит» — 0:2, «Урал» — «Крылья Советов» — 0:1, «Уфа» — «Шъа­чэ» — 1:2, «Спартак» — «Арсенал» — 3:0, «Ростов» — «Локомотив» — 4:1.

ХьакIэу ешIэгъэ клуби 5-мэ текIоныгъэр къызэрэдахыгъэр къыхэтэгъэщы. Ижъырэ адыгэ къалэу Шъачэ иклуб текIоныгъэр Уфа къыщихьыгъ. Кассьеррэ къэ­лапчъэм ыкIыб фэгъэзагъэу ешIа­пIэм тефэзэ хъагъэм Iэгуаор дахэу зэрэридзагъэр тшIогъэшIэгъон. Ащ фэдэ IэпэIэсэныгъэ футболым къыщызыгъэлъагъо­хэрэр дунэе футболыр лъагэу зыIэтыхэрэм ахалъытэ. А. Юсуповми Уфа икомандэ икъэлапчъэ Iэгуаор дахэу дидзагъ.

«Краснодар» ушэтынхэр ешIых, ныбжьыкIэхэм яIэпэIэсэныгъэ еуплъэкIу. «Краснодар» «Рубин» дешIэзэ я 85-рэ такъикъым Волковым Iэгуаор къэлапчъэм ди­дзагъ. Волковыр ухъумакIом зэрэIэкIэкIыгъэр, хъагъэм Iэгуаор зэрэридзагъэр къыхэдгъэщызэ, «Рубин» ауж къинэхэрэм ащыщ зэрэхъурэм тренер шъхьаIэу Леонид Слуцкэр зэригъэгумэкIырэр къэтэIо. Клубым ешIакIоу хэкIы­жьыгъэр макIэп, кIэу аштагъэхэм зыкъызэIуахыгъэгоп.

«Спартак» 3:0-у «Арсенал» зэрэтекIуагъэр, Ш. Николсон гъо­гогъуитIо, Р. Зобниным зэ хъагъэм Iэгуаор зэрэрадзагъэм гугъэ- гупшысэхэр къеIэтых. Клуб цIэ­рыIом фэгумэкIыхэрэм къызэраIорэмкIэ, «Спартак» пытэу ылъэ теуцожьыным пылъ.

Хьапэ Заур — тренер шъхьаI

«Локомотив» итренер шъхьаIэу агъэнэфагъэр дэгъоу тэшIэ. Хьапэ Заур Къэбэртэе-Бэлъкъарым щапIугъ. «Локомотив» икъэлэпчъэ­Iутэу футбол ешIэщтыгъ. «Ростов» итренер шъхьаIэу Валерий Карпиным къыIуагъ клубыр иешIакIэ зэрэлъыхъурэр, Хьапэ Заур иIэ­натIэ бэрэ ыгъэцэкIэным фэшI клубым зэхъокIыныгъэу щыкIощтхэм тяжэщт.

«Химки» итренер шъхьаIэу Сергей Юран дунэе футболым щыцIэрыIу. «Химки» 4:2-у зэIукIэгъур ЦСКА-м къызэрэшIуихьы­гъэр ошIэ-дэмышIэ Iофэу бэмэ алъы­тэми, клубыр апшъэрэ купым къы­хэнэжьын ылъэкIыщтэу зылъы­тэхэрэм япчъагъэ хэхъуагъ.

«Динамэр», «Зенит» апэ ишъы­гъэх. «Зенит» дышъэм нахь пэб­лагъ. Апшъэрэ купым къыхэзыщтхэр непэ къэшIэгъуае.

Хэт тыдэ щыIа?

1. «Зенит» — 52 2. «Динамо» — 49 3. ЦСКА — 43 4. «Шъачэ» — 42 5. «Краснодар» — 39 6. «Локомотив» — 37 7. «Кр. Советов» — 35 8. «Ахмат» — 32 9. «Спартак» — 30 10. «Ростов» — 28 11. «Н. Новгород» — 27 12. «Рубин» — 25 13. «Химки» — 24 14. «Урал» — 24 15. «Арсенал» — 21 16. «Уфа» — 21. Къэлапчъэм Iэгуаор анахьыбэрэ дэзыдзагъэр — «Зенит» — 55-рэ, анахь макIэу икъэлапчъэ Iэгуаор дэзыгъэкIыгъэр — «Краснодар» — 22-рэ.

Я 25-рэ ЗэIукIэ­гъухэр

15.04 «Динамо» — «Ахмат» 16.04 «Уфа» — ЦСКА «Зенит» — «Урал» «Спартак» — «Рубин» 17.04 «Арсенал» — «Ростов» «Кр. Советов» — «Краснодар» «Н.Новгород» — «Химки» «Шъачэ» — «Локомотив» ЕшIэгъухэм шъуалъыплъ, клубхэр гъэшIэгъонэу зэнэкъокъух.